Iob 35 - Am Bìoball Gàidhlig 1992

¹ Fhreagair Elihu a‑rìs, agus thubhairt e,

² An saoil thusa seo a bhith ceart, gun dubhairt thu, Tha m’fhìreantachd-sa os cionn fìreantachd Dhè;

³ Oir thubhairt thu, Ciod an tairbhe a bhios ann dhutsa? Agus, ciod a’ bhuannachd a bhios ann dhòmhsa, ma shaorar mi om pheacadh?

⁴ Freagraidh mise thu, agus do chompanaich maille riut.

⁵ Amhairc air na nèamhan, agus, feuch; agus faic na neòil as àirde na thu.

⁶ Ma pheacaicheas tu, ciod a nì thu na aghaidh-san? Agus ma dh’fhàsas d’easaontais lìonmhor, ciod a nì thu airsan?

⁷ Ma bhios tu ionraic, ciod a bheir thu dhàsan? No ciod a gheibh e od làimh?

⁸ Faodaidh d’aingidheachd cron a dhèanamh do dhuine mar a tha thusa, agus d’fhìreantachd a bhith tairbheach do mhac an duine.

⁹ Glaodhaidh iadsan a tha air an sàrachadh le mòran, èighidh iad airson gàirdean na mòr-chuideachd.

¹⁰ Ach chan abair aon neach, Càit a bheil Dia mo Chruithear, a tha a’ tabhairt dhàn seachad anns an oidhche,

¹¹ A tha gar teagasg nas mò na ainmhidhean na talmhainn, agus gar dèanamh nas glice na eunlaith nan speur?

¹² An sin èighidh iad, ach cha fhreagair neach air bith iad, airson uabhar dhroch dhaoine.

¹³ Gu cinnteach chan èisd Dia ri dìomhanas, agus cha bhi meas aig an Uile-chumhachdach air.

¹⁴ Ged their thu nach faic thu e, tha breitheanas na làthair; uime sin earb thusa as.

¹⁵ Ach a‑nis a chionn nach eil e mar sin, dh’fhiosraich e na chorraich; gidheadh chan aithne dha sin ann an deuchainn mhòir.

¹⁶ Uime sin fosglaidh Iob a bheul gu dìomhain: nì e briathran lìonmhor gun eòlas.