Iob 26 - Am Bìoball Gàidhlig 1992

¹ Ach fhreagair Iob, agus thubhairt e,

² Cionnas a chuidich thu leis an tì a tha gun chumhachd? Cionnas a shaor thu an gàirdean a tha gun neart?

³ Cionnas a chomhairlich thu esan aig nach eil gliocas, agus a dh’fhoillsich thu gu pailt an nì mar a tha e?

⁴ Cò ris a labhair thu briathran? Agus cò leis an spiorad a thàinig uat?

⁵ Dealbhar nithean marbha fo na h‑uisgeachan, agus an luchd-àiteachaidh.

⁶ Lomnochd tha ifrinn na làthair, agus chan eil còmhdachadh air lèirsgrios.

⁷ Tha e a’ sìneadh na h‑àird a tuath os cionn an ionaid fhalaimh, a’ crochadh na talmhainn air neoni;

⁸ A’ ceangal suas nan uisgeachan na neòil, agus cha reubar an neul fodhpa;

⁹ A’ cumail a‑staigh aghaidh a rìgh-chathrach, a’ sgaoileadh a neòil oirre.

¹⁰ Chuartaich e na h‑uisgeachan le crìochan, gus an teirig an là maille ris an oidhche.

¹¹ Criothnaichidh puist nan nèamh, agus bidh uamhas orra ra achmhasan.

¹² Le a chumhachd roinnidh e an fhairge, agus le a thuigse buailidh e an t‑uaibhreach.

¹³ Le a spiorad sgeadaich e na nèamhan; dhealbh a làmh an nathair lùbach.

¹⁴ Feuch, is iad sin cuid de a shlighean; ach cia beag a’ chuibhreann a chuala sinn dheth? Agus cò a dh’fhaodas tàirneanach a chumhachd a thuigsinn?