Salm 25 - Am Bìoball Gàidhlig 1992

Le Daibhidh.

¹ Riutsa, a Thighearna, togaidh mi m’anam suas.

² Annadsa, mo Dhia, cuiridh mi mo dhòchas; na nàraichear mi, agus na dèanadh mo naimhdean gàirdeachas os mo chionn.

³ Seadh, na nàraichear neach sam bith a dh’fheitheas ortsa; biodh nàire orrasan a chiontaicheas gun adhbhar.

⁴ Nochd dhomh do shlighean, a Thighearna; teagaisg dhomh do cheuman.

⁵ Treòraich mi ann ad fhìrinn agus teagaisg mi, oir is tusa Dia mo shlàinte, agus ortsa tha mi a’ feitheamh gach là.

⁶ Cuimhnich do chaomh-thròcairean, a Thighearna, agus do choibhneasan gràdhach, oir tha iad ann o chian nan cian.

⁷ Peacaidhean m’òige agus m’easaontais, na cuimhnich thusa; a rèir do thròcair bi‑sa cuimhneachail orm, air sgàth do mhaitheis, a Thighearna.

⁸ Is math agus is dìreach an Tighearna; uime sin teagaisgidh e peacaich anns an t‑slighe.

⁹ Treòraichidh e na daoine ciùine ann am breitheanas, agus teagaisgidh e do na daoine ciùine a shlighe.

¹⁰ Is tròcair agus fìrinn uile shlighean an Tighearna, dhaibhsan a ghleidheas a choicheangal agus a theisteis.

¹¹ Air sgàth d’ainme, a Thighearna, lagh mo chionta, oir tha e mòr.

¹² Cò e am fear air a bheil eagal an Tighearna? Seòlaidh e esan anns an t‑slighe a roghnaicheas e.

¹³ Nì a anam tàmh ann am math, agus mealaidh a shliochd an tìr.

¹⁴ Tha rùn an Tighearna aig an dream don eagal e, agus foillsichidh e dhaibh a choicheangal.

¹⁵ Tha mo shùilean a‑ghnàth ris an Tighearna, oir bheir esan mo chasan as an lìon.

¹⁶ Amhairc orm, agus gabh truas dhìom, oir tha mi am aonar agus fo àmhghar.

¹⁷ Tha teinn mo chridhe a’ dol am meud; om àmhgharan saor thusa mi.

¹⁸ Amhairc air m’àmhghar agus air mo phèin, agus lagh mo pheacaidhean gu lèir.

¹⁹ Amhairc air mo naimhdean, oir tha iad lìonmhor, agus le fuath anabarrach tha iad gam fhuathachadh.

²⁰ Glèidh m’anam, agus saor mi; na leig fo nàire mi, oir chuir mi mo dhòigh annad.

²¹ Dìonadh ionracas agus ceartas mi, oir tha mi a’ feitheamh ortsa.

²² Saor Israel, a Dhè, as a àmhgharan uile.