1 Corintianach 6 - Am Bìoball Iomraidh Gàidhlig 1880 1992

1 Chan fhaod na Corintianaich dragh a chur air am bràithrean len agairt a‑chum lagha, 6 gu h‑àraidh an làthair nan ana‑creidmheach. 9 Cha sealbhaich na neo‐fhìreanaich rìoghachd Dhè. 15 Is iad ar cuirp buill Chrìosd, 19 agus teampaill an Spioraid Naoimh; 16 uime sin chan fhaodar an truailleadh.

¹ A bheil a chridhe aig aon neach agaibh, aig a bheil cùis an aghaidh duine eile, dol fo bhreitheanas nan daoine eucorach, agus chan ann fo bhreitheanas nan naomh?

² Nach eil fhios agaibh gun toir na naoimh breith air an t‑saoghal? Agus ma bheirear breith air an t‑saoghal leibhse, an e nach fiù sibh a bhith nur britheamhan air na cùisean as lugha?

³ Nach eil fhios agaibh gun toir sinne breith air ainglean? Cia mò na sin air nithean a bhuineas don bheatha seo?

⁴ Uime sin ma tha breitheanais agaibh mu thimcheall nan nithean sin a bhuineas don bheatha seo, cuiribh nan suidhe a‑chum breitheanais an dream as lugha meas anns an eaglais.

⁵ A‑chum ur nàire tha mi a’ labhairt. An ann mar sin nach eil aon duine glic nur measg? Nach eil fiù a h‑aon as urrainn breith a thoirt eadar a bhràithrean?

⁶ Ach tha bràthair a’ dol gu lagh ri bràthair, agus seo an làthair nan ana‑creidmheach.

⁷ A‑nis uime sin tha gu cinnteach lochd nur measg, do bhrìgh gu bheil sibh a’ dol gu lagh ri chèile: carson nach fheàrr leibh eucoir fhulang? Carson nach fheàrr leibh calldach a ghabhail?

⁸ Gidheadh tha sibh a’ dèanamh eucoir agus dìobhail, agus sin air ur bràithrean.

⁹ Nach eil fhios agaibh nach sealbhaich luchd‐dèanamh na h‑eucoir rìoghachd Dhè? Na meallar sibh: cha sealbhaich luchd‐strìopachais, no luchd‐iodhal‐adhraidh, no luchd‐adhaltranais, no luchd‐macnais, no na daoine a tha ciontach de neò‐ghlaine mhì‐nàdurra,

¹⁰ No gadaichean, no daoine sanntach, no misgeirean, no luchd‐ana‐cainnt, no luchd‐fòirneirt, rìoghachd Dhè.

¹¹ Agus mar seo bha cuid dhibhse: ach tha sibh air ur n‑ionnlad; ach tha sibh air ur naomhachadh; ach tha sibh air ur fìreanachadh ann an ainm an Tighearna Iosa, agus tre Spiorad ar Dè‑ne.

¹² Tha na h‑uile nithean ceadaichte dhòmhsa, ach chan eil na h‑uile nithean iomchaidh; tha na h‑uile nithean ceadaichte dhomh, ach cha chuirear mi fo chumhachd nì sam bith.

¹³ Tha am biadh airson na bronn, agus a’ bhrù airson a’ bhìdh: ach sgriosaidh Dia araon seo agus siud. A‑nis chan ann airson neòghlaine tha an corp, ach airson an Tighearna: agus an Tighearna airson a’ chuirp.

¹⁴ Agus thog Dia araon an Tighearna suas, agus togaidh e sinne suas tre a chumhachd fhèin mar an ceudna.

¹⁵ Nach eil fhios agaibh gur iad ur cuirp buill Chrìosd? Uime sin an gabh mise buill Chrìosd, agus an dèan mi buill strìopaich dhiubh? Nar leigeadh Dia.

¹⁶ An e nach eil fhios agaibh, an tì sin a tha ceangailte ri strìopaich, gur aon chorp rithe e? Oir (tha e ag ràdh), bidh dithis nan aon fheòil.

¹⁷ Ach an tì a tha ceangailte ris an Tighearna, is aon spiorad ris e.

¹⁸ Teichibh o strìopachas. Tha gach aon pheacadh a nì duine an leth a‑muigh den chorp: ach an tì a nì strìopachas, tha e a’ peacachadh an aghaibh a chuirp fhèin.

¹⁹ An e nach eil fhios agaibh gur e ur corp teampall an Spioraid Naoimh a tha annaibh, a tha agaibh o Dhia, agus cha leibh fhèin sibh?

²⁰ Oir cheannaicheadh le luach sibh: uime sin thugaibh glòir do Dhia le ur corp, agus le ur spiorad, as le Dia.