Isaiah 8 - Am Bìoball Gàidhlig 1992

¹ Agus thubhairt an Tighearna rium, Gabh clàr mòr, agus sgrìobh air le inneal-sgrìobhaidh duine mu Mhaler-salal-has-bas.

² Agus thug mi leam, a‑chum dearbhaidh, fianaisean fìrinneach Uriah an sagart, agus Sechariah mac Ieberechiah.

³ Agus dhlùthaich mi ris a’ bhan-fhàidh; agus dh’fhàs i torrach, agus rug i mac: agus thubhairt an Tighearna rium, Thoir mar ainm air Maher-salal-has-bas:

⁴ Oir mun aithne don leanabh M’athair agus Mo mhàthair a ràdh, togar air falbh saoibhreas Dhamascais agus creach Shamaria ro rìgh Asiria.

⁵ Agus labhair an Tighearna fhathast rium, ag ràdh,

⁶ A chionn gun do chuir an sluagh seo cùl ri uisgeachan Shilòah, a ruitheas gu sèimh; agus gu bheil iad a’ gabhail tlachd ann an Resin agus ann am mac Remaliah:

⁷ Uime sin, feuch, bheir an Tighearna a‑nìos orra uisgeachan na h‑aibhne, làidir agus lìonmhor, eadhon rìgh Asiria agus a uile ghreadhnachas; agus èiridh e os cionn a chlaisean uile, agus thèid e thar a uile bhruachan.

⁸ Agus gabhaidh e roimhe air feadh Iùdah, a’ ruith thairis agus a’ sgaoileadh; eadhon gus am muineal ruigidh e; agus lìonaidh sgaoileadh a sgiathan leud do thìre-sa, O Imanueil.

⁹ Cruinnichibh ri chèile, a chinneacha, agus brisear sibh nur bloighdean: èisdibh, sibhse uile a tha anns na dùthchannan fad as; crioslaichibh sibh fhèin, agus brisear sibh nur bloighdean; crioslaichibh sibh fhèin, agus brisear sibh nur bloighdean.

¹⁰ Cuiribh ur comhairle ri chèile, agus thig i gu neo-bhrìgh; labhraibh am facal, agus cha seas e; oir tha Dia leinne.

¹¹ Oir thubhairt an Tighearna rium, le làimh làidir, agus theagasg e mi, a‑chum nach siùbhlainn ann an slighe an t‑sluaigh seo, ag ràdh,

¹² Na abraibh-sa co‑bhainn ris gach nì ris an abair an sluagh seo co‑bhainn; agus na gabhaibh eagal ron uamhas-san, agus na biodh geilt oirbh.

¹³ Tighearna nan sluagh, naomhaichibh esan fhèin; agus biodh esan dhuibh na chùis-eagail, agus biodh esan dhuibh na adhbhar ball-chrith.

¹⁴ Agus bidh e na ionad naomh; ach na chloich-thuislidh, agus na charraig-oilbheim do dhà thaigh Israeil, na lìon agus na ribe do luchd-àiteachaidh Ierusaleim.

¹⁵ Agus gheibh mòran nam measg tuisleadh, agus tuitidh iad, agus brisear iad, agus ribear agus glacar iad.

¹⁶ Ceangail suas an fhianais, seulaich an lagh am measg mo dheisciobal-sa.

¹⁷ Ach feithidh mise ris an Tighearna a tha a’ falach a ghnùise o thaigh Iàcoib, agus bidh sùil agam ris.

¹⁸ Feuch, tha mise agus a’ chlann a thug an Tighearna dhomh nar comharraidhean agus nar n‑iongantasan ann an Israel, o Thighearna nan sluagh a tha na chòmhnaidh ann an sliabh Shioin.

¹⁹ Agus nuair a their iad ribh, Iarraibh a‑chum nam ban-fhiosaichean, agus a‑chum nan draoidhean, muinntir a nì bìdeil agus borbhanaich; nach bu chòir do shluagh iarraidh a‑chum an Dè? An ann a dh’iarradh iad a‑chum nam marbh, an àite nam beò?

²⁰ Iarradh iad a‑chum an lagha agus a‑chum na fianais: mura labhair iad a rèir an fhacail seo, is ann a chionn nach eil solas annta.

²¹ Agus siùbhlaidh gach aon da thrìd, ann an teinn agus ann an gorta; agus tàrlaidh, nuair a bhios e ann an gorta, gum bi corraich air ris fhèin, agus mallaichidh e a rìgh agus a Dhia, agus e a’ sealltainn suas.

²² Agus seallaidh e air an talamh, agus feuch teanntachd agus doilleireachd; dubhar an àmhghair, agus tiugh-dhorchadas.