1 Corintianach 16 - Am Bìoball Iomraidh Gàidhlig 1880 1992

1 Ghuidh Pòl air na Corintianaich fuasgladh air uireasbhaidh nam bràithrean bochda ann an Ierusalem. 10 Mhol e Timòteus; 13 agus an dèidh chomhairlean càirdeil, 19 chrìochnaich e an litir le iomadh fàilte.

¹ A‑nis a‑thaobh an tionail airson nan naomh, mar a dh’òrdaich mi do eaglaisean Ghalàtia, mar sin dèanaibh‐se mar an ceudna.

² Air ciad là gach seachdain, cuireadh gach aon agaibh nì air leth anns an ionmhas a‑chum nach bi tional ri dhèanamh nuair a thig mise.

³ Agus nuair a thig mi, cò air bith iad a mholas sibh le ur litrichean, cuiridh mi iadsan a ghiùlan ur tabhartasan gu Ierusalem.

⁴ Agus mas iomchaidh mise a dhol mar an ceudna, thèid iadsan am chuideachd.

⁵ Agus thig mi dur n‑ionnsaigh‐se, nuair a thèid mi tro Mhacedònia (oir tha mi a’ dol tro Mhacedònia:)

⁶ Agus faodaidh e a bhith gum fan mi, no eadhon gun caith mi an geamhradh maille ribh, a‑chum gun toir sibh air m’aghaidh mi, ge bè àite don tèid mi.

⁷ Oir chan àill leam ur faicinn a‑nis anns an dol seachad; ach tha dùil agam fantainn rè tamaill maille ribh, ma leigeas an Tighearna dhomh.

⁸ Ach fanaidh mi ann an Ephesus gu Caingis.

⁹ Oir dh’fhosgladh doras mòr agus èifeachdach dhomh, agus tha mòran eascairdean ann.

¹⁰ A‑nis ma thig Timòteus, feuchaibh gum bi e gun eagal maille ribh: oir tha e a’ saothrachadh ann an obair an Tighearna, mar a tha mise.

¹¹ Uime sin na dèanadh neach sam bith tàir air: ach thugaibh air aghaidh e ann an sìth, a‑chum gun tig e am ionnsaigh‐sa: oir tha sùil agam ris maille ris na bràithrean.

¹² Mu thimcheall ar bràthar Apollos, ghuidh mi gu dùrachdach air teachd dur n‑ionnsaigh‐se maille ris na bràithrean: ach cha b’i a thoil air chor sam bith teachd aig an àm seo; ach thig e nuair a gheibh e àm iomchaidh.

¹³ Dèanaibh faire, seasaibh gu daingeann anns a’ chreideamh, bithibh fearail, bithibh làidir.

¹⁴ Biodh ur n‑uile nithean air an dèanamh le gràdh.

¹⁵ Agus guidheam oirbh, a bhràithrean (o is aithne dhuibh teaghlach Stephanuis, gur iad ciad‐thoradh Achaia, agus gun tug iad iad fhèin a‑chum frithealaidh do na naoimh),

¹⁶ Gum bi sibh umhail dan leithidean sin, agus do gach aon a nì obair agus saothair maille rinne.

¹⁷ Tha mi subhach ri teachd Stephanuis, agus Fhortunatuis, agus Achaicuis: oir rinn iad suas an nì sin a bha a dh’uireasbhaidh dur taobh‐se.

¹⁸ Oir thug iad suaimhneas dom spiorad‐sa, agus dur spiorad‐se: uime sin biodh meas agaibh air an leithidean sin.

¹⁹ Tha eaglaisean na h‑Asia a’ cur fàilte oirbh. Tha Acuila agus Priscila, maille ris an eaglais a tha nan taigh, a’ cur mòr‐fhàilte oirbh anns an Tighearna.

²⁰ Tha na bràithrean uile a’ cur fàilte oirbh. Cuiribh‐se fàilte air a chèile le pòig naoimh.

²¹ Fàilte uamsa Pòl lem làimh fhèin.

²² Ma tha neach sam bith nach gràdhaich an Tighearna Iosa Crìosd, biodh e na Anatèma, Maranàta.

²³ Gu robh gràs an Tighearna Iosa Crìosd maille ribh.

²⁴ Mo ghràdh‐sa maille ribh uile ann an Iosa Crìosd. Amen.