Micah 5 - Am Bìoball Gàidhlig 1992

¹ A‑nis cruinnich thu fhèin ann am buidhnean, O nighean bhuidhnean: chuartaich iad le feachd sinn; bhuail iad le slait air a’ ghiall britheamh Israeil.

² Agus thusa, a Bhetlehem-Ephratah, ged tha thu beag am measg mhìltean Iùdah, gidheadh asad thig a‑mach am ionnsaigh-sa neach a bhios na uachdaran air Israel; aig an robh a dhol a‑mach o shean, o làithean na sìorraidheachd.

³ Air an adhbhar sin bheir e thairis iad, gus an t‑àm anns an toir ise a tha gu leanabh a bhreith dhachaigh clann; agus gus an iompaichear fuidheall am bràithrean, maille ri mic Israeil.

⁴ Agus seasaidh e, agus ionaltraidh e a threud ann an neart an Tighearna; ann am mòrachd ainm an Tighearna a Dhia; agus bidh iadsan air an iompachadh: oir a‑nis bidh esan mòr gu ruig crìochan na talmhainn.

⁵ Agus bidh esan na shìth. Nuair a thig an t‑Asirianach dar tìr, agus a shaltras e nar lùchairtean, an sin togaidh sinn na aghaidh seachd buachaillean, agus ochd cinn-fheadhna sluaigh.

⁶ Agus cuiridh iad fearann Asiria fàs leis a’ chlaidheamh, eadhon fearann Nimroid na dhol a‑steach: mar seo saoraidh iad sinn on Asirianach nuair a thig e a‑chum ar fearainn, agus nuair a shaltras e an taobh a‑staigh dar crìochan.

⁷ Agus bidh fuidheall Iàcoib am measg mòran shluagh, mar an drùchd on Tighearna, mar na frasan air an fheur, nach feith ri duine, agus nach fan ri mic dhaoine.

⁸ Agus bidh fuidheall Iàcoib am measg nan cinneach, am meadhon mòran shlògh, mar leòmhann am measg beathaichean na frìthe, mar chuilean leòmhainn am measg nan treudan chaorach: e sin, ma thèid e roimhe, araon saltraidh sìos, agus reubaidh, agus cha tèarainn aon neach.

⁹ Togar do làmh suas os cionn do naimhdean, agus bidh d’eascairdean gu lèir air an gearradh as.

¹⁰ Agus tàrlaidh anns an là sin, tha an Tighearna ag ràdh, gun geàrr mise do chuid each a‑mach as do mheadhon, agus sgriosaidh mi do charbadan.

¹¹ Agus gearraidh mi as bailtean d’fhearainn, agus tilgidh mi sìos d’uile dhaingnichean.

¹² Agus gearraidh mi na draoidhean a‑mach as do mheadhon; agus cha bhi fiosaichean air bith agad.

¹³ Do dhealbhan snaidhte mar an ceudna gearraidh mi as, agus do dhealbhan seasmhach a‑mach as do mheadhon; agus cha toir thu nas mò adhradh do obair do làmh.

¹⁴ Agus spìonaidh mi a‑nìos do dhoireachan as do mheadhon: sgriosaidh mi fòs do naimhdean:

¹⁵ Agus nì mi dìoghaltas, ann am feirg agus ann an corraich, air na cinnich, ionnas nach cuala iad a leithid.