Salm 51 - Am Bìoball Gàidhlig 1992

Don àrd-fhear-ciùil. Salm le Daibhidh nuair a thàinig Nàtan, am fàidh, da ionnsaigh an dèidh dha peacachadh le Bat-sèba.

¹ Dèan tròcair orm, a Dhè, a rèir do choibhneas gràidh; a rèir lìonmhorachd do chaomh-thròcairean, dubh as m’easaontas.

² Gu h‑iomlan ionnail mi om lochd, agus glan mi om pheacadh,

³ Oir tha mi ag aideachadh m’easaontais, agus tha mo pheacadh am làthair a‑ghnàth.

⁴ Ad aghaidh, ad aghaidh fhèin a‑mhàin pheacaich mi, agus rinn mi olc ad shealladh, air chor is gum fìreanaichear thusa nuair a labhras tu, gum bi thu glan nuair a bheir thu breith.

⁵ Feuch, ann an euceart dhealbhadh mi, agus ann am peacadh ghabh mo mhàthair mi na broinn.

⁶ Feuch, is ionmhainn leat an fhìrinn anns an taobh a‑staigh, agus anns an ionad fhalaichte bheir thu orm gliocas a thuigsinn.

⁷ Glan mi le hiosop agus bidh mi glan; ionnail mi, agus bidh mi nas gile na sneachd.

⁸ Thoir orm guth subhachais agus aoibhneis a chluinntinn, agus nì na cnàmhan a bhris thu gàirdeachas.

⁹ Falaich do ghnùis om pheacaidhean, agus dubh as m’euceartan gu lèir.

¹⁰ Cruthaich annam cridhe glan, a Dhè, agus ath-nuadhaich spiorad ceart an taobh a‑staigh dhìom.

¹¹ Na tilg mi od shealladh, agus na toir do spiorad naomh uam.

¹² Aisig dhomh gàirdeachas do shlàinte, agus led spiorad saor cùm suas mi.

¹³ Teagaisgidh mi do luchd-easaontais do shlighean, agus iompaichear peacaich ad ionnsaigh.

¹⁴ Saor mi o chionta fala, a Dhè, a Dhè mo shlàinte; àrd-mholaidh mo theanga d’fhìreantachd.

¹⁵ A Thighearna, fosgail mo bhilean, agus cuiridh mo bheul an cèill do chliù.

¹⁶ Oir chan iarr thu ìobairt, no bheirinn dhut i; ann an ìobairt-loisgte chan eil tlachd agad.

¹⁷ Is iad ìobairtean Dhè spiorad briste; air cridhe briste agus brùite, a Dhè, cha dèan thusa tàir.

¹⁸ Dèan math, ad dheagh-ghean, do Shion; tog suas ballachan Ierusaleim.

¹⁹ An sin taitnidh ìobairtean ionracais riut, ìobairtean-loisgte agus làn ìobairtean-loisgte; an sin ìobraidh iad tairbh òga air d’altair.