Salm 41 - Am Bìoball Gàidhlig 1992

Don àrd-fhear-ciùil. Salm le Daibhidh.

¹ Is beannaichte esan a bheir an aire don duine bhochd; ann an là an uilc saoraidh an Tighearna e.

² Gleidhidh an Tighearna e, agus cumaidh e beò e, agus bidh e beannaichte air thalamh; na tabhair thusa e do thoil a naimhdean.

³ Bheir an Tighearna neart dha air leabaidh a thinneis iarganaich; a leabaidh uile nì thusa dha na easlainte.

⁴ Thubhairt mi, A Thighearna, dèan tròcair orm; leighis m’anam, oir pheacaich mi ad aghaidh.

⁵ Tha mo naimhdean a’ labhairt uilc orm, ag ràdh, Cuin a gheibh e bàs agus a sgriosar a ainm?

⁶ Agus ma thig neach gam shealltainn, labhraidh e dìomhanas; càrnaidh a chridhe euceart dha fhèin; thèid e a‑mach agus labhraidh e e.

⁷ Tha iadsan uile aig a bheil fuath dhomh a’ cagarsaich am aghaidh; tha iad a’ dealbh uilc am aghaidh.

⁸ Tha droch nì, arsa iadsan, air teachd air; agus esan a tha a‑nis na laighe, chan èirich e nas mò.

⁹ Eadhon fear mo shìth as an d’earb mi, esan a dh’ith dem aran, thog e a shàil am aghaidh.

¹⁰ Ach dèan-sa, a Thighearna, tròcair orm, agus tog suas mi, agus bheir mi an luigheachd dhaibh.

¹¹ Le seo tha fhios agam gu bheil tlachd agadsa annam, a chionn nach eil mo nàmhaid a’ dèanamh caithreim os mo chionn.

¹² Ach air mo shonsa, cumaidh tu suas mi ann an ionracas, agus suidhichidh tu mi ad fhianais gu bràth.

¹³ Beannaichte gu robh an Tighearna, Dia Israeil, o shìorraidheachd gu sìorraidheachd! Amen agus Amen!