Sechariah 12 - Am Bìoball Gàidhlig 1992

¹ Fàistneachd facal an Tighearna. A‑thaobh Israeil, tha an Tighearna ag ràdh, a tha a’ sgaoileadh a‑mach nan nèamh, agus a’ suidheachadh stèidh na talmhainn, agus a’ cruthachadh spiorad duine an taobh a‑staigh dheth:

² Feuch, nì mise Ierusalem na cupan ball-chrith do na slòigh uile mun cuairt: airson Iùdah mar an ceudna bidh e anns an fheachd an aghaidh Ierusaleim.

³ Agus anns an là sin nì mi Ierusalem na cloich chudthromaich do na slòigh uile; na h‑uile a ghabhas i mar uallach orra fhèin, gearrar iad nam bloighdean: agus na h‑aghaidh bidh uile chinnich an domhain air an cruinneachadh ri chèile.

⁴ Anns an là sin, tha an Tighearna ag ràdh, buailidh mise gach each le uamhas, agus a mharcaich le cuthach; agus fosglaidh mi mo shùilean air taigh Iùdah, agus gach aon each aig na slòigh buailidh mi le doille.

⁵ Agus their uachdarain Iùdah nan cridhe, Is iad luchd-àiteachaidh Ierusaleim mo neart ann an Tighearna nan sluagh, an Dia.

⁶ Anns an là sin nì mise uachdarain Iùdah mar theallach teine am measg connaidh, agus mar leus teine ann an sguaib; agus loisgidh iad, air an làimh dheis, agus air an làimh chlì, na slòigh uile mun cuairt: agus àitichear Ierusalem a‑rìs, na h‑ionad fhèin, ann an Ierusalem.

⁷ Saoraidh an Tighearna fòs pàilleanan Iùdah, mar o shean; mun dèan glòir taigh Dhaibhidh, no glòir luchd-àiteachaidh Ierusaleim, iad fhèin àrdachadh an aghaidh Iùdah.

⁸ Anns an là sin dìonaidh an Tighearna luchd-àiteachaidh Ierusaleim; agus bidh esan a tha lag nam measg anns an là sin mar Dhaibhidh; agus taigh Dhaibhidh mar Dhia, mar aingeal an Tighearna nan làthair.

⁹ Agus tàrlaidh anns an là sin gun iarr mise na h‑uile chinnich a thig an aghaidh Ierusaleim a mhilleadh.

¹⁰ Agus dòirtidh mi air taigh Dhaibhidh, agus air luchd-àiteachaidh Ierusaleim, spiorad nan gràs agus nan athchuingean, agus amhaircidh iad airsan a lot iad, agus nì iad caoidh air a shon, mar a chaoidheas duine airson a aon mhic: agus bidh an doilgheas air a shon mar dhoilgheas airson ciad-ghin.

¹¹ Anns an là sin bidh cumha mhòr ann an Ierusalem, cosmhail ri cumha Hadadrimoin, ann an gleann Mhegidoin.

¹² Agus nì am fearann caoidh, gach aon teaghlach air leth, agus am mnathan air leth: teaghlach taigh Nàtain air leth, agus am mnathan air leth:

¹³ Teaghlach taigh Lèbhi air leth, agus am mnathan air leth: teaghlach Shimei air leth, agus am mnathan air leth:

¹⁴ Na h‑uile theaghlaichean eile, gach teaghlach air leth, agus am mnathan air leth.