Salm 78 - Am Bìoball Gàidhlig 1992

Maschil le Asaph.

¹ Eisdibh, O mo shluagh, rim reachd; aomaibh ur cluas a‑chum briathran mo bheòil.

² Fosglaidh mi mo bheul ann an cosamhlachd; cuiridh mi sean-fhacail dhorcha an cèill,

³ A chuala sinn, agus a b’aithne dhuinn, agus a dh’innis ar n‑athraichean dhuinn.

⁴ Cha cheil sinn air an cloinn iad, a’ foillseachadh cliù an Tighearna don àl a tha ri teachd, agus a neart agus a obraichean iongantach a rinn e;

⁵ Oir chuir e suas teisteas ann an Iàcob, agus shuidhich e lagh ann an Israel, a dh’àithn e dar n‑athraichean gun dèanadh iad aithnichte dan cloinn;

⁶ A‑chum gum biodh fhios aig an àl ri teachd orra, gun èireadh a’ chlann a bheirte, agus gun cuireadh iad an cèill iad dan cloinn fhèin;

⁷ Agus gun cuireadh iad an dòchas ann an Dia, agus nach dìochuimhnicheadh iad obraichean Dhè, ach gun gleidheadh iad a àitheantan;

⁸ Agus nach biodh iad mar an athraichean, nan ginealach reasgach agus ceannairceach, ginealach nach do shuidhich an cridhe gu ceart, agus nach robh an spiorad tairis do Dhia.

⁹ Ged bha clann Ephraim fon airm, agus ged thilg iad le bogha, thill iad air an ais ann an là catha.

¹⁰ Cha do ghlèidh iad coicheangal Dhè, agus dhiùlt iad imeachd na reachd.

¹¹ Agus dhìochuimhnich iad a obraichean, agus a iongantasan a nochd e dhaibh.

¹² An làthair an athraichean rinn e nithean iongantach, ann an tìr na h‑Eiphit, ann am machair Shòain.

¹³ Sgoilt e an fhairge, agus thug e iadsan thairis, agus thug e air na h‑uisgeachan seasamh mar thòrr.

¹⁴ Agus stiùir e iad le neul anns an là, agus air feadh na h‑oidhche le solas teine.

¹⁵ Sgoilt e na creagan anns an fhàsach, agus thug e deoch dhaibh, mar a doimhneachdan mòra.

¹⁶ Agus thug e sruthan a‑mach as a’ charraig, agus thug e air uisgeachan ruith sìos mar aibhnichean.

¹⁷ Gidheadh pheacaich iad fhathast nas mò na aghaidh, a’ brosnachadh an Tì as àirde anns an fhàsach.

¹⁸ Agus bhuair iad Dia nan cridhe, ag iarraidh bìdh dam miann.

¹⁹ Seadh, labhair iad an aghaidh Dhè; thubhairt iad, An urrainn Dia bòrd a dheasachadh anns an fhàsach?

²⁰ Feuch, bhuail e a’ chreag, agus bhrùchd uisgeachan a‑mach, agus dh’èirich na tuiltean. An urrainn e mar an ceudna aran a thabhairt? An deasaich e feòil da shluagh?

²¹ Uime sin, chuala an Tighearna, agus bha corraich air, agus las teine an aghaidh Iàcoib, agus mar an ceudna dh’èirich fearg an aghaidh Israeil;

²² A chionn nach do chreid iad ann an Dia, agus nach d’earb iad as a shlàinte;

²³ Ged dh’àithn e do na neòil on àirde, agus ged dh’fhosgail e dorsan nan nèamh;

²⁴ Agus ged fhras e a‑nuas mana orra ri ithe, agus ged thug e dhaibh coirce nan nèamh.

²⁵ Dh’ith daoine biadh nan aingeal; thug e dhaibh an sàth de lòn.

²⁶ Thug e air gaoith an ear imeachd anns na nèamhan, agus le a neart thug e a‑steach a’ ghaoth a deas.

²⁷ Agus fhras e a‑nuas feòil orra mar dhuslach, agus eunlaith iteagach mar ghaineamh na fairge.

²⁸ Agus thug e orra tuiteam am meadhon an campa, mu thimcheall an àitean-còmhnaidh.

²⁹ Agus dh’ith iad, agus làn-shàsaicheadh iad, oir thug e dhaibh am miann fhèin.

³⁰ Cha robh iad air an sgarachdainn om miann; fhathast bha am biadh nam beul.

³¹ An sin thàinig fearg Dhè orra, agus mharbh e iadsan a bu shultmhoire dhiubh, agus leag e sìos daoine taghte Israeil.

³² An dèidh seo gu lèir, pheacaich iad fhathast, agus cha do chreid iad airson a obraichean iongantach-san.

³³ Uime sin chaith e an làithean ann an dìomhanas, agus am bliadhnachan ann an uamhas.

³⁴ Nuair a mharbh e iad, an sin dh’iarr iad e, agus thill iad, agus bha iad gu moch ag iarraidh Dhè;

³⁵ Agus chuimhnich iad gum b’e Dia an carraig, agus an Dia as àirde am fear-saoraidh.

³⁶ Ach rinn iad miodal ris lem beul, agus rinn iad breug dha len teangaidh,

³⁷ Oir cha robh an cridhe ceart maille ris, agus cha robh iad dìleas na choicheangal.

³⁸ Gidheadh, gu h‑iochdmhor mhaith esan an lochd, agus cha do sgrios e iad; seadh, iomadh uair thionndaidh e a fhearg uaithe, agus cha do dhùisg e a chorraich uile.

³⁹ Oir chuimhnich e nach robh annta ach feòil; osag gaoithe a shiùbhlas, agus nach till a‑rìs.

⁴⁰ Cia tric a bhrosnaich iad e anns an fhàsach, a chuir iad campar air anns an ionad uaigneach?

⁴¹ Seadh, thill iad air an ais, agus bhuair iad Dia, agus chuir iad tomhas air Aon naomh Israeil.

⁴² Cha do chuimhnich iad a làmh, no an là air an do shaor e iad on nàmhaid;

⁴³ Mar a nochd e a chomharraidhean anns an Eiphit, agus a obraichean iongantach ann am machair Shòain;

⁴⁴ Agus a thionndaidh e an uisgeachan gu fuil, agus an sruthan, air chor is nach faodte òl dhiubh;

⁴⁵ A chuir e nam measg iomadh gnè chuileag a dh’ith suas iad, agus losgainn a sgrios iad;

⁴⁶ A thug e an toradh don bhurras, agus an saothair don lòcast;

⁴⁷ A mhill e an croinn-fhìona le cloich-mheallain, agus an croinn-fhìge le reothadh;

⁴⁸ Agus a thug e thairis am feudail don chloich-mheallain, agus an treudan don tein-adhair;

⁴⁹ A thilg e orra teas a fheirge, boile agus corraich, agus teinn, le ainglean olca a chuir e nam measg;

⁵⁰ A rinn e slighe da fheirg, nach do chaomhain e an anam on bhàs, ach a thug e thairis an anam don phlàigh;

⁵¹ Agus a bhuail e gach ciad-ghin anns an Eiphit, toiseach an neirt ann am pàilleanan Ham;

⁵² Ach a thug e a‑mach mar chaoraich a shluagh fhèin, agus a threòraich e iad mar threud anns an fhàsach;

⁵³ Agus a stiùir e iad gu tèarainte, air chor is nach robh eagal orra, ach a chòmhdaich an fhairge an naimhdean;

⁵⁴ Agus a thug e iad gu crìch a ionaid naoimh-san, don t‑sliabh seo a choisinn a dheaslàmh;

⁵⁵ Agus a thilg e a‑mach na cinnich romhpa, agus a roinn e oighreachd dhaibh le crannchur, agus a thug e air treubhan Israeil còmhnaidh a ghabhail nam pàilleanan-san.

⁵⁶ Gidheadh bhuair agus bhrosnaich iad an Dia as àirde, agus cha do ghlèidh iad a theisteas.

⁵⁷ Ach thill iad, agus ghluais iad gu fealltach mar an athraichean; chaidh iad a thaobh, mar bhogha fiar.

⁵⁸ Agus bhrosnaich iad e len ionadan àrda, agus len dealbhan geàrrte dhùisg iad e gu eud.

⁵⁹ Chuala Dia, agus bha fearg air, agus ghabh e gràin mhòr de Israel;

⁶⁰ Agus thrèig e pàillean Shiloh, am bùth a shuidhich e am measg dhaoine;

⁶¹ Agus thug e suas a neart gu braighdeanas, agus a ghlòir do làimh an nàmhaid;

⁶² Agus thug e thairis a shluagh don chlaidheamh, agus ghabh e fearg ra oighreachd.

⁶³ Loisg an teine an òigridh, agus cha d’fhuair an òighean pòsadh.

⁶⁴ Thuit an sagartan leis a’ chlaidheamh, agus cha do rinn am bantraichean bròn.

⁶⁵ An sin mhosgail an Tighearna mar neach a bha na chadal, mar churaidh a nì iolach an dèidh dha fìon òl.

⁶⁶ Agus bhuail e a naimhdean nan deireadh; thug e masladh bithbhuan dhaibh.

⁶⁷ Agus dhiùilt e pàillean Iòseiph, agus cha do thagh e treubh Ephraim;

⁶⁸ Ach thagh e treubh Iùdah, sliabh Shioin a ghràdhaich e;

⁶⁹ Agus thog e a ionad naomh fhèin mar lùchairt àrd, mar an talamh a shuidhich e gu bràth;

⁷⁰ Agus thagh e Daibhidh a òglach, agus thug e e o chrò nan caorach;

⁷¹ O bhith an dèidh nan caorach a bha trom le àl, thug e e a bheathachadh Iàcoib a shluagh, agus Israel a oighreachd.

⁷² Agus bheathaich e iad a rèir ionracas a chridhe, agus le seòltachd a làmh stiùir e iad.