Mata 27 - Am Bìoball Gàidhlig 1992

¹ Air teachd don mhadainn, ghabh uachdarain nan sagart uile, agus seanairean a’ phobaill, comhairle le chèile an aghaidh Iosa, a‑chum a chur gu bàs.

² Agus air dhaibh esan a cheangal, thug iad leo e, agus thug iad thairis e do Phontius Pilat, an t‑uachdaran.

³ An sin, nuair a chunnaic Iùdas, a bhrath e, gun do dhìteadh e, ghabh e aithreachas, agus thug e air an ais na deich-buinn-fhichead airgid do na h‑àrd-shagartan, agus do na seanairean,

⁴ Ag ràdh, Pheacaich mi ann am brath na fala neochiontaich. Ach thubhairt iadsan, Ciod e sin dhuinne? Amhairc thusa air a sin.

⁵ Agus air tilgeadh uaithe nam bonn airgid anns an teampall, dh’imich e roimhe, agus chaidh e agus chroch e e fhèin.

⁶ Agus ghlac na h‑àrd-shagartan na buinn airgid, agus thubhairt iad, Cha chòir an cur anns an ionmhas, oir is luach fala iad.

⁷ Agus air gabhail comhairle dhaibh, cheannaich iad leo fearann a’ chreadhadair, a‑chum a bhith na àit-adhlaic do choigrich.

⁸ Air an adhbhar sin goirear den fhearann sin, Fearann na fala, gus an là‑an‑diugh.

⁹ (An sin choileanadh an nì a labhradh le Ieremias am fàidh, ag ràdh, Agus ghabh iad na deich-buinn-fhichead airgid, luach an tì a mheasadh, neach a mheas iadsan a bha de chloinn Israeil.

¹⁰ Agus thug iad iad airson fearann a’ chreadhadair, mar a dh’òrdaich an Tighearna dhòmhsa.)

¹¹ Agus sheas Iosa an làthair an uachdarain: agus dh’fhiosraich an t‑uachdaran dheth, ag ràdh, An tusa Rìgh nan Iùdhach? Agus thubhairt Iosa ris, Thubhairt thu.

¹² Agus nuair a chuir na h‑àrd-shagartan agus na seanairean cionta as a leth, cha do fhreagair e nì sam bith.

¹³ An sin thubhairt Pilat ris, Nach cluinn thu cia lìon nithean air a bheil iad a’ toirt fianais ad aghaidh?

¹⁴ Agus cha tug e freagradh dha air aon fhacal; ionnas gun do ghabh an t‑uachdaran iongantas ro‑mhòr.

¹⁵ A‑nis ri àm na fèille, chleachd an t‑uachdaran aon phrìosanach a b’àill leo a chur fa sgaoil don phoball.

¹⁶ Agus bha aca, anns an àm sin, prìosanach ro‑chomharraichte, dom b’ainm Barabas.

¹⁷ Air an adhbhar sin, nuair a bha iad cruinn an ceann a chèile, thubhairt Pilat riu, Cò as àill leibh mise a chur fa sgaoil dhuibh? Barabas, no Iosa, den goirear Crìosd?

¹⁸ Oir bha fhios aige gum b’ann o fharmad a thug iad thairis e.

¹⁹ Agus nuair a bha e na shuidhe air cathair a’ bhreitheanais, chuir a bhean teachdaireachd da ionnsaigh, ag ràdh, Na biodh agadsa gnothach sam bith ris an fhìrean sin: oir is mòr a dh’fhuiling mise an‑diugh ann am bruadar air a shon-san.

²⁰ Ach chuir na h‑àrd-shagartan agus na seanairean impidh air a’ phoball gun iarradh iad Barabas, agus gum milleadh iad Iosa.

²¹ Agus fhreagair an t‑uachdaran agus thubhairt e riu, Cò den dithis as àill leibh mise a chur fa sgaoil dhuibh? Thubhairt iadsan, Barabas.

²² Thubhairt Pilat riu, Ciod mas eadh a nì mi ri Iosa, den goirear Crìosd? Thubhairt iad ris uile, Ceusar e.

²³ Agus thubhairt an t‑uachdaran, Carson? Ciod an t‑olc a rinn e? Ach is mò gu mòr a ghlaodh iadsan, ag ràdh, Ceusar e.

²⁴ Agus nuair a chunnaic Pilat nach do bhuadhaich e a’ bheag sam bith, ach gun d’èirich an tuilleadh buaireis, ghabh e uisge, agus dh’ionnlaid e a làmhan am fianais an t‑sluaigh, ag ràdh, Tha mise neochiontach de fhuil an fhìrein seo; faicibh-se sin.

²⁵ Agus fhreagair am poball uile, agus thubhairt iad, Biodh a fhuil oirnne, agus air ar cloinn.

²⁶ An sin leig e fa sgaoil Barabas dhaibh: ach air dha Iosa a sgiùrsadh, thug e thairis e a‑chum a cheusadh.

²⁷ An sin thug saighdearan an uachdarain leo Iosa do thalla a’ bhreitheanais, agus chruinnich iad a’ bhuidheann uile ma thimcheall.

²⁸ Agus air dhaibh a rùsgadh, chuir iad uime fallaing sgàrlaid.

²⁹ Agus air dhaibh crùn droighinn fhighe, chuir iad ma cheann e, agus slat chuilce na làimh dheis: agus lùb iad an glùn na làthair, agus rinn iad fanaid air, ag ràdh, Gum beannaichear thu, a Rìgh nan Iùdhach!

³⁰ Agus thilg iad smugaid air, agus ghlac iad an t‑slat chuilce, agus bhuail iad anns a’ cheann e.

³¹ Agus an dèidh dhaibh fanaid a dhèanamh air, thug iad an fhallaing dheth, agus chuir iad a aodach fhèin uime, agus thug iad leo e a‑chum a cheusadh.

³² Agus nuair a chaidh iad a‑mach, fhuair iad duine o Chirène, dom b’ainm Sìmon: esan cho-èignich iad a‑chum a chrann-ceusaidh-san a ghiùlan.

³³ Agus nuair a thàinig iad gu ionad don ainm Golgòta, sin ri ràdh, àite claiginn,

³⁴ Thug iad dha ri òl fìon-geur, measgte le domblas: agus air dha a bhlasad, chan òladh e e.

³⁵ Agus nuair a cheus iad e, roinn iad a thrusgan eatorra, a’ tilgeadh crannchuir: a‑chum gun coileante an nì a labhradh leis an fhàidh, Roinn iad m’aodach eatorra, agus chuir iad crannchur air mo bhrat.

³⁶ Agus shuidh iad, agus rinn iad faire air an sin:

³⁷ Agus chuir iad a chùis-dhìtidh sgrìobhte os a chionn, IS E SEO IOSA, RIGH NAN IUDHACH.

³⁸ An sin cheusadh maille ris dà ghadaiche; fear air a làimh dheis, agus fear eile air a làimh chlì.

³⁹ Agus thug iadsan a bha a’ dol seachad toibheum dha, a’ crathadh an ceann,

⁴⁰ Agus ag ràdh, Thusa a leagas an teampall, agus a chuireas suas an trì làithean e, fòir ort fhèin: mas tu Mac Dhè, thig a‑nuas on chrann-cheusaidh.

⁴¹ Mar an ceudna, thubhairt na h‑àrd-shagartan, maille ris na sgrìobhaichean, agus na seanairean, a’ fanaid air,

⁴² Shaor e daoine eile; e fhèin a shaoradh cha chomasach e: mas e Rìgh Israeil, thigeadh e a‑nis a‑nuas on chrann-cheusaidh, agus creididh sinn e.

⁴³ Chuir e a dhòigh ann an Dia; saoradh e a‑nis e, ma tha toil aige dha; oir thubhairt e, Is mise Mac Dhè.

⁴⁴ Agus thug na gadaichean a cheusadh maille ris am beum ceudna dha.

⁴⁵ A‑nis, on t‑siathamh uair bha dorchadas air an tìr uile, gus an naoidheamh uair.

⁴⁶ Agus mu thimcheall na naoidheamh uaire, dh’èigh Iosa le guth àrd, ag ràdh, Eli, Eli, lama sabachtani? Is e sin ri ràdh, Mo Dhia, mo Dhia, carson a thrèig thu mi?

⁴⁷ Agus air cluinntinn sin do chuid dhiubhsan a bha nan seasamh an sin, thubhairt iad, Tha am fear seo a’ ghlaodhaich air Elias.

⁴⁸ Agus air ball ruith aon dhiubh, agus ghabh e spong, agus lìon e de fhìon-geur i, agus air dha a cur air slait chuilce, thug e dha ra òl.

⁴⁹ Ach thubhairt càch, Leig dha, faiceamaid an tig Elias ga thèarnadh.

⁵⁰ Agus nuair a dh’èigh Iosa a‑rìs le glaodh mòr, thug e suas a spiorad.

⁵¹ Agus, feuch, reubadh brat-roinn an teampaill na dhà chuid o mhullach gu ìochdar; agus chriothnaich an talamh, agus sgoilteadh na creagan:

⁵² Agus dh’fhosgladh na h‑uaighean, agus dh’èirich mòran de chuirp nan naomh, a bha nan cadal,

⁵³ Agus chaidh iad a‑mach as na h‑uaighean an dèidh a aiseirigh-san, agus chaidh iad a‑steach don bhaile naomh, agus nochdadh iad do mhòran.

⁵⁴ A‑nis, nuair a chunnaic an ceannard-ceud, agus iadsan a bha maille ris a’ coimhead Iosa, a’ chrith-thalmhainn, agus na nithean eile a rinneadh, ghabh iad eagal mòr, ag ràdh, Gu fìrinneach b’e seo Mac Dhè.

⁵⁵ Agus bha an sin mòran bhan (ag amharc am fad) a lean Iosa o Ghalile, a’ frithealadh dha:

⁵⁶ Am measg an robh Muire Magdalen, agus Muire, màthair Sheumais agus Iòseis, agus màthair clann Shebede.

⁵⁷ Agus air teachd don fheasgar, thàinig duine saoibhir o Arimatèa, dom b’ainm Iòseph, a bha e fhèin na dheisciobal aig Iosa mar an ceudna.

⁵⁸ Chaidh esan gu Pilat, agus dh’iarr e corp Iosa: an sin dh’àithn Pilat an corp a thabhairt dha.

⁵⁹ Agus ghlac Iòseph an corp, agus phàisg e ann an lìon-aodach fìorghlan e,

⁶⁰ Agus chuir e e na uaigh nuaidh fhèin, a chladhaich e ann an carraig. Agus charaich e clach mhòr gu doras na h‑uaighe, agus dh’imich e roimhe.

⁶¹ Agus bha Muire Magdalen agus a’ Mhuire eile nan suidhe fa chomhair na h‑uaighe.

⁶² A‑nis air an là màireach, an là an dèidh an ullachaidh, chruinnicheadh na h‑àrd-shagartan agus na Pharasaich gu Pilat,

⁶³ Ag ràdh, A thighearna, is cuimhne leinn nuair a bha am mealltair ud fhathast beò, gun dubhairt e, Eiridh mi an dèidh trì làithean.

⁶⁴ Òrdaich, uime sin, an uaigh a bhith air a coimhead gu cinnteach gus an treas là, air eagal gun tig a dheisciobail anns an oidhche, agus gun goid iad leo e, agus gun abair iad ris an t‑sluagh, Dh’èirich e o na mairbh: agus mar sin bidh am mearachd dheireannach nas miosa na an ciad mhearachd.

⁶⁵ Thubhairt Pilat riu, Tha faire agaibh; imichibh, dèanaibh an uaigh cho tèarainte is as aithne dhuibh.

⁶⁶ Agus dh’imich iad, agus rinn iad an uaigh cinnteach, a’ cur seula air a’ chloich, maille ri faire.