2 Eachdraidh 18 - Am Bìoball Iomraidh Gàidhlig 1880 1992

1 Chaidh Iehosaphat maille ri Ahab an aghaidh Ramot‐ghilead. 4 Dh’fhiosraich iad a dh’fhacal an Tighearna, agus thug na fàidhean brèige làn‐dearbhachd dhaibh gun soirbhicheadh leo. 6 Chuireadh fios air Micaiah: 15 ro‑innis e bàs Ahaib.

¹ Agus bha aig Iehosaphat beartas agus cliù ann am pailteas: agus rinn e cleamhnas ri Ahab.

² Agus an ceann bhliadhnachan àraidh chaidh e sìos a dh’ionnsaigh Ahaib do Shamaria: agus mharbh Ahab caoraich agus crodh ann am pailteas air a shon, agus airson an t‑sluaigh a bha maille ris, agus chuir e impidh air dol suas gu Ramot‐gilead.

³ Agus thubhairt Ahab rìgh Israeil ri Iehosaphat rìgh Iùdah, An tèid thu maille riumsa do Ramot‐gilead? Agus fhreagair esan e, Tha mise mar a tha thusa, agus mo shluagh‐sa mar do shluagh‐sa, agus bidh sinn leat anns a’ chogadh.

⁴ Agus thubhairt Iehosaphat ri rìgh Israeil, Fiosraich, guidheam ort, an‑diugh de fhacal an Tighearna.

⁵ Uime sin chruinnich rìgh Israeil na fàidhean an ceann a chèile, ceithir cheud fear, agus thubhairt e riu, An tèid sinn do Ramot‐gilead gu cath, no an leig mi leis? Agus thubhairt iadsan, Falbh suas: oir bheir Dia ann an làimh an rìgh iad.

⁶ Agus thubhairt Iehosaphat, Nach eil an seo fàidh tuilleadh leis an Tighearna a‑chum gum fiosraich sinn dheth?

⁷ Agus thubhairt rìgh Israeil ri Iehosaphat, Tha fhathast aon fhear ann, leis am faod sinn fiosrachadh den Tighearna: ach tha fuath agam dha, oir chan eil e a’ dèanamh fàistneachd mum thimcheall idir air math, ach an còmhnaidh air olc: is e seo Micaiah, mac Imla. Agus thubhairt Iehosaphat, Na abradh an rìgh mar sin.

⁸ Agus ghairm rìgh Israeil aon de a mhaoir, agus thubhairt e, Greas an seo Micaiah mac Imla.

⁹ Agus shuidh rìgh Israeil, agus Iehosaphat rìgh Iùdah, gach fear air a rìgh‐chathair fhèin, len earradh rìoghail orra, agus shuidh iad ann an àite rèidh, aig dol a‑steach geata Shamaria; agus bha na fàidhean uile ri fàidheadaireachd nan làthair.

¹⁰ Agus rinn Sedeciah, mac Chenannah, adhaircean iarainn dha fhèin, agus thubhairt e, Mar seo tha an Tighearna ag ràdh, Leo seo buailidh tu na Sirianaich, gus an cuirear as dhaibh.

¹¹ Agus rinn na fàidhean uile fàidheadaireachd mar sin, ag ràdh, Falbh suas gu Ramot‐gilead, agus soirbhich; oir bheir an Tighearna ann an làimh an rìgh iad.

¹² Agus an teachdaire a chaidh a ghairm Mhicaiah, labhair e ris, ag ràdh, Feuch, tha briathran nam fàidh le aon bheul a’ foillseachadh maith don rìgh: biodh d’fhacal‐sa, guidheam ort, mar fhacal aoin dhiubhsan, agus labhair math.

¹³ Agus thubhairt Micaiah, Mar as beò an Tighearna, eadhon an nì a their mo Dhia, sin labhraidh mise.

¹⁴ Agus thàinig e a dh’ionnsaigh an rìgh, agus thubhairt an rìgh ris, A Mhicaiah, an tèid sinn do Ramot‐gilead gu cath, no an leig mi leis? Agus thubhairt esan, Rachaibh suas, agus soirbhichibh, oir bheirear nur làimh iad.

¹⁵ Agus thubhairt an rìgh ris, Cia lìon uair a mhionnaicheas mi thu, nach innis thu dhomh ach an fhìrinn ann an ainm an Tighearna?

¹⁶ Agus thubhairt esan, Chunnaic mi Israel uile sgapte air na slèibhtean, mar chaoraich aig nach eil buachaille: agus thubhairt an Tighearna, Chan eil maighistir orra seo; tilleadh gach fear da thaigh fhèin ann an sìth.

¹⁷ (Agus thubhairt rìgh Israeil ri Iehosaphat, Nach d’innis mi dhut, nach dèanadh e fàistneachd mum thimcheall‐sa air math, ach air olc?)

¹⁸ A‑rìs thubhairt e, Uime sin èisdibh ri facal an Tighearna: Chunnaic mise an Tighearna na shuidhe air a rìgh‐chathair, agus uile shlòigh nan nèamh nan seasamh air a làimh dheis agus air a làimh chlì.

¹⁹ Agus thubhairt an Tighearna, Cò a chuireas impidh air Ahab rìgh Israeil, a‑chum is gun tèid e suas, agus gun tuit e ann an Ramot‐gilead? Agus labhair aon, ag ràdh mar seo, agus aon eile ag ràdh mar siud.

²⁰ Agus thàinig spiorad a‑mach, agus sheas e am fianais an Tighearna, agus thubhairt e, Cuiridh mise impidh air. Agus thubhairt an Tighearna ris, Cia leis?

²¹ Agus thubhairt esan, Thèid mi a‑mach, agus bidh mi am spiorad brèige ann am beul a fhàidhean uile. Agus thubhairt an Tighearna, Cuiridh tu impidh air, agus mar an ceudna buadhaichidh tu: imich, agus dèan mar sin.

²² A‑nis uime sin, feuch, chuir an Tighearna spiorad brèige ann am beul nam fàidhean sin agad, agus labhair an Tighearna olc mud thimcheall.

²³ An sin chaidh Sedeciah mac Chenaanah am fagas, agus bhuail e Micaiah air a’ ghiall, agus thubhairt e, Cia an taobh a chaidh spiorad an Tighearna uamsa a labhairt riutsa?

²⁴ Agus thubhairt Micaiah, Feuch, chì thu anns an là sin air an tèid thu a‑steach do sheòmar‐cùil gu thu fhèin fhalach.

²⁵ An sin thubhairt rìgh Israeil, Glacaibh Micaiah, agus thugaibh air ais e gu Amon, uachdaran a’ bhaile, agus gu Iòas mac an rìgh;

²⁶ Agus abraibh, Mar seo thubhairt an rìgh, Cuiribh am fear seo anns a’ phrìosan, agus beathaichibh e le aran airce, agus le uisge airce, gus an till mise ann an sìth.

²⁷ Agus thubhairt Micaiah, Ma thilleas tusa idir ann an sìth, cha do labhair an Tighearna leamsa. Agus thubhairt e, Eisdibh, a shlòigh uile.

²⁸ Uime sin chaidh rìgh Israeil, agus Iehosaphat rìgh Iùdah, suas gu Ramot‐gilead.

²⁹ Agus thubhairt rìgh Israeil ri Iehosaphat, Cuiridh mise mi fhèin ann an coslas eile, agus thèid mi a‑steach don chath: ach cuir thusa d’earradh rìoghail ort. Agus chuir rìgh Israeil e fhèin ann an coslas eile, agus chaidh e a‑steach don chath.

³⁰ A‑nis dh’àithn rìgh Shiria do cheannardan nan carbad a bha aige, ag ràdh, Na cogaibh ris a’ bheag no ris a’ mhòr, ach ri rìgh Israeil a‑mhàin.

³¹ Agus nuair a chunnaic ceannardan nan carbad Iehosaphat, thubhairt iad, Is e seo rìgh Israeil: uime sin thàinig iad mun cuairt air a chogadh. Ach ghlaodh Iehosaphat a‑mach, agus chuidich an Tighearna leis, agus dh’aom Dia iad gu falbh uaithe.

³² Oir nuair a chunnaic ceannardan nan carbad nach b’e rìgh Israeil a bha ann, thill iad o a leantainn.

³³ Agus tharraing fear a bhogha air thuairmeas, agus bhuail e rìgh Israeil eadar uilt na lùirich: uime sin thubhairt e ra charbadair, Tionndaidh do làmh, agus thoir a‑mach as an fheachd mi: oir tha mi leònte.

³⁴ Ach mheudaich an cath air an là sin: uime sin dh’fhan rìgh Israeil suas na charbad an aghaidh nan Sirianach gu ruig am feasgar; agus fhuair e bàs mu àm dol fodha na grèine.