Isaiah 3 - Am Bìoball Gàidhlig 1992

¹ Oir feuch, bheir an Tighearna, Tighearna nan sluagh, air falbh o Ierusalem agus o Iùdah an lorg agus am bata, uile lorg an arain, agus uile lorg an uisge,

² An treun-fhear agus am fear-cogaidh, am britheamh agus am fàidh, an duine glic agus an seanair;

³ An ceannard air lethcheud agus an duine urramach, agus an comhairliche, agus am fear-ceàirde seòlta, agus an cainnt-fhear deas-bhriathrach.

⁴ Agus nì mi leanabain nan uachdarain orra, agus riaghlaidh naoidheanan os an cionn.

⁵ Agus bidh an sluagh air an sàrachadh, gach fear le a chèile, agus gach fear le a choimhearsnach; nì an t‑òganach tàir air an aosda, agus an duine an‑uasal air an duine uasal.

⁶ Nuair a ghlacas fear a bhràthair, de thaigh a athar, air a thrusgan, ag ràdh, Thig, agus bi ad fhear-riaghlaidh oirnn, agus biodh an t‑aomadh seo fo do làimh-sa:

⁷ Bheir e briathar air an là sin, ag ràdh, Cha bhi mise am fhear-slànachaidh dhuibh; oir ann am thaigh-sa chan eil biadh no aodach; na cuiribh mise suas am fhear-riaghlaidh air an t‑sluagh.

⁸ Oir tha Ierusalem air aomadh sìos, agus Iùdah air tuiteam; a chionn gu bheil an teanga agus an dèanadas an aghaidh an Tighearna, a chur cathachaidh air sùilean a ghlòire.

⁹ Tha sealladh an gnùise a’ toirt fianais nan aghaidh; agus tha iad a’ dèanamh am peacaidh follaiseach, mar Shòdom; chan eil iad ga fhalach; is truagh dan anaman, oir thug iad olc orra fhèin.

¹⁰ Abraibh ris an ionracan gur math a dh’èireas dha; oir toradh an gnìomharan ithidh iad.

¹¹ Is an‑aoibhinn don aingidh; is olc a dh’èireas dhàsan; oir dìolar dha obair a làmh fhèin.

¹² A‑thaobh mo shluaigh-sa, tha clann a’ dèanamh sàrachaidh orra, agus tha mnathan a’ riaghladh os an cionn. O mo shluagh, tha do chinn-iùil gad chur air seachran, agus a’ fiaradh slighe do cheuman.

¹³ Tha an Tighearna a’ seasamh suas a‑chum tagraidh; agus tha e a’ seasamh a thabhairt breith air an t‑sluagh.

¹⁴ Tionnsgnaidh an Tighearna ann am breitheanas ri seanairean a shluaigh, agus rin uachdarain, oir dh’ith sibh suas am fìonlios; tha creach nam bochd nur taighean.

¹⁵ Ciod as ciall dhuibh, gu bheil sibh a’ pronnadh mo shluaigh, agus a’ bleith aodannan nam bochd? deir Iehòbhah, Tighearna nan sluagh.

¹⁶ Os bàrr, thubhairt an Tighearna, A chionn gu bheil nigheanan Shioin uallach, agus ag imeachd le muinealan sìnte a‑mach, agus le sùilean meara, ag imeachd le ceuman iollagach, agus a’ dèanamh fuaime len casan:

¹⁷ Uime sin nì an Tighearna maol mullach cinn nigheanan Shioin, agus leigidh an Tighearna ris an nàire.

¹⁸ Anns an là sin bheir an Tighearna air falbh àille nan cas-fhàinneachan, agus na brèidean, agus na samhlachan-gealaich,

¹⁹ Na cluigeanan, agus na làmh-fhailean, agus na sgàilean,

²⁰ Na cuaileanan, agus na glùineanan, agus na foilteanan, agus na soireachan-boltraich, agus na cluas-fhàinneachan,

²¹ Na fàinneachan, agus na seudan-sròine,

²² Na trusganan lasach, agus na tonnagan, agus na fallaingean, agus na dealgan,

²³ Na sgàthanan, agus na lèintean anairt, agus na curraicean, agus na bratan-sgàile.

²⁴ Agus an àite deagh fhàile bidh brèine, agus an àite criosa bidh sracadh, agus an àite fuilt air a dheagh-chleachdadh bidh maoile, agus an àite crios-uchd bidh ceanglachan sac-eudaich, agus losgadh an àite maise.

²⁵ Tuitidh do dhaoine leis a’ chlaidheamh, agus do threun-fhir anns a’ chogadh.

²⁶ Agus nì a geatachan caoidh agus bròn; agus suidhidh i gu h‑aonaranach sìos air an làr.