Lebhiticus 8 - Am Bìoball Gàidhlig 1992

¹ Agus labhair an Tighearna ri Maois, ag ràdh,

² Thoir leat Aaron agus a mhic maille ris, agus an trusgan naomh, agus an ola-ungaidh, agus tarbh mar an ìobairt-pheacaidh, agus dà reithe, agus basgaid de aran neo-ghortaichte.

³ Agus cruinnich an coitheanal uile an ceann a chèile gu doras pàillean a’ choitheanail.

⁴ Agus rinn Maois mar a dh’àithn an Tighearna dha; agus chruinnicheadh an coitheanal ri chèile gu doras pàillean a’ choitheanail.

⁵ Agus thubhairt Maois ris a’ choitheanal, Is e seo an nì a dh’àithn an Tighearna a dhèanamh.

⁶ Agus thug Maois Aaron agus a mhic leis, agus dh’ionnlaid e iad le uisge.

⁷ Agus chuir e air an còta, agus chrioslaich e e leis a’ chrios, agus dh’aodaich e e leis an fhallaing, agus chuir e an èphod air, agus chrioslaich e e le crios rìomhach na h‑èphoid, agus cheangail e ris i leis.

⁸ Agus chuir e an t‑uchd-èideadh air; agus chuir e anns an uchd-èideadh an Urim agus an Tumim.

⁹ Agus chuir e an crùn-sagairt air a cheann; mar an ceudna air a’ chrùn-shagairt, eadhon air a’ chuid-bheòil dheth, chuir e an leac òir, an crùn naomh, mar a dh’àithn an Tighearna do Mhaois.

¹⁰ Agus ghabh Maois an ola-ungaidh, agus dh’ung e am pàillean, agus gach nì a bha ann, agus naomhaich e iad.

¹¹ Agus chrath e cuid dhith air an altair seachd uairean, agus dh’ung e an altair, agus a soithichean uile, araon an soitheach-ionnlaid agus a chas, a‑chum an naomhachadh.

¹² Agus dhòirt e den ola-ungaidh air ceann Aaroin, agus dh’ung e e, a‑chum a naomhachadh.

¹³ Agus thug Maois mic Aaroin leis, agus chuir e còtaichean orra, agus chrioslaich e iad le criosan, agus chuir e bonaidean orra, mar a dh’àithn an Tighearna do Mhaois.

¹⁴ Agus thug e leis an tarbh airson na h‑ìobairt-pheacaidh, agus chuir Aaron agus a mhic an làmhan air ceann an tairbh airson na h‑ìobairt-pheacaidh.

¹⁵ Agus mharbh e e; agus ghabh Maois an fhuil, agus chuir e i air adhaircean na h‑altarach mun cuairt le a mheur, agus ghlan e an altair; agus dhòirt e an fhuil aig bun na h‑altarach, agus naomhaich e i, a dhèanamh rèite oirre.

¹⁶ Agus ghabh e an ìgh uile a bha air a’ mhionach, agus an sgairt os cionn nan àinean, agus an dà àra, agus an ìgh; agus loisg Maois iad air an altair.

¹⁷ Ach an tarbh agus a sheiche, agus a fheòil, agus a aolach, loisg e le teine an taobh a‑muigh den champ, mar a dh’àithn an Tighearna do Mhaois.

¹⁸ Agus thug e leis an reithe airson na h‑ìobairt-loisgte: agus chuir Aaron agus a mhic an làmhan air ceann an reithe.

¹⁹ Agus mharbh e e; agus chrath Maois an fhuil air an altair mun cuairt.

²⁰ Agus gheàrr e an reithe na mhìrean; agus loisg Maois an ceann, agus na mìrean, agus an t‑saill.

²¹ Agus nigh e am mionach agus na casan ann an uisge; agus loisg Maois an reithe uile air an altair: b’ìobairt-loisgte e, a‑chum fàile chùbhraidh: tabhartas air a thoirt suas le teine don Tighearna, mar a dh’àithn an Tighearna do Mhaois.

²² Agus thug e leis an reithe eile, reithe a’ choisrigidh: agus chuir Aaron agus a mhic an làmhan air ceann an reithe.

²³ Agus mharbh e e; agus ghabh Maois cuid de a fhuil, agus chuir e i air bàrr cluas dheas Aaroin, agus air òrdaig a làimhe deise, agus air òrdaig a choise deise.

²⁴ Agus thug e leis mic Aaroin, agus chuir Maois cuid den fhuil air bàrr an cluaise deise, agus air òrdaig an làimhe deise, agus air òrdaig an coise deise: agus chrath Maois an fhuil air an altair mun cuairt.

²⁵ Agus ghabh e an t‑saill, agus an t‑earball, agus an ìgh uile a bha air a’ mhionach, agus an sgairt os cionn nan àinean, agus an dà àra agus an ìgh, agus an slinnean deas.

²⁶ Agus à basgaid an arain neo-ghortaichte, a bha an làthair an Tighearna, ghabh e aon bhreacag neo-ghortaichte, agus aon bhreacag de aran le ola, agus aon deàrnagan, agus chuir e iad air an t‑saill, agus air an t‑slinnean dheas:

²⁷ Agus chuir e an t‑iomlan air làmhan Aaroin, agus air làmhan a chuid mhac; agus luaisg e iad mar thabhartas-luaisgte an làthair an Tighearna.

²⁸ Agus ghabh Maois iad bhàrr an làmh, agus loisg e iad air an altair os cionn na h‑ìobairt-loisgte; bu tabhartas-coisrigidh iad a‑chum fàile chùbhraidh; tabhartas air a thoirt suas le teine don Tighearna.

²⁹ Agus ghabh Maois an t‑uchd, agus luaisg e e mar thabhartas-luaisgte an làthair an Tighearna: b’e cuibhreann Mhaois e de reithe a’ choisrigidh; mar a dh’àithn an Tighearna do Mhaois.

³⁰ Agus ghabh Maois cuid den ola-ungaidh, agus den fhuil a bha air an altair, agus chrath e air Aaron i; air a aodach, agus air a mhic, agus air aodach a mhac maille ris: agus naomhaich e Aaron, agus a aodach, agus a mhic, agus aodach a mhac maille ris.

³¹ Agus thubhairt Maois ri Aaron agus ra mhic, Bruithibh an fheòil aig doras pàillean a’ choitheanail, agus ann an sin ithibh i leis an aran a tha ann am basgaid a’ choisrigidh, mar a dh’àithn mise, ag ràdh, Ithidh Aaron agus a mhic i.

³² Agus an nì sin a dh’fhàgar den fheòil agus den aran, loisgidh sibh le teine.

³³ Agus air doras pàillean a’ choitheanail cha tèid sibh a‑mach rè seachd làithean, gus am bi làithean ur coisrigidh air an crìochnachadh: oir rè seachd làithean coisrigidh e sibh.

³⁴ Mar a rinn e an‑diugh, mar sin dh’àithn an Tighearna a bhith dèante, a dhèanamh rèite air ur son.

³⁵ Uime sin, aig doras pàillean a’ choitheanail fanaidh sibh a là agus a dh’oidhche, rè seachd làithean, agus coimheadaidh sibh freasdal an Tighearna, a‑chum nach faigh sibh bàs: oir is ann mar sin a thugadh àithne dhòmhsa.

³⁶ Agus rinn Aaron agus a mhic na h‑uile nithean a dh’àithn an Tighearna le làimh Mhaois.