1 Samuel 5 - Am Bìoball Iomraidh Gàidhlig 1880 1992

1 Chuir na Philistich àirc Dhè ann an taigh Dhàgoin ann an Asdod. 6 Bhuail an Tighearna muinntir Asdoid le neasgaidean fala. 8 Thug na Philistich àirc Dhè gu Gat, agus à sin gu Ecron.

¹ Agus ghabh na Philistich àirc Dhè, agus thug iad leo i o Eben‐eser gu Asdod.

² An sin ghabh na Philistich àirc Dhè, agus thug iad i do thaigh Dhàgoin, agus shuidhich iad i làimh ri Dàgon.

³ Agus nuair a dh’èirich muinntir Asdoid gu moch air an là màireach, feuch, bha Dàgon air tuiteam air a aghaidh a dh’ionnsaigh an làir fa chomhair àirc an Tighearna: agus ghabh iad Dàgon, agus chuir iad a‑rìs e na àite fhèin.

⁴ Agus nuair a dh’èirich iad gu moch anns a’ mhadainn air an là màireach, feuch, bha Dàgon air tuiteam air a aghaidh a dh’ionnsaigh an làir fa chomhair àirc an Tighearna: agus bha ceann Dhàgoin, agus dà bhois a làmh air an gearradh dheth aig an stairsnich: dh’fhàgadh a‑mhàin com Dhàgoin aige.

⁵ Uime sin cha saltair sagartan Dhàgoin, no neach air bith a thèid a‑steach do thaigh Dhàgoin, air stairsnich Dhàgoin ann an Asdod gus an là‑an‑diugh.

⁶ Ach bha làmh an Tighearna trom air muinntir Asdoid, agus sgrios e iad, agus bhuail e iad le neasgaidean fala, eadhon Asdod agus a chrìochan.

⁷ Agus nuair a chunnaic daoine Asdoid gu robh e mar sin, thubhairt iad, Chan fhan àirc Dia Israeil maille rinne; oir tha a làmh trom oirnn agus air Dàgon ar Dia.

⁸ Uime sin chuir iad fios uapa, agus chruinnich iad uile thighearnan nam Philisteach dan ionnsaigh, agus thubhairt iad, Ciod a nì sinn ri àirc Dia Israeil? Agus fhreagair iadsan, Thugar àirc Dia Israeil mun cuairt gu Gat. Agus thug iad mun cuairt àirc Dia Israeil gu Gat.

⁹ Agus nuair a thug iad mun cuairt i, bha làmh an Tighearna an aghaidh a’ bhaile le sgrios ro‑mhòr, agus bha neasgaidean fala aca nan àitean diamhair.

¹⁰ Uime sin chuir iad air falbh àirc Dhè gu Ecron; agus nuair a bha àirc Dhè air teachd gu Ecron, dh’èigh na h‑Ecronaich, ag ràdh, Thug iad mun cuairt dar n‑ionnsaigh‐ne àirc Dia Israeil gu sinn fhèin a mharbhadh agus ar sluagh.

¹¹ Uime sin chuir iad fios uapa, agus chruinnich iad uile thighearnan nam Philisteach, agus thubhairt iad, Cuiribh air falbh àirc Dia Israeil, agus rachadh i air a h‑ais da h‑àite fhèin, a‑chum nach marbh i sinn fhèin agus ar sluagh: oir bha sgrios bàis anns a’ bhaile uile; bha làmh Dhè ro‑throm an sin.

¹² Agus na daoine nach do bhàsaich bhuaileadh iad le neasgaidean fala; agus chaidh èigheach a’ bhaile suas gu nèamh.