Iob 6 - Am Bìoball Gàidhlig 1992

¹ Ach fhreagair Iob, agus thubhairt e,

² O nach robh mo dhoilgheas air a làn-chothromachadh, agus mo dhòrainn togte anns na meidhean le chèile!

³ Oir a‑nis bhiodh e na bu truime na gaineamh na fairge: uime sin tha mo bhriathran air an slugadh suas.

⁴ Oir tha saighdean an Uile-chumhachdaich annam, agus tha an nimh ag òl suas mo spioraid: tha uamhasan Dhè gan cur fhèin an òrdagh catha am aghaidh.

⁵ An dèan am fiadh-asal sitrich os cionn feòir? An dèan an damh geum os cionn a innlinn?

⁶ An gabh an nì a tha neo-bhlasda ithe gun salann? A bheil blas air gealagan an uibhe?

⁷ Tha m’anam a’ diùltadh beantainn riu: tha iad sin mar mo bhiadh bròin.

⁸ O nach tugte dhomh m’athchuinge; agus gun deònaicheadh Dia dhomh mo mhiann!

⁹ Agus gum bu toil le Dia mo sgrios; gun cuireadh e a‑mach a làmh, agus gun gearradh e as mi!

¹⁰ An sin bhiodh furtachd agam fhathast, ged bhithinn air mo chruadhachadh ann an do‑bhròn, agus nach caomhnadh e; oir cha do cheil mi briathran an Aoin naoimh.

¹¹ Ciod e mo neart, gum biodh dòchas agam? Agus ciod i mo chrìoch, gun sìninn mo bheatha?

¹² An e neart nan clach mo neart? A bheil m’fheòil de umha?

¹³ Nach eil mo chobhair annam fhèin? Agus an d’fhuadaicheadh gliocas uam?

¹⁴ Dhàsan a thrèigeas a charaid is mòr am masladh e; trèigidh e mar an ceudna eagal an Uile-chumhachdaich.

¹⁵ Mheall mo bhràithrean mi mar shruth: mar neart nan sruth ghabh iad seachad;

¹⁶ A bhios dubh le eigh; anns am falaichear an sneachd:

¹⁷ Nuair a leaghas iad, thèid as dhaibh; nuair a dh’fhàsas e teth, caithear as an àit iad.

¹⁸ Tha ceuman an slighe air claonadh: thig iad gu neoni, agus sgriosar iad.

¹⁹ Dh’amhairc buidhnean Thema, dh’fheith cuideachdan Shèba orra.

²⁰ Bha iad fo amhluadh, a chionn ro sin gu robh dòchas aca: thàinig iad an sin, agus bha nàire orra.

²¹ Ach a‑nis tha sibhse nur neoni; chì sibh mo bhriseadh-cridhe, agus tha eagal oirbh.

²² An dubhairt mi, Thugaibh am ionnsaigh? No dur maoin thugaibh tìodhlac air mo shon?

²³ No tèarnaibh mi o làimh an nàmhaid? No o làimh nan cumhachdach saoraibh mi?

²⁴ Teagaisgibh mi, agus bidh mi am thosd; agus ma chaidh mi a’ bheag am mearachd, thugaibh orm a thuigsinn.

²⁵ Nach neartmhor briathran ceart? Ach ciod a chronaicheas esan a chronaicheas nur measg?

²⁶ An smaoinich sibh air briathran a chronachadh, agus cainnt an eu‑dòchasaich, a tha mar ghaoith?

²⁷ Seadh, tha sibh a’ leum air an dìlleachdan, agus a’ cladhach sluic dur caraid.

²⁸ A‑nis, uime sin, mas toil leibh, amhaircibh orm; agus bidh e soilleir dhuibh ma nì mi breug.

²⁹ Tillibh, guidheam oirbh, na biodh euceart ann; seadh, tillibh fhathast, tha m’fhìreantachd-sa ann.

³⁰ A bheil ann am theangaidh euceart? Nach aithnich mo bhlas nithean fiara?