Isaiah 22 - Am Bìoball Gàidhlig 1992

¹ Trom-eallach gleann an taisbeanaidh, Ciod a thàinig ort a‑nis, gun deachaidh tu gu lèir suas gu mullach nan taighean?

² Thusa a bha làn faraim, ad chathair fhuaimnich, ad chathair aoibhinn: do dhaoine a tha air am marbhadh, cha do mharbhadh leis a’ chlaidheamh iad; cha mhò is anns a’ chath a dh’eug iad.

³ Tha do chinn-fheadhna uile air siubhal le chèile, cheangladh iad leis na fir-bhogha; na h‑uile a fhuaireadh annad, cheangladh iad le chèile, theich iad fad air falbh.

⁴ Air an adhbhar sin thubhairt mi, Tionndaidh air falbh uam: guilidh mi gu goirt; na feuchaibh ri comhfhurtachd a thoirt dhomh, airson lèir-chreach nighean mo shluaigh.

⁵ Oir is là cruaidh iomairt e, agus saltairt sìos, agus buairidh, o Iehòbhah, Tighearna nan sluagh, ann an gleann an taisbeanaidh; a’ briseadh sìos bhallachan, agus a’ glaodhaich ris na beanntan.

⁶ Agus tha Elam a’ giùlan a’ bhuilg-shaighead, le carbad de dhaoine agus le marc-shluagh; agus tha Cir a’ rùsgadh na sgèithe.

⁷ Agus tàrlaidh gum bi rogha do ghleann air an lìonadh le carbadan agus cuiridh na marcaich iad fhèin an òrdagh fa chomhair a’ gheata.

⁸ Agus thugadh air falbh còmhdach Iùdah, agus sheall thu an là sin ri airm taigh na frìthe.

⁹ Agus chunnaic sibh beàrnan baile Dhaibhidh, gu bheil iad lìonmhor; agus chruinnich sibh uisgeachan na linne ìochdaraich.

¹⁰ Agus ghabh sibh àireamh taighean Ierusaleim, agus bhris sibh sìos na taighean a neartachadh a’ bhalla.

¹¹ Agus rinn sibh clais eadar an dà bhalla, airson uisge na seann linne; ach cha d’amhairc sibh airsan a rinn e; agus esan a dhealbh o shean e, cha tug sibh fa‑near.

¹² Agus anns an là sin ghairm Iehòbhah, Tighearna nan sluagh, gu gul, agus gu caoidh, agus gu maoile, agus gu crioslachadh le aodach-saic:

¹³ Ach feuch, aoibhneas agus aighear, marbhadh dhamh agus casgairt chaorach, ithe feòla agus òl fìona; itheamaid agus òlamaid, oir a‑màireach gheibh sinn bàs.

¹⁴ Agus dh’fhoillsicheadh le Tighearna nan sluagh nam chluasan, Gu deimhinn cha ghlanar an aingidheachd seo air falbh uaibh, gus am faigh sibh bàs, deir Iehòbhah, Tighearna nan sluagh.

¹⁵ Mar seo deir Iehòbhah, Tighearna nan sluagh, Imich, rach a dh’ionnsaigh an stiùbhaird seo, a dh’ionnsaigh Shebna, a tha os cionn an taighe, agus abair ris,

¹⁶ Ciod a tha agad an seo, agus cò a tha agad an seo, gun do chladhaich thu a‑mach uaigh an seo air do shon fhèin, mar neach a tha a’ cladhach a‑mach uaighe dha fhèin gu h‑àrd, a tha a’ gearradh àite-còmhnaidh dha fhèin ann an carraig?

¹⁷ Feuch tilgidh an Tighearna a‑mach thu, gad thilgeadh a‑mach gu làidir; agus nì e gu cinnteach do chòmhdach.

¹⁸ Gu cinnteach cuiridh e car dhìot mun cuairt, agus bheir e urchair air falbh dhut mar spitheig gu tìr fharsaing; ann an sin gheibh thu bàs, agus ann an sin bidh do charbadan sgiamhach nan nàire do thaigh do thighearna.

¹⁹ Agus iomainidh mi ad àite thu, agus od inbhe tilgidh mi sìos thu.

²⁰ Agus tàrlaidh anns an là sin gun gairm mise m’òglach Eliacim mac Hilciah;

²¹ Agus sgeadaichidh mi e led fhallaing-sa, agus led chrios neartaichidh mi e; agus d’uachdaranachd bheir mi thairis na làimh; agus bidh e na athair do luchd-àiteachaidh Ierusaleim, agus do thaigh Iùdah.

²² Agus iuchair taigh Dhaibhidh cuiridh mi air a ghualainn; agus fosglaidh e, agus cha druid aon neach; agus druididh e, agus chan fhosgail aon neach.

²³ Agus daingnichidh mi e mar tharraing ann an àite cinnteach; agus bidh e mar chathair ghlòrmhoir airson taigh a athar.

²⁴ Agus crochaidh iad airsan uile ghlòir taigh a athar, an sliochd agus an gineal, gach soitheach beag, o gach uile ghnè chuach gus gach uile ghnè aghann.

²⁵ Anns an là sin, deir Tighearna nan sluagh, bidh an tarrang a bha air a suidheachadh ann an àite daingeann air a h‑atharrachadh; agus gearrar sìos i, agus tuitidh i; agus gearrar an eallach a bha oirre air falbh; oir labhair an Tighearna e.