Iob 40 - Am Bìoball Gàidhlig 1992

¹ A thuilleadh air seo fhreagair an Tighearna Iob, agus thubhairt e,

² An teagaisg esan a nì strì ris an Uile-chumhachdach? Esan a thagras ri Dia, freagradh e air a shon.

³ Agus fhreagair Iob an Tighearna agus thubhairt e,

⁴ Feuch, tha mi gràineil; ciod a fhreagras mi dhut? Cuiridh mi mo làmh air mo bheul.

⁵ Aon uair labhair mi, ach cha fhreagair mi; seadh, dà uair, ach chan abair mi tuilleadh.

⁶ An sin fhreagair an Tighearna Iob as a’ chuairt-ghaoith, agus thubhairt e,

⁷ Crioslaich a‑nis mar dhuine do leasraidh: feòraichidh mi dhìot, agus freagair thusa mi.

⁸ An toir thusa mo bhreitheanas-sa gu neoni? An dìt thu mise, a‑chum gun saorar thu fhèin?

⁹ A bheil gàirdean agad cosmhail ri Dia? No an dèan thu tàirneanach le guth cosmhail ris-san?

¹⁰ Sgeadaich thu fhèin a‑nis le mòrachd agus le òirdheirceas, agus èidich thu fhèin le glòir agus maise.

¹¹ Taom a‑mach fraoch d’fheirge, agus faic gach neach a tha uaibhreach, agus irioslaich e.

¹² Faic gach neach a tha uaibhreach, ìslich e, agus saltair sìos na droch dhaoine nan àite.

¹³ Falaich iad anns an duslach le chèile, ceangail an aghaidhean ann an diamhaireachd.

¹⁴ An sin mar an ceudna aidichidh mise dhut gun saor do dheaslàmh fhèin thu.

¹⁵ Feuch a‑nis Behemot, a rinn mise maille riut; ithidh e feur mar dhamh.

¹⁶ Feuch a‑nis, tha a neart na leasraidh, agus a spionnadh ann an imleig a bhronn.

¹⁷ Gluaisidh e a earball mar sheudar: tha fèithean-luthaidh a shlèisdean ceangailte ri chèile.

¹⁸ Tha a chnàmhan làidir mar umha; tha a chnàmhan mar chroinn iarainn.

¹⁹ Is e tùs slighean Dhè e: an tì a chruthaich e, faodaidh esan a chlaidheamh a thoirt am fagas dha.

²⁰ Gu cinnteach bheir na slèibhtean dha feur, far am bi uile bheathaichean na machrach ri sùgradh.

²¹ Fo na croinn dhubharach laighidh e, ann am falach na cuilce agus na làthaich.

²² Còmhdaichidh na croinn dhubharach e len sgàil: cuartaichidh seileach an t‑sruthain e.

²³ Feuch, thig abhainn gu cruaidh air, agus cha dèan e deifir: bidh dòchas aige nuair a thig Iòrdan a‑mach ga bheul.

²⁴ Na shùilean an glac duine e? Le dubhain an toll e a shròn?