Salm 3 - Am Bìoball Gàidhlig 1992

Salm le Daibhidh, nuair a theich e ro Absalom a mhac.

¹ A Thighearna, nach lìonmhor a dh’fhàs mo naimhdean? Is iomadh iad a tha ag èirigh am aghaidh.

² Is iomadh iad a their rim anam nach eil furtachd aige ann an Dia. Selah.

³ Ach tha thusa, a Thighearna, ad sgèith dhòmhsa; mo ghlòir agus fear-togail mo chinn.

⁴ Lem ghuth dh’èigh mi ris an Tighearna, agus dh’èisd e rium as a shliabh naomh. Selah.

⁵ Laigh mi sìos agus chaidil mi: dhùisg mi, oir chùm an Tighearna suas mi.

⁶ Chan eagal leam deich mìle sluaigh, a chuir iad fhèin am aghaidh air gach taobh.

⁷ Eirich, a Thighearna; saor mi, O mo Dhia; oir bhuail thu mo naimhdean uile air an gial; bhris thu fiaclan nan aingidh.

⁸ Is leis an Tighearna an fhurtachd; air do shluagh tha do bheannachd. Selah.