Iob 22 - Am Bìoball Gàidhlig 1992

¹ An sin fhreagair Eliphas an Temanach, agus thubhairt e,

² Do Dhia am faod duine a bhith tairbheach, mar a dh’fhaodas esan a tha glic a bhith tairbheach dha fhèin?

³ An toil-inntinn don Uile-chumhachdach gun saor thusa thu fhèin? Agus am buannachd e dhàsan, gun dèan thu do shlighean iomlan?

⁴ Air eagal romhad an cronaich e thu? An tèid e a‑chum breitheanais leat?

⁵ Nach eil d’aingidheachd mòr, agus d’euceartan gun chrìch?

⁶ Oir ghabh thu geall od bhràithrean gun adhbhar, agus aodach nan lomnochd bhuin thu dhiubh.

⁷ Cha tug thu uisge don sgìth ri òl, agus on acrach chùm thu aran.

⁸ Ach aig fear a’ ghàirdein làidir bha an talamh; agus ghabh an duine urramach còmhnaidh ann.

⁹ Chuir thu bantraichean uat falamh, agus bhriseadh gàirdeanan nan dìlleachdan.

¹⁰ Air an adhbhar sin mun cuairt ort bha ribeachan, agus ghlac geilt obann thu;

¹¹ No dorchadas air chor is nach faiceadh tu; agus chòmhdaich pailteas uisgeachan thu.

¹² Nach eil Dia ann an àirde nan nèamh? Agus faic mullach nan rionnag, cia àrd a tha iad.

¹³ Agus their thusa, Cionnas a tha fhios aig Dia? Tron dorchadas am breithnich e?

¹⁴ Tha neòil nan còmhdachadh dha, agus chan fhaic e; agus ann an cùirt nan nèamh siùbhlaidh e.

¹⁵ An tug thu fa‑near an t‑slighe o shean, air an d’imich daoine aingidh;

¹⁶ A ghearradh sìos ron àm, agus thaom tuil thar am bunait;

¹⁷ A thubhairt ri Dia, Imich uainn; agus ciod as urrainn an t‑Uile-chumhachdach a dhèanamh air ar son?

¹⁸ Gidheadh lìon e an taighean le nithean matha: ach guma fada a bhios comhairle nan aingidh uamsa.

¹⁹ Chì na h‑ionraic, agus bidh aoibhneas orra; agus nì an neo-chiontach gàire-fanaid riu.

²⁰ An àite, nach do ghearradh ar maoin-ne sìos; ach loisgidh teine am fuidheall-san.

²¹ Gabh-sa a‑nis eòlas airsan, agus bi an sìth: mar sin thig math ad ionnsaigh.

²² Gabh, guidheam ort, an lagh o a bheul, agus cuir suas a bhriathran ann ad chridhe.

²³ Ma thilleas tu a dh’ionnsaigh an Uile-chumhachdaich, togar suas thu; cuiridh tu euceart am fad od phàilleanan.

²⁴ Agus cuiridh tu suas òr mar dhuslach, agus òr Ophir mar chlachan nan sruth.

²⁵ Agus bidh an t‑Uile-chumhachdach na dhìdean agad, agus bidh pailteas airgid agad.

²⁶ Oir an sin bidh do thlachd anns an Uile-chumhachdach, agus togaidh tu suas do ghnùis a dh’ionnsaigh Dhè.

²⁷ Nì thu ùrnaigh ris, agus èisdidh e riut, agus dìolaidh tu do bhòidean.

²⁸ Agus cuiridh tu nì romhad, agus daingnichear dhut e; agus air do shlighean dealraichidh solas.

²⁹ Nuair a dh’ìslichear daoine, an sin their thu, Bidh àrdachadh ann; agus saoraidh e an t‑iriosal.

³⁰ Saoraidh e esan nach eil neo-chiontach, agus saorar e le glaine do làmh-sa.