Sechariah 1 - Am Bìoball Gàidhlig 1992

¹ Anns an ochdamh mìos, ann an dara bliadhna Dhariuis, thàinig facal an Tighearna gu Sechariah mac Bharachiah, mhic Ido, am fàidh, ag ràdh,

² Bha corraich ro‑mhòr air an Tighearna ri ur n‑athraichean:

³ Agus abair thusa riu, Mar seo tha Tighearna nan sluagh ag ràdh, Tillibh-se riumsa, tha Tighearna nan sluagh ag ràdh; agus tillidh mise ribhse, deir Tighearna nan sluagh.

⁴ Na bithibh mar ur n‑athraichean, ris an do ghlaodh na fàidhean a bha ann roimhe seo, ag ràdh, Mar seo tha Tighearna nan sluagh ag ràdh, Tillibh-se a‑nis o ur droch shlighean, agus o ur droch dhèanadais. Ach cha d’èisd iad, cha mhò a thug iad aire dhòmhsa, deir an Tighearna.

⁵ Ur n‑athraichean, càit a bheil iad? Agus na fàidhean, am mair iad beò am feasd?

⁶ Ach mo bhriathran-sa, agus mo reachdan, a dh’àithn mi dom òglaich na fàidhean, nach do rinn iad greim air ur n‑athraichean? Agus nach dubhairt iad, Amhail mar a shaoil Tighearna nan sluagh a dhèanamh rinne, a rèir ar slighean, agus a rèir ar dèanadais, mar sin rinn e rinn.

⁷ Air a’ cheathramh-là‑fichead den aon-mhìos-deug (sin am mìos Sèbat), ann an dara bliadhna Dhariuis, thàinig facal an Tighearna gu Sechariah, mac Bharachiah, mhic Ido, am fàidh, ag ràdh,

⁸ Chunnaic mi anns an oidhche, agus feuch duine a’ marcachd air each ruadh, agus sheas e am measg nan craobhan-miortail a bha anns a’ ghleann, agus air a chùlaibh bha eich ruadha, bhreaca, agus bhàna.

⁹ An sin thubhairt mi, Ciod iad seo, O mo Thighearna? Agus thubhairt an t‑aingeal a labhair rium, Feuchaidh mise dhut ciod iad seo.

¹⁰ Agus fhreagair am fear a bha na sheasamh am measg nan craobhan miortail, agus thubhairt e, Seo iadsan a chuir an Tighearna gu siubhal sìos agus suas air feadh na talmhainn.

¹¹ Agus fhreagair iad aingeal an Tighearna, a sheas am measg nan craobhan miortail, agus thubhairt iad, Shiubhail sinne a‑nìos agus sìos air feadh na talmhainn; agus, feuch, tha an talamh uile na thàmh, agus a’ gabhail fois.

¹² An sin fhreagair aingeal an Tighearna, agus thubhairt e, O Thighearna nan sluagh, cia fhad a bhios tu gun tròcair a dhèanamh air Ierusalem, agus air bailtean Iùdah, ris a bheil thu ann an corraich a‑nis deich agus trì-fichead bliadhna?

¹³ Agus fhreagair an Tighearna an t‑aingeal a labhair riumsa, le briathran matha, le briathran sòlasach.

¹⁴ Mar sin thubhairt an t‑aingeal a bha a’ labhairt rium, Glaodh thusa, ag ràdh, Mar seo tha Tighearna nan sluagh ag ràdh, Tha mise eudmhor airson Ierusaleim, agus airson Shioin le eud mòr:

¹⁵ Agus tha mi ann an corraich ro‑mhòir ris na cinnich a tha suaimhneach; oir cha robh ormsa ach corraich bheag, agus chuidich iadsan air a h‑aghaidh an dòrainn.

¹⁶ Air an adhbhar sin mar seo tha an Tighearna ag ràdh, Thill mi ri Ierusalem le tròcairean: bidh mo thaigh air a thogail ann, tha Tighearna nan sluagh ag ràdh, agus bidh sreang-thomhais air a sgaoileadh a‑mach air Ierusalem.

¹⁷ Glaodh fhathast ag ràdh, Mar seo tha Tighearna nan sluagh ag ràdh, Bidh mo bhailtean-sa fhathast air an sgaoileadh a‑mach le soirbheachadh, agus bheir an Tighearna fhathast comhfhurtachd do Shion, agus roghnaichidh e fhathast Ierusalem.

¹⁸ An sin thog mi suas mo shùilean, agus chunnaic mi; agus feuch ceithir adhaircean.

¹⁹ Agus thubhairt mi ris an aingeal a bha a’ labhairt rium, Ciod iad seo? Agus fhreagair esan mi, Is iad seo na h‑adhaircean a sgap Iùdah, Israel, agus Ierusalem.

²⁰ Agus dh’fheuch an Tighearna dhomh ceithir fir-cheàirde.

²¹ An sin thubhairt mi, Ciod a thàinig iad seo gu a dhèanamh? Agus labhair esan, ag ràdh, Is iad seo na h‑adhaircean a sgap Iùdah, ionnas nach do thog aon duine suas a cheann: ach thàinig iad seo a‑chum eagal a chur orra, a thilgeadh a‑mach adhaircean nan cinneach a thog suas an adharc an aghaidh fearann Iùdah, a‑chum a sgapadh.