Philemoin 1 - Am Bìoball Gàidhlig 1992

¹ Pòl, prìosanach Iosa Crìosd, agus Timòteus ar bràthair, a‑chum Philemoin as ionmhainn leinn, agus ar co‑shaothraiche,

² Agus a‑chum Aphia ionmhainn, agus Archipuis ar co‑shaighdear, agus a‑chum na h‑eaglais a tha ann ad thaigh:

³ Gràs gu robh dhuibh, agus sìth o Dhia ar n‑Athair, agus on Tighearna Iosa Crìosd.

⁴ Tha mi a’ toirt buidheachais dom Dhia, a’ sìor-thoirt luaidh ort ann am ùrnaighean,

⁵ Air dhomh a bhith a’ cluinntinn mud ghràdh, agus a’ chreidimh a tha agad a‑thaobh an Tighearna Iosa, agus a‑thaobh nan uile naomh;

⁶ A‑chum gum bi co‑chomann do chreidimh èifeachdach ann an aidmheil an uile mhaith a tha annaibh ann an Iosa Crìosd.

⁷ Oir tha subhachas ro‑mhòr agus comhfhurtachd againne ann ad ghràdh-sa, do bhrìgh gu bheil innidh nan naomh air faotainn suaimhneis tromhadsa, a bhràthair.

⁸ Uime sin ged dh’fhaodainn a bhith ro‑dhàn ann an Crìosd a‑chum an nì a tha iomchaidh àithneadh dhut,

⁹ Gidheadh is fheàrr leam airson gràidh impidh a chur ort, air a bhith dhomh mar Phòl aosda, agus a‑nis mar an ceudna am phrìosanach airson Iosa Crìosd.

¹⁰ Guidheam ort airson mo mhic Onesimus, a ghin mi ann am ghèimhlean:

¹¹ Neach a bha uaireigin neo-thairbheach dhutsa, ach a‑nis a tha tairbheach dhutsa agus dhòmhsa:

¹² Neach a chuir mi air ais: uime sin gabh-sa ris mar rim innidh fhèin;

¹³ Neach a bu mhiann leam a chumail maille rium fhèin, a‑chum gun dèanadh e frithealadh dhomh ann ad àite-sa, ann an gèimhlean an t‑soisgeil:

¹⁴ Ach as eugmhais d’inntinn-sa cha bu toil leam nì sam bith a dhèanamh; a‑chum nach biodh do mhaith-sa mar gum b’ann a dh’aindeoin, ach od thoil fhèin.

¹⁵ Oir theagamh gur ann air a shon seo a dh’fhàg e thu rè tamaill, a‑chum gum faigheadh tu e gu sìorraidh;

¹⁶ Chan ann à seo suas mar sheirbhiseach, ach os cionn seirbhisich, na bhràthair gràdhach, gu h‑àraidh dhòmhsa, agus nach mò na sin dhutsa, araon anns an fheòil, agus anns an Tighearna?

¹⁷ Uime sin ma mheasas tu mise mar fhear co‑roinne, gabh ris-san mar rium fhèin.

¹⁸ Agus ma rinn e eucoir ort, no ma dhligheas e nì sam bith dhut, cuir sin as mo leth-sa.

¹⁹ Sgrìobh mise Pòl lem làimh fhèin e, agus dìolaidh mi e: ged nach eil mi ag ràdh riut gun dlighear leat thu fhèin os bàrr dhomh.

²⁰ Seadh, a bhràthair, faigheam gàirdeachas dod thaobh anns an Tighearna: dèan suaimhneach mo chridhe anns an Tighearna.

²¹ Air dhomh a bhith earbsach as d’ùmhlachd sgrìobh mi ad ionnsaigh, oir tha fhios agam gun dèan thusa mar an ceudna nas mò na tha mi ag ràdh.

²² Ach maille ri seo ullaich mar an ceudna fàrdach air mo shon: oir tha dòchas agam, tre ur n‑ùrnaighean-se, gun toirear mi dhuibh.

²³ Tha Epaphras, mo cho-phrìosanach ann an Iosa Crìosd,

²⁴ Marcus, Aristarchus, Dèmas, Lùcas, mo cho-luchd-obrach, a’ cur fàilte ort.

²⁵ Gràs ar Tighearna Iosa Crìosd gu robh maille ri ur spiorad-sa. Amen.