Nehemiah 12 - Am Bìoball Gàidhlig 1992

¹ Agus is iad seo na sagartan agus na Lèbhithich a chaidh suas maille ri Serubabel mac Shealtieil, agus Iesua: Seraiah, Ieremiah, Esra,

² Amariah, Maluch, Hatus,

³ Sechaniah, Rehum, Meremot,

⁴ Ido, Gineto, Abiah,

⁵ Miamin, Maadiah, Bilgah,

⁶ Semaiah, agus Ioiarib, Iedaiah,

⁷ Salu, Amoc, Hilciah, Iedaiah: b’iad sin cinn nan sagart, agus am bràithrean ann an làithean Iesua.

⁸ Agus na Lèbhithich: Iesua, Binui, Cadmiel, Serebiah, Iùdah, agus Mataniah, a bha os cionn nan laoidhean-molaidh, e fhèin agus a bhràithrean;

⁹ Agus Bacbuciah, agus Uni, agus am bràithrean, a bha thall fan comhair-san anns na fairean.

¹⁰ Agus ghin Iesua Ioiacim, agus ghin Ioiacim Eliasib, agus ghin Eliasib Ioiada,

¹¹ Agus ghin Ioiada Ionatan, agus ghin Ionatan Iadua.

¹² Agus ann an làithean Ioiacim bha sagartan, cinn nan athraichean: o Sheraiah, Meraiah: o Ieremiah, Hananiah:

¹³ O Esra, Mesulam: o Amariah, Iehohanan:

¹⁴ O Mhelicu, Ionatan: o Shechaniah, Iòseph:

¹⁵ O Harim, Adnah: o Mheraiot, Helcai:

¹⁶ O Ido, Sechariah: o Ghineton, Mesulam:

¹⁷ O Abiah, Sichri: o Mhiamin, o Mhoadiah, Piltai:

¹⁸ O Bhilgah, Samua: o Shemaiah, Iehonatan:

¹⁹ O Ioiarib, Matenai: o Iedaiah, Udsi:

²⁰ O Shalai, Calai: o Amoc, Eber:

²¹ O Hilciah, Hasabiah: o Iedaiah, Netaneel.

²² Sgrìobhadh sìos na Lèbhithich ann an làithean Eliasib, Ioiada, agus Iehonain, agus Iadua, cinn nan athraichean; agus na sagartan gu ruig rìoghachadh Dhariuis am Persianach.

²³ Sgrìobhadh sìos mic Lèbhi, cinn nan athraichean, ann an leabhar nan eachdraidh, gu ruig làithean Iohanain mhic Eliasib.

²⁴ Agus cinn nan Lèbhitheach: Hasabiah, Serebiah, agus Iesua mac Chadmieil, agus am bràithrean thall fan comhair, a mholadh agus a thabhairt buidheachais a rèir àithne Dhaibhidh òglach Dhè, faire fa chomhair faire.

²⁵ Mataniah, agus Bacbuciah, Obadiah, Mesulam, Talmon, Acub, nan dorsairean a’ coimhead na faire aig stairsneachan nan geatachan.

²⁶ Iad sin ann an làithean Ioiacim mhic Iesua, mhic Iosadaic, agus ann an làithean Nehemiah an t‑uachdaran, agus Esra an sagart, an sgrìobhaiche.

²⁷ Agus aig coisrigeadh balla Ierusaleim dh’iarr iad na Lèbhithich as an àitean uile, a‑chum an tabhairt gu Ierusalem, a chumail a’ choisrigidh le aoibhneas, agus le breith-buidheachais, agus le seinn, le ciombalan, saltairean, agus le clàrsaichean.

²⁸ Agus chruinnich mic an luchd-seinn an ceann a chèile, araon as an tìr rèidh mu thimcheall Ierusaleim, agus à bailtean beaga Netophati;

²⁹ Agus à taigh Ghilgail, agus à machraichean Gheba agus Asmabheit; oir thog an luchd-seinn bailtean beaga dhaibh fhèin mu thimcheall Ierusaleim.

³⁰ Agus ghlan na sagartan agus na Lèbhithich iad fhèin, agus ghlan iad an sluagh, agus na geatachan, agus am balla.

³¹ An sin thug mi suas uachdarain Iùdah air a’ bhalla, agus dh’òrdaich mi dà chuideachd mhòr a‑chum molaidh, agus gun imicheadh aon a dh’ionnsaigh na làimhe deise air a’ bhalla gu geata an aolaich:

³² Agus nan dèidh-san chaidh Hosaiah, agus leth uachdarain Iùdah.

³³ Agus Asariah, Esra, agus Mesulam,

³⁴ Iùdah, agus Beniàmin, agus Semaiah, agus Ieremiah:

³⁵ Agus cuid de mhic nan sagart le trompaidean; Sechariah mac Ionatain, mhic Shemaiah, mhic Mhataniah, mhic Mhichaiah, mhic Shacuir, mhic Asaiph;

³⁶ Agus a bhràithrean Semaiah, agus Asareel, Milalai, Gilalai, Maai, Netaneel, agus Iùdah, agus Hanani, le innealan-ciùil Dhaibhidh òglach Dhè, agus Esra an sgrìobhaiche romhpa.

³⁷ Agus aig geata an tobair a bha fan comhair, chaidh iad suas air ceuman baile Dhaibhidh, aig dol suas a’ bhalla, os cionn taigh Dhaibhidh, gu ruig geata an uisge a làimh na h‑àird an ear.

³⁸ Agus dh’imich a’ chuideachd eile a bha a‑chum molaidh thall fan comhair, agus mise nan dèidh, agus leth an t‑sluaigh air a’ bhalla, o thaobh shuas tùr nan àmhainn gu ruig am balla leathann;

³⁹ Agus o thaobh shuas geata Ephraim, agus os cionn an t‑seana gheata, agus os cionn geata an èisg, agus tùr Hananeeil, agus tùr Mheah, gu ruig geata nan caorach; agus sheas iad ann an geata a’ phrìosain.

⁴⁰ An sin sheas an dà chuideachd a bha a‑chum molaidh ann an taigh Dhè, agus mise agus leth an luchd-riaghlaidh maille rium:

⁴¹ Agus na sagartan, Eliacim, Maaseiah, Miniamin, Michaiah, Elioenai, Sechariah, Hananiah le trompaidean;

⁴² Agus Maaseiah, agus Semaiah, agus Eleàsar, agus Udsi, agus Iehonanan, agus Malchiah, agus Elam, agus Eser: agus sheinn an luchd-seinn gu h‑àrd, agus Iesraiah na fhear-coimhead thairis orra.

⁴³ Agus dh’ìobair iad air an là sin ìobairtean mòra, agus rinn iad gàirdeachas; oir thug Dia orra gàirdeachas a dhèanamh le aoibhneas mòr: rinn na mnathan mar an ceudna agus a’ chlann gàirdeachas, agus chualas gàirdeachas Ierusaleim an cèin.

⁴⁴ Agus shuidhicheadh air an là cheudna daoine os cionn nan seòmar airson nan ionmhas, airson nan tabhartas, airson nan ciad-thoradh, agus airson nan deicheamh, a‑chum gun cruinnicheadh iad annta à achaidhean nam bailtean cuibhreannan an lagha do na sagartan agus do na Lèbhithich: oir bha aoibhneas air Iùdah airson nan sagart agus airson nan Lèbhitheach a bha a’ feitheamh.

⁴⁵ Agus choimhead iad faire an Dè, agus faire a’ ghlanaidh, araon an luchd-seinn agus na dorsairean, a rèir àithne Dhaibhidh agus Sholaimh a mhac:

⁴⁶ Oir ann an làithean Dhaibhidh agus Asaiph o shean bha cinn ann air an luchd-seinn, agus air na laoidhean molaidh agus buidheachais do Dhia.

⁴⁷ Agus thug Israel uile seachad ann an làithean Sherubabeil, agus ann an làithean Nehemiah, cuibhreannan an luchd-seinn agus nan dorsair, dlighe gach là air a là fhèin; agus naomhaich iad nithean do na Lèbhithich; agus naomhaich na Lèbhithich do chloinn Aaroin.