Salm 148 - Am Bìoball Gàidhlig 1992

¹ Molaibh-se an Tighearna. Molaibh an Tighearna o na nèamhan; molaibh e anns na h‑àrdan.

² Molaibh e, a ainglean uile; molaibh e, a shlòigh uile.

³ Molaibh e, a ghrian agus a ghealach; molaibh e, uile reultan solais.

⁴ Molaibh e, a nèamhan nan nèamh, agus uisgeachan a tha os cionn nan nèamh.

⁵ Moladh iad ainm an Tighearna, oir dh’àithn e, agus chruthaicheadh iad.

⁶ Agus dhaingnich e iad gu saoghal nan saoghal; rinn e àithne nach tèid thairis.

⁷ Molaibh an Tighearna on talamh, a dhràgonan agus a dhoimhneachdan uile.

⁸ Teine agus clach-shneachda; sneachd agus ceò; gaoth dhoineannach a’ coileanadh a fhacail;

⁹ Na beanntan agus na cnuic uile; craobhan-meas agus na h‑uile sheudair;

¹⁰ Fiadh-bheathaichean agus gach uile ainmhidh; nithean snàigeach agus eunlaith iteagach;

¹¹ Rìghrean na talmhainn agus na h‑uile shlòigh; uachdarain agus uile bhritheamhan na talmhainn;

¹² Araon òigfhir agus òighean; seann daoine agus clann;

¹³ Moladh iad sin ainm an Tighearna, oir tha a ainm-san a‑mhàin urramach, tha a ghlòir os cionn na talmhainn agus nan nèamh.

¹⁴ Agus dh’àrdaich e adharc a shluaigh, moladh a naomh uile, eadhon clann Israeil, sluagh a tha am fagas dha. Molaibh-se an Tighearna.