1 Eachdraidh 11 - Am Bìoball Iomraidh Gàidhlig 1880 1992

1 Rinneadh Daibhidh na rìgh air Israel aig Hebron. 5 Ghlac e tùr Shioin. 10 Àireamh a dhaoine treuna.

¹ An sin chruinnich Israel uile iad fhèin a dh’ionnsaigh Dhaibhidh gu Hebron, ag ràdh, Feuch is sinne do chnàimh agus d’fheòil.

² Agus a bhàrr air seo, anns an ùine a chaidh seachad, eadhon nuair a bha Saul na rìgh, bu tusa a threòraich a‑mach agus a thug a‑steach Israel; agus thubhairt an Tighearna do Dhia riut, Beathaichidh tusa mo shluagh Israel, agus bithidh tu ad cheannard air mo shluagh Israel.

³ Agus thàinig uile sheanairean Israeil a dh’ionnsaigh an rìgh gu Hebron; agus rinn Daibhidh coicheangal riu ann an Hebron am fianais an Tighearna: agus dh’ung iad Daibhidh na rìgh air Israel, a rèir facal an Tighearna, le làimh Shamueil.

⁴ Agus chaidh Daibhidh agus Israel uile gu Ierusalem (is e sin Iebus), far an robh na h‑Iebusaich, luchd‐àiteachaidh an fhearainn.

⁵ Agus thubhairt luchd‐àiteachaidh Iebuis ri Daibhidh, Cha tig thu an seo. Gidheadh, ghlac Daibhidh tùr Shioin; is e sin baile Dhaibhidh.

⁶ Agus thubhairt Daibhidh, Ge bè a bhuaileas na h‑Iebusaich an toiseach, bidh esan na cheannard agus na uachdaran. Agus chaidh Ioab, mac Sheruiah, suas an toiseach, agus bha e na cheannard.

⁷ Agus ghabh Daibhidh còmhnaidh anns an tùr; uime sin thug iad baile Dhaibhidh mar ainm air.

⁸ Agus thog e am baile mun cuairt, eadhon o Mhilo mun cuairt: agus chuir Ioab suas a‑rìs a’ chuid eile den bhaile.

⁹ Agus dh’fhàs Daibhidh na bu mhò, agus na bu mhò; oir bha Tighearna nan sluagh leis.

¹⁰ Agus is iad seo rogha nan daoine treuna a bha aig Daibhidh, a neartaich iad fhèin leis na rìoghachd, agus le Israel uile, gu rìgh a dhèanamh dheth, a rèir facal an Tighearna mu thimcheall Israeil.

¹¹ Agus is e seo àireamh nan daoine treuna a bha aig Daibhidh; Iasobeam, mac Hachmoni, na cheann air triùir: thog esan a shleagh an aghaidh trì cheud, a mharbhadh leis anns an aon àm.

¹² Agus na dhèidh‐san bha Eleàsar, mac Dhodo, an t‑Ahohach: b’aon esan de na trì gaisgich.

¹³ Bha esan maille ri Daibhidh ann am Pas‐damim, agus an sin bha na Philistich air cruinneachadh an ceann a chèile gu cath; far an robh dail fhearainn làn eòrna; agus theich an sluagh ro na Philistich.

¹⁴ Agus shuidhich iadsan iad fhèin am meadhon na dalach sin, agus dhìon iad i, agus mharbh iad na Philistich: agus shaor an Tighearna iad le saorsa mhòir.

¹⁵ A‑nis chaidh triùir de na deich‐ceannardan‐fichead sìos don charraig a dh’ionnsaigh Dhaibhidh, gu uaimh Adullaim: agus champaich feachd nam Philisteach ann an gleann Rephaim.

¹⁶ Agus bha Daibhidh an sin anns an daingneach; agus bha freiceadan nam Philisteach an sin ann am Betlehem.

¹⁷ Agus mhiannaich Daibhidh, agus thubhairt e, O nach tugadh neach dhomh deoch uisge o thobar Bhetlehem, a tha aig a’ gheata!

¹⁸ Agus bhris an triùir tro fheachd nam Philisteach, agus tharraing iad uisge à tobar Bhetlehem a bha aig a’ gheata agus ghabh iad e, agus thug iad e gu Daibhidh: ach chan òladh Daibhidh e, ach thaom e a‑mach e don Tighearna.

¹⁹ Agus thubhairt e, Nar leigeadh mo Dhia dhomh gun dèanainn an nì seo: an òlainn‐sa fuil nan daoine seo a chuir an anaman ann an cunnart? Oir le cunnart an anaman thug iad leo e: uime sin chan òladh e dheth. Na nithean sin rinn an triùir dhaoine treuna.

²⁰ Agus bha Abisai, bràthair Ioaib, na cheann air triùir: agus thog e a shleagh an aghaidh trì cheud, a mharbh e; agus bha ainm aige am measg thriùir.

²¹ Den triùir b’e a b’urramaiche na an dithis, agus bha e na cheannard orra: gidheadh, cha do ràinig e gu ruig a’ chiad triùir.

²² Mharbh Benaiah, mac Iehoiada, mac duine gaisgeil o Chabseel, a rinn mòran ghnìomharan, mharbh esan dithis fhear leòmhannta de Mhòab: chaidh e sìos mar an ceudna, agus mharbh e leòmhann ann am meadhon sluic air là sneachda.

²³ Agus mharbh e Eiphiteach, duine de mheudachd mhòir, còig làmhan‐coille air àirde; agus ann an làimh an Eiphitich bha sleagh cosmhail ri garman figheadair: ach chaidh esan sìos da ionnsaigh le luirg, agus spìon e an t‑sleagh à làimh an Eiphitich, agus mharbh e le a shleagh fhèin e.

²⁴ Na nithean sin rinn Benaiah mac Iehoiada, agus bha ainm aige am measg triùir dhaoine treuna.

²⁵ Feuch, den triùir b’e a b’urramaiche, ach cha do ràinig e gu ruig a’ chiad triùir: agus chuir Daibhidh e os cionn a fhreiceadain.

²⁶ Mar an ceudna b’iad daoine treuna nan armailt, Asahel bràthair Ioaib, Elhanan mac Dhodo o Bhetlehem,

²⁷ Samot an Harorach, Heles am Pelonach,

²⁸ Ira mac Iceis an Tecoach, Abieser an t‑Anatotach,

²⁹ Sibecai an Husatach, Ilai an t‑Ahohach,

³⁰ Maharari an Netophatach, Heled mac Bhaanah an Netophatach,

³¹ Itai mac Ribai o Ghibeah chloinn Bheniàmin, Benaiah am Piratonach,

³² Hurai o shruthan Ghaais, Abiel an t‑Arbatach,

³³ Asmabhet am Baharumach, Eliabha an Saalbonach.

³⁴ Mic Haseim an Gisonach: Ionatan mac Shage an Hararach,

³⁵ Ahiam mac Shacair an Hararach, Eliphal mac Uir,

³⁶ Hepher am Mecheratach, Ahiah am Pelonach,

³⁷ Hesro an Carmeleach, Naarai mac Esbai,

³⁸ Ioel bràthair Nàtain, Mibchar mac Hageri,

³⁹ Selec an t‑Amonach, Naharai am Berotach, fear‐iomchair arm Ioaib mhic Sheruiah,

⁴⁰ Ira an t‑Itreach, Gareb, an t‑Itreach,

⁴¹ Uriah an Hiteach, Sabad mac Ahlai,

⁴² Adina mac Shisa an Reubeneach, ceannard de na Reubenich, agus deich‐ar‑fhichead maille ris,

⁴³ Hanan mac Mhaacah, agus Iosaphat am Mitneach,

⁴⁴ Udsia an t‑Asteratach, Sama agus Iehiel mic Hotaim an t‑Aroerach,

⁴⁵ Iediael mac Shimri, agus Ioha a bhràthair an Tidseach,

⁴⁶ Eliel am Mahabhach, agus Ieribai agus Iosabhiah mic Elnaaim, agus Itmah am Mòabach,

⁴⁷ Eliel, agus Obed, agus Iasiel o Mhesobia.