Iob 38 - Am Bìoball Gàidhlig 1992

¹ An sin fhreagair an Tighearna Iob as a’ chuairt-ghaoith, agus thubhairt e,

² Cò e seo a tha a’ dorchachadh comhairle le briathran gun eòlas?

³ Crioslaich a‑nis mar fhear do leasraidh, agus feòraichidh mi dhìot, agus freagair thusa mi.

⁴ Càit an robh thu nuair a leag mise bunaitean na talmhainn? Innis, ma tha tuigse agad.

⁵ Cò a shuidhich a thomhaisean, mas aithne dhut, no cò a shìn an t‑sreang-thomhais air?

⁶ Ciod air a bheil a bhunaitean air an daingneachadh, no cò a leag a chlach-oisinn,

⁷ Nuair a sheinn reultan na maidne cuideachd, agus a rinn uile mhic Dhè gàirdeachas?

⁸ No cò a dhruid a‑staigh an fhairge le dorsan nuair a bhris i a‑mach mar gun tigeadh i as a’ bhroinn;

⁹ Nuair a rinn mi neul na thrusgan dhi, agus tiugh dhorchadas na chrios-pasgaidh dhi;

¹⁰ Agus a bhris mi suas dhi m’àite suidhichte, agus a rinn mi dhi crannan agus dorsan;

¹¹ Agus a thubhairt mi, Gu ruig seo thig thu, ach cha tig nas fhaide, agus an seo caisgear do thonnan uaibhreach?

¹² O thoiseach do làithean an tug thu àithne don mhadainn? An tug thu fios a h‑àite don sgarthanaich?

¹³ A‑chum greim a ghabhail de chrìochan na talmhainn, agus gun crathte na h‑aingidh as.

¹⁴ Tionndaidhear e mar chriadh ris an t‑seula; agus seasaidh iadsan mar aodach.

¹⁵ Agus cumar an solas o na h‑aingidh, agus brisear an gàirdean àrd.

¹⁶ An deachaidh tu a‑steach gu tobraichean na fairge? No ann an rannsachadh an dubh-aigein an d’imich thu?

¹⁷ An d’fhosgladh geatachan a’ bhàis dhut? No am faca tu dorsan sgàil a’ bhàis?

¹⁸ An tug thu fa‑near leud na talmhainn? Innis, mas aithne dhut e uile.

¹⁹ Càit a bheil an t‑slighe anns an còmhnaich an solas? Agus an dorchadas, càit a bheil a ionad-san?

²⁰ Gun gabhadh tu e ga chrìch, agus gum b’aithne dhut na ceuman a dh’ionnsaigh a thaighe?

²¹ An aithne dhut e, a chionn gun do rugadh tu an sin, no gu bheil àireamh do bhliadhnachan mòr?

²² An deachaidh tu a‑steach gu ionmhasan an t‑sneachda? No am faca tu ionmhasan na cloiche-meallain,

²³ A thaisg mise fa chomhair aimsir na teanntachd, fa chomhair là a’ chatha agus a’ chogaidh?

²⁴ Cia an rathad a dhealaichear an solas, a sgaoileas a’ ghaoth an ear air an talamh?

²⁵ Cò a roinn sruth-chlais airson na tuile, agus slighe airson dealanach na tàirneanaich;

²⁶ A thoirt air frasadh air an talamh far nach eil duine; air an fhàsach gun duine ann;

²⁷ A shàsachadh an fhàsaich agus an dìthreibh, agus a thoirt air cinneas an luis mhaoith fàs suas?

²⁸ A bheil athair aig an uisge? No cò a ghin braoin an drùchda?

²⁹ A broinn cò an tàinig an eigh? Agus liath-reodhadh nan speur, cò a ghin e?

³⁰ Mar chloich tha na h‑uisgeachan air an cruadhachadh, agus aghaidh na doimhne air reodhadh.

³¹ Am faod thusa cumhachdan milis Phleiades a cheangal, no ceanglaichean Orioin fhuasgladh?

³² An toir thu a‑mach Madsarot na àm? No an stiùir thu Arcturus maille ra mhic?

³³ An aithne dhut reachdan nan nèamh? An suidhich thu an uachdaranachd air an talamh?

³⁴ An tog thu suas a dh’ionnsaigh nan neul do ghuth, air chor is gun còmhdaich pailteas uisgeachan thu?

³⁵ An cuir thu uat dealanaich, agus an tèid iad, agus an abair iad riut, Tha sinn an seo?

³⁶ Cò a chuir gliocas anns an taobh a‑staigh? No cò a thug tuigse don chridhe?

³⁷ Cò a dh’àireamhas na neòil an gliocas? No cò a chaisgeas searragan nan nèamh;

³⁸ Nuair a dh’fhàsas an duslach na mheall cruaidh, agus a dhlùth-leanas na fòidean ri chèile?

³⁹ An sealg thusa cobhartach don leòmhann bhoireann, agus an sàsaich thu cìocras nan leòmhann òga;

⁴⁰ Nuair a chrùbas iad nan garaidhean, a dh’fhanas iad ann an sgàil a‑chum feall-fheitheimh?

⁴¹ Cò a sholaras don fhitheach a lòn? An uair a dh’èigheas an t‑àl òg aige ri Dia, thèid iad air iomrall a chion bìdh.