2 Eachdraidh 23 - Am Bìoball Iomraidh Gàidhlig 1880 1992

1 Rinn Iehoiada Ioas na rìgh. 12 Chuireadh Ataliah gu bàs. 16 Bhriseadh altairean agus dealbhan Bhaail. 20 Shuidhich Iehoiada Ioas air an rìgh‐chathair.

¹ Agus anns an t‑seachdamh bliadhna neartaich Iehoiada e fhèin, agus ghabh e na ceannardan‐cheud, Asariah mac Ierohaim, agus Ismael mac Iehohanain, agus Asariah mac Obeid, agus Maaseiah mac Adaiah, agus Elisaphat mac Shichri, a‑steach ann an coicheangal ris.

² Agus chaidh iad mun cuairt ann an Iùdah, agus chruinnich iad na Lèbhithich a‑mach à uile bhailtean Iùdah, agus cinn athraichean Israeil, agus thàinig iad gu Ierusalem.

³ Agus rinn an coitheanal uile coicheangal ris an rìgh ann an taigh Dhè: agus thubhairt e riu, Feuch, rìoghaichidh mac an rìgh, mar a thubhairt an Tighearna mu mhic Dhaibhidh.

⁴ Seo an nì a nì sibh: Bidh an treas cuid dhibhse a thèid a‑steach air an t‑sàbaid de na sagartan agus de na Lèbhithich nan luchd‐gleidhidh nan doras;

⁵ Agus bidh trian aig taigh an rìgh; agus trian aig geata na bunaite; agus bidh an sluagh uile ann an cùirtean taigh an Tighearna.

⁶ Ach na tigeadh a‑steach do thaigh an Tighearna ach na sagartan, agus iadsan de na Lèbhithich a fhrithealas: thèid iadsan a‑steach, oir tha iad naomh: ach coimheadaidh an sluagh uile faire an Tighearna.

⁷ Agus cuartaichidh na Lèbhithich an rìgh air gach taobh, gach fear le a airm na làimh; agus ge bè neach a thig a‑steach don taigh, cuirear gu bàs e: ach bithibh‐se maille ris an rìgh, nuair a thig e a‑steach, agus nuair a thèid e a‑mach.

⁸ Agus rinn na Lèbhithich, agus Iùdah uile, a rèir nan uile nithean a dh’àithn Iehoiada an sagart, agus ghabh iad gach fear a dhaoine fhèin a bha gu teachd a‑steach air an t‑sàbaid, maille riùsan a bha gu dol a‑mach air an t‑sàbaid; oir cha do leig Iehoiada an sagart air falbh na roinnean.

⁹ Agus thug Iehoiada an sagart do na ceannardan‐cheud sleaghan, agus sgiathan, agus targaidean, a bha aig rìgh Daibhidh, a bha ann an taigh Dhè.

¹⁰ Agus chuir e an sluagh uile, gach fear le a ghath na làimh, o thaobh deas an taighe gu ruig taobh clì an taighe, làimh ris an altair agus an taigh, mun cuairt air an rìgh.

¹¹ Agus thug iad a‑mach mac an rìgh, agus chuir iad an crùn air, agus thug iad dha an fhianais, agus rinn iad na rìgh e: agus dh’ung Iehoiada agus a mhic e, agus thubhairt iad, Guma fada beò an rìgh.

¹² Agus nuair a chuala Ataliah fuaim an t‑sluaigh a’ ruith cuideachd, agus a’ moladh an rìgh, thàinig i a dh’ionnsaigh an t‑sluaigh a‑steach do thaigh an Tighearna.

¹³ Agus dh’amhairc i, agus, feuch, sheas an rìgh làimh ra phost aig an dol a‑steach, agus na h‑uachdarain agus na trompaidean làimh ris an rìgh; agus rinn uile shluagh na tìre gàirdeachas, agus rinn iad fuaim le trompaidean, agus an luchd‐seinn le innealan‐ciùil, agus iadsan a bha eòlach air moladh: agus reub Ataliah a h‑aodach, agus thubhairt i, Foill, foill!

¹⁴ An sin dh’àithn Iehoiada an sagart do na ceannardan‐cheud a chuireadh os cionn an t‑slòigh, agus thubhairt e riu, Thugaibh a‑mach i an taobh a‑muigh de na sreathan; agus ge bè neach a leanas i, marbhar leis a’ chlaidheamh e: oir thubhairt an sagart, Na cuiribh gu bàs i ann an taigh an Tighearna.

¹⁵ Agus thug iad comas dhi; agus nuair a thàinig i gu dol a‑steach geata nan each aig taigh an rìgh, mharbh iad an sin i.

¹⁶ Agus rinn Iehoiada coicheangal eadar e fhèin agus an sluagh gu lèir, agus an rìgh, gum biodh iad nan sluagh aig an Tighearna.

¹⁷ Agus chaidh an sluagh uile a‑steach do thaigh Bhàail, agus leag iad sìos e, agus bhris iad a altairean agus a dhealbhan gu tur, agus mharbh iad Matan sagart Bhàail fa chomhair nan altair.

¹⁸ Agus shuidhich Iehoiada luchd‐riaghlaidh taigh an Tighearna le làimh nan sagart agus nan Lèbhitheach, a roinn Daibhidh ann an taigh an Tighearna, a‑chum ìobairtean‐loisgte an Tighearna ìobradh, mar a tha e sgrìobhte ann an lagh Mhaois, le gàirdeachas agus le seinn, a rèir òrdagh Dhaibhidh.

¹⁹ Agus shuidhich e na dorsairean aig geatachan taigh an Tighearna, a‑chum nach rachadh neach air bith a‑steach, a bha neòghlan ann an nì air bith.

²⁰ Agus ghabh e na ceannardan‐cheud, agus na h‑àrd‐uaislean, agus uachdarain an t‑sluaigh, agus uile shluagh na tìre, agus thug iad a‑nuas an rìgh o thaigh an Tighearna; agus thàinig iad tron gheata àrd a‑steach do thaigh an rìgh, agus chuir iad an rìgh na shuidhe air rìgh‐chathair na rìoghachd.

²¹ Agus rinn uile shluagh na tìre gàirdeachas: agus bha am baile sàmhach, an dèidh dhaibh Ataliah a mharbhadh leis a’ chlaidheamh.