Salm 96 - Am Bìoball Gàidhlig 1992

¹ Canaibh don Tighearna laoidh nuadh; canaibh don Tighearna, a thìrean uile.

² Canaibh don Tighearna, beannaichibh a ainm; foillsichibh o là gu là a shlàinte.

³ Cuiribh an cèill am measg nan cinneach a ghlòir, am measg gach sluaigh a iongantasan-san.

⁴ Oir is mòr an Tighearna, agus is ro‑airidh e air cliù; is adhbhar eagail esan os cionn nan uile dhiathan.

⁵ Oir is iodhalan uile dhiathan nan cinneach, ach is e an Tighearna a rinn na nèamhan.

⁶ Tha urram agus mòralachd na fhianais, neart agus maise na ionad naomh.

⁷ Thugaibh don Tighearna, sibhse fhineachan nan sluagh, thugaibh don Tighearna glòir agus neart.

⁸ Thugaibh don Tighearna a’ ghlòir as cubhaidh da ainm; thugaibh tabhartas leibh, agus thigibh a‑steach da chùirtean.

⁹ Sleuchdaibh don Tighearna ann am maise na naomhachd; biodh eagal oirbh na fhianais, gach uile thìr.

¹⁰ Abraibh am measg nan cinneach, Tha an Tighearna a’ rìoghachadh; mar an ceudna daingnichear an domhan, a‑chum nach gluaisear e; bheir e breith air na slòigh le ceartas.

¹¹ Biodh na nèamhan aoibhneach, agus dèanadh an talamh gàirdeachas; beucadh an fhairge agus a làn.

¹² Biodh a’ mhachair ait, agus gach nì a tha innte; an sin dèanadh uile chroinn na coille luathghaire

¹³ An làthair an Tighearna, oir tha e a’ teachd, oir tha e a’ teachd a thoirt breith air an talamh; bheir e breith air an t‑saoghal le ceartas, agus air na slòigh le a fhìrinn.