Sechariah 3 - Am Bìoball Gàidhlig 1992

¹ Agus thaisbein e dhomh Iosuah an t‑àrd-shagart, na sheasamh an làthair aingeal an Tighearna; agus Sàtan na sheasamh aig a làimh dheis, gu cur na aghaidh.

² Agus thubhairt an Tighearna ri Sàtan, Gun dèanadh an Tighearna do chronachadh, O Shàtain; gun dèanadh eadhon an Tighearna a roghnaich Ierusalem, do chronachadh: nach aithinne e seo, air a spìonadh as an teine?

³ A‑nis bha Iosuah air èideadh le aodach salach, agus sheas e an làthair an aingeil.

⁴ Agus fhreagair esan, agus labhair e riùsan a sheas na làthair, ag ràdh, Thugaibh dheth an t‑aodach salach. Agus ris-san thubhairt e, Feuch, thug mi air d’aingidheachd imeachd uat, agus èididh mi thu le culaidh mhaisich.

⁵ Agus thubhairt e, Cuireadh iad ceann-aodach maiseach air a cheann: agus chuir iad ceann-aodach maiseach air a cheann, agus dh’èid iad e le fallaingean; agus sheas aingeal an Tighearna leo.

⁶ Agus dhearbh aingeal an Tighearna do Iosuah, ag ràdh,

⁷ Mar seo tha Tighearna nan sluagh ag ràdh, Ma ghluaiseas tu ann am shlighean-sa, agus ma choimheadas tu mo reachd, an sin bheir thu mar an ceudna breith air mo thaigh, agus gleidhidh tu fòs mo chùirtean; agus bheir mi dhut àiteachan-coiseachd am measg na muinntir seo nan seasamh leat.

⁸ Eisd a‑nis, O Iosuah, àrd-shagairt, thu fhèin agus do chompanaich a tha nan suidhe ad làthair: oir is daoine a tha nan samhladh iad: oir feuch, bheir mise a‑mach m’òglach, am Meangan.

⁹ Oir feuch, a’ chlach a leag mise fa chomhair Iosuah: air aon chloich tha seachd sùilean. Feuch, gearraidh mise a gearradh, tha Tighearna nan sluagh ag ràdh, agus atharraichidh mi aingidheachd an fhearainn seo ann an aon là.

¹⁰ Anns an là sin, tha Tighearna nan sluagh ag ràdh, gairmidh sibh gach fear a choimhearsnach fon fhìonain, agus fon chrann-fhìge.