Sechariah 7 - Am Bìoball Gàidhlig 1992

¹ Agus thàrladh ann an ceathramh bliadhna Dhariuis gun tàinig facal an Tighearna gu Sechariah, air a’ cheathramh là den naoidheamh mìos, eadhon Chisleu.

² (Nuair a chuir iad gu taigh Dhè, Seresar agus Regemelech, agus an daoine a dh’fhiosrachadh an làthair an Tighearna;

³ A labhairt ris na sagartan a bha ann an taigh Tighearna nan sluagh, agus ris na fàidhean, ag ràdh, An dèan mi gul anns a’ chòigeamh mìos, gam dhealachadh fhèin, mar a rinn mi an iomadh bliadhna seo?)

⁴ An sin thàinig facal Tighearna nan sluagh am ionnsaigh-sa, ag ràdh,

⁵ Labhair ri uile shluagh an fhearainn, agus ris na sagartan, ag ràdh, Nuair a thraisg agus a ghuil sibh anns a’ chòigeamh agus anns an t‑seachdamh mìos, eadhon na deich agus trì-fichead bliadhna seo, an do thraisg sibh idir air mo shon-sa, eadhon air mo shon-sa?

⁶ Agus nuair a dh’ith sibh, agus nuair a dh’òl sibh, nach d’ith sibh air ur son fhèin, agus nach d’òl sibh air ur son fhèin?

⁷ Nach iad seo na briathran a dh’èigh an Tighearna leis na ciad fhàidhean, nuair a bha Ierusalem air a h‑àiteachadh, agus a’ soirbheachadh, agus a bailtean mun cuairt dhi; agus an taobh deas agus an còmhnard air an àiteachadh?

⁸ An sin thàinig facal an Tighearna gu Sechariah, ag ràdh,

⁹ Mar seo labhair Tighearna nan sluagh, ag ràdh, Cuiribh an gnìomh ceart-bhreitheanas, agus nochdaibh tròcair agus iochd, gach duine da bhràthair:

¹⁰ Agus na sàraichibh a’ bhantrach, no an dìlleachdan, an coigreach, no am bochd; agus na smaoinicheadh neach air bith agaibh nur cridhe olc an aghaidh a bhràthar.

¹¹ Ach dhiùlt iadsan èisdeachd, agus tharraing iad a’ ghuala on chuing, agus dhruid iad an cluasan, a‑chum nach cluinneadh iad.

¹² Seadh, rinn iad an cridheachan mar chloich adamaint, mun cluinneadh iad an lagh, agus na briathran a chuir Tighearna nan sluagh le a spiorad, leis na fàidhean roimhe seo: air an adhbhar sin, thàinig corraich mhòr o Thighearna nan sluagh.

¹³ Agus thachair amhail a ghlaodh mise, agus nach d’èisd iadsan; mar sin ghlaodh iadsan, agus cha d’èisd mise, deir Tighearna nan sluagh.

¹⁴ Ach sgap mi iad le cuairt-ghaoith, am measg nan uile chinneach nach b’aithne dhaibh: agus bha am fearann fàs nan dèidh, air chor is nach do shiubhail neach air bith troimhe, air ais no air aghaidh: agus rinn iad an tìr thaitneach na fàsach.