2 Eachdraidh 16 - Am Bìoball Iomraidh Gàidhlig 1880 1992

1 Rinn Asa coicheangal ri Benhadad an aghaidh Bhaasa. 7 Thug Hanani achmhasan do Asa a chionn gun d’earb e as na Sirianaich. 12 Dh’fhàs eucail na chasan. 13 A bhàs.

¹ Anns an t‑siathamh‐bliadhna‑deug ar fhichead de rìoghachadh Asa, thàinig Baasa rìgh Israeil a‑nìos an aghaidh Iùdah, agus thog e Ramah, a‑chum nach leigeadh e le neach air bith dol a‑mach no teachd a‑steach gu Asa rìgh Iùdah.

² An sin thug Asa a‑mach airgead agus òr à ionmhasan taigh an Tighearna agus taigh an rìgh, agus chuir e teachdairean gu Benhadad rìgh Shiria a bha a chòmhnaidh an Damascas, ag ràdh,

³ Biodh coicheangal eadar mise agus thusa, mar a bha eadar m’athair‐sa agus d’athair‐sa: feuch, chuir mi ad ionnsaigh airgead agus òr; falbh, bris do choicheangal ri Baasa rìgh Israeil, a‑chum gun imich e uam.

⁴ Agus dh’èisd Benhadad ri rìgh Asa, agus chuir e ceannardan nan armailt a bha aige an aghaidh bailtean Israeil; agus bhuail iad Ion, agus Dan, agus Abel‐maim, agus uile bhailtean‐ionmhais Naphtali.

⁵ Agus nuair a chuala Baasa sin, leig e dheth Ramah a thogail, agus sguir e da obair.

⁶ An sin thug Asa an rìgh leis Iùdah uile; agus thug iad leo clachan Ramah, agus a fhiodh, leis an robh Baasa a’ togail; agus thog e leo Geba, agus Mispah.

⁷ Agus anns an àm sin thàinig Hanani am fear‐seallaidh gu Asa rìgh Iùdah, agus thubhairt e ris, A chionn gun d’earb thu à rìgh Shiria, agus nach d’earb thu as an Tighearna do Dhia, uime sin tha armailt rìgh Shiria air dol as od làimh.

⁸ Nach robh an h‑Etiopaich agus na Lubaich nan sluagh lìonmhor, le ro‑mhòran charbad agus marc‐shluaigh? Gidheadh a chionn gun d’earb thu as an Tighearna thug e thairis dod làimh iad.

⁹ Oir tha sùilean an Tighearna ag amharc a‑null agus a‑nall air feadh na talmhainn uile, a‑chum e fhèin a nochdadh làidir as an leth‐san, aig a bheil cridhe iomlan da thaobh. Rinn thu gu h‑amaideach an seo; air an adhbhar sin o seo a‑mach bidh cogadh ad aghaidh.

¹⁰ An sin bha fearg air Asa ris an fhear‐sheallaidh, agus chuir e ann an taigh‐prìosain e, a chionn gu robh e ann an corraich ris a‑thaobh an nì seo. Agus rinn Asa ainneart air cuid den t‑sluagh anns an àm sin.

¹¹ Agus, feuch, gnìomharan Asa, an toiseach agus mu dheireadh, feuch, tha iad sgrìobhte ann an leabhar rìghrean Iùdah agus Israeil.

¹² Agus dh’fhàs eucail air Asa na chasan anns an naoidheamh‐bliadhna‑deug ar fhichead de a rìoghachadh, gus an tàinig a eucail gu àirde mhòir: gidheadh na eucail cha d’iarr e an Tighearna, ach na lighichean.

¹³ Agus chaidil Asa maille ra athraichean, agus dh’eug e anns a’ chiad bliadhna agus dà‑fhichead de a rìoghachadh.

¹⁴ Agus dh’adhlaic iad e na uaigh fhèin, a rinn e air a shon fhèin ann am baile Dhaibhidh, agus chuir iad na laighe e ann an leabaidh, a lìonadh le nithean cùbhraidh, agus le iomadh gnè ola air an deasachadh le ealadhain an lèigh: agus rinn iad dha losgadh ro‑mhòr.