2 Corintianach 3 - Am Bìoball Iomraidh Gàidhlig 1880 1992

1 Air eagal gun cuireadh luchd‐teagaisg brèige as a leth gu robh e a’ dèanamh uaill gu dìomhain, nochd Pòl gu robh gràsa nan Corintianach nan adhbhar molaidh da mhinistrealachd. 6 Air seo choimeas e ministearan an lagha, agus an t‑soisgeil ri chèile, 12 agus dhearbh e gu robh a mhinistrealachd‐san ro òirdheirc.

¹ An tòisich sinn a‑rìs air sinn fhèin a mholadh? No a bheil feum againn, mar aig dream àraidh, air litrichean molaidh dur n‑ionnsaigh‐se, no air litrichean molaidh uaibh?

² Is sibhse ar litir‐ne a tha sgrìobhte nar cridheachan, air a h‑aithneachadh agus air a leughadh leis na h‑uile dhaoine:

³ Air dha a bhith follaiseach gur sibh litir Chrìosd, a fhrithealadh leinne, a tha air a sgrìobhadh chan ann le dubh, ach le Spiorad an Dè bheò; chan ann air clàir cloiche, ach air clàir feòil a’ chridhe.

⁴ Agus tha a leithid seo de dhòchas againn tre Chrìosd a‑thaobh Dhè:

⁵ Chan e gu bheil sinn foghainteach uainn fhèin a‑chum nì sam bith a smaoineachadh mar uainn fhèin: ach is ann o Dhia a tha ar foghainteachd;

⁶ A rinn sinne mar an ceudna nar ministearan foghainteach an tiomnaidh nuaidh; chan ann den litir, ach den Spiorad: oir marbhaidh an litir, ach bheir an Spiorad beatha.

⁷ Ach ma bha ministrealachd a’ bhàis ann an sgrìobhadh air a ghearradh air clachan, glòrmhor, ionnas nach b’urrainn clann Israeil amharc gu geur air gnùis Mhaois, airson glòir a ghnùise, a chuireadh air cùl;

⁸ Cionnas nach mò na sin a bhios ministrealachd an Spioraid glòrmhor?

⁹ Oir ma bha ministrealachd an dìtidh glòrmhor, is ro‑mhò na sin a bheir ministrealachd na fìreantachd barrachd ann an glòir.

¹⁰ Oir eadhon an nì a rinneadh glòrmhor, cha robh glòir sam bith aige anns a’ chàs seo, a‑thaobh na glòire a tha a’ toirt barrachd.

¹¹ Oir ma bha an nì a chuireadh air cùl glòrmhor, is ro‑mhò na sin a tha an nì a bhuanaicheas glòrmhor.

¹² Uime sin do bhrìgh gu bheil againn a shamhail seo de dhòchas, tha sinn a’ cleachdadh mòr‐dhànachd cainnte:

¹³ Agus chan eil sinn mar a bha Maois, a chuir còmhdach air a aghaidh, a‑chum nach amhairceadh clann Israeil gu geur gu crìch an nì a chuireadh air cùl.

¹⁴ Ach dhalladh an inntinnean: oir gus an là‑an‑diugh ann an leughadh an t‑seann tiomnaidh, tha an còmhdach ceudna a’ fantainn gun atharrachadh, nì a chuireadh air cùl ann an Crìosd.

¹⁵ Ach eadhon gus an là‑an‑diugh, nuair a leughar Maois, tha an còmhdach air an cridhe.

¹⁶ Gidheadh nuair a thilleas e a‑chum an Tighearna, togar an còmhdach dheth.

¹⁷ A‑nis is e an Tighearna an Spiorad sin: agus far a bheil Spiorad an Tighearna, tha saorsa an sin.

¹⁸ Ach air bhith dhuinne uile, le aghaidh gun chòmhdach, ag amharc mar ann an sgàthan air glòir an Tighearna, tha sinn air ar n‑atharrachadh a‑chum na h‑ìomhaigh cheudna, o ghlòir gu glòir, mar le Spiorad an Tighearna.