1 Timòteus 1 - Am Bìoball Iomraidh Gàidhlig 1880 1992

1 Tha an t‑òrdagh a thugadh do Thimòteus an uair a chaidh Pòl do Mhacedonia, air a chur an cuimhne dha. 5 Mu thimcheall feum dligheach an lagha. 11 Agus gairm Phòil gu bhith na abstol; 20 agus mu thimcheall Himenèuis agus Alecsander.

¹ Pòl, abstol Iosa Crìosd, a rèir àithne Dhè ar Slànaighear, agus an Tighearna Iosa Crìosd, neach as e ar dòchas;

² A‑chum Thimòteuis, m’fhìor mhac anns a’ chreideamh: gràs, tròcair, agus sìth o Dhia ar n‑Athair, agus o Iosa Crìosd ar Tighearna.

³ Mar a dh’iarr mi ort fantainn ann an Ephesus, nuair a chaidh mi do Mhacedònia, a‑chum gun tugadh tu òrdagh do dhream àraidh gun atharrachadh teagaisg a thoirt uapa;

⁴ Agus gun aire a thoirt do sgeulachdan, agus do shloinnteireachd gun chrìoch, a bheir adhbhar do cheistean, nas mò na do fhòghlam diadhaidh, a tha tre chreideamh: dèan mar sin.

⁵ A‑nis is e as crìoch don àithne, gràdh à cridhe glan, agus à cogais mhaith, agus à creideamh neo‐chealgach:

⁶ Nithean air do dhream àraidh claonadh uapa, chaidh iad a thaobh a‑chum dìomhanas cainnte;

⁷ A’ miannachadh a bhith nan luchd‐teagaisg an lagha agus gun iad a’ tuigsinn ciod a tha iad ag ràdh, no ciod iad mum bheil iad a’ toirt cinnte.

⁸ Ach tha fhios againn gu bheil an lagh math, ma ghnàthaicheas neach gu dligheach e:

⁹ Air do fhios seo a bhith aige, nach ann do dhuine fìreanach a dh’òrdaicheadh an lagh, ach do dhaoine neo‐dhligheach agus eas‐umhail, dhaibh‐san a tha mì‑dhiadhaidh, agus do pheacaich, do dhaoine mì‑naomha agus neo‐chràbhach, do luchd‐marbhaidh athraichean agus do luchd‐marbhaidh mhàthraichean, do luchd‐mortaidh,

¹⁰ Do luchd‐strìopachais, do luchd‐ana‑miannan mì‑nàdarra, do luchd‐goid dhaoine, do bhreugairean, do luchd‐eithich, agus ma tha nì sam bith eile a tha an aghaidh teagaisg fhallain,

¹¹ A rèir soisgeul glòrmhor an Dè bheannaichte, a dh’earbadh riumsa.

¹² Agus tha mi a’ toirt buidheachais do Iosa Crìosd ar Tighearna, a neartaich mi, do bhrìgh gun do mheas e mi dìleas, gam chur anns a’ mhinistrealachd;

¹³ A bha roimhe am fhear‐labhairt toibheim, agus am fhear geur‐leanmhainn, agus am dhuine eucorach. Ach fhuair mi tròcair, do bhrìgh gun do rinn mi seo tre aineolas, ann am mì‑chreideamh:

¹⁴ Agus bha gràs ar Tighearna thar tomhas ro‑phailt dhomh, maille ri creideamh, agus ri gràdh a tha ann an Iosa Crìosd.

¹⁵ Is fìor an ràdh seo, agus is airidh e air gach aon chor air gabhail ris, gun tàinig Iosa Crìosd don t‑saoghal a thèarnadh pheacach, dem mise an ciad‐fhear.

¹⁶ Gidheadh, air a shon seo fhuair mi tròcair, a‑chum gum foillsicheadh Crìosd annamsa air tùs an uile fhad‐fhulangas, mar eisempleir dhaibhsan a chreideadh ann, an dèidh seo, a‑chum na beatha maireannaich.

¹⁷ A‑nis don Rìgh shìorraidh, neo‐thruaillidh, neo‐fhaicsinneach, do Dhia a tha a‑mhàin glic, gu robh urram agus glòir, gu saoghal nan saoghal. Amen.

¹⁸ An àithne seo tha mi ag earbsa riut, a Thimòteuis, a mhic, a rèir na fàidheadaireachd a rinneadh umad roimhe seo, a‑chum trìdsan gun cogadh tu deagh chogadh;

¹⁹ A’ coimhead creidimh agus deagh chogais; nì, air do chuid de dhaoine a chur uapa, rinn iad long‐bhriseadh a‑thaobh a’ chreidimh.

²⁰ Dem bheil Himenèus agus Alecsander; muinntir a thug mise thairis do Shàtan, a‑chum len smachdachadh gum fòghlamadh iad gun toibheum a labhairt.