Ieremiah 52 - Am Bìoball Gàidhlig 1992

¹ Bha Sedeciah bliadhna ar fhichead a dh’aois nuair a thòisich e air rìoghachadh, agus rìghich e aon-bhliadhna-deug ann an Ierusalem; agus b’e ainm a mhàthar Hamutal, nighean Ieremiah o Libnah.

² Agus rinn e an nì sin a bha olc ann an sùilean an Tighearna, a rèir gach nì a rinn Iehoiacim.

³ Oir tro fheirg an Tighearna thàrladh ann an Ierusalem agus ann an Iùdah, gus an do thilg e iad a‑mach as a fhianais, gun do rinn Sedeciah ar‑a‑mach an aghaidh rìgh Bhàbiloin.

⁴ Agus thàrladh anns an naoidheamh bliadhna de a linn, anns an deicheamh mìos, air an deicheamh là den mhìos, gun tàinig Nebuchadnesar rìgh Bhàbiloin, e fhèin agus uile fheachd, an aghaidh Ierusaleim, agus shuidhich iad camp na h‑aghaidh, agus thog iad daingnichean na h‑aghaidh, air gach taobh.

⁵ Mar sin bha a’ chathair air a teannachadh gus an aon-bhliadhna-deug de linn rìgh Shedeciah.

⁶ Agus anns a’ cheathramh mìos, air an naoidheamh là den mhìos, bha a’ ghorta trom anns a’ chathair, agus cha robh aran air bith aig muinntir na tìre.

⁷ An sin bha a’ chathair air a briseadh sìos, agus theich na fir-chogaidh uile, agus chaidh iad a‑mach as a’ chathair feadh na h‑oidhche, air slighe a’ gheata, eadar an dà bhalla a bha aig lios an rìgh (nuair a bha na Caldèanaich aig a’ chathair timcheall mun cuairt), agus dh’imich iad air slighe a’ chòmhnaird.

⁸ Ach lean feachd nan Caldèanach air tòir an rìgh, agus rug iad air Sedeciah ann an còmhnardan Iericho; agus bha a fheachd uile air an sgapadh uaithe.

⁹ Agus ghlac iad an rìgh, agus thug iad suas e gu rìgh Bhàbiloin, aig Riblah, ann am fearann Hamait, far an tug e breitheanas air.

¹⁰ Agus mharbh rìgh Bhàbiloin mic Shedeciah fa chomhair a shùl: mharbh e mar an ceudna uile cheannardan Iùdah ann an Riblah.

¹¹ Agus chuir e a‑mach sùilean Shedeciah, agus cheangail e le slabhraidhean e; agus thug rìgh Bhàbiloin leis e gu Bàbilon, agus chuir e ann am prìosan e gu là a bhàis.

¹² Agus anns a’ chòigeamh mìos, air an deicheamh là den mhìos (b’i sin an naoidheamh-bliadhna-deug de linn Nebuchadnesair rìgh Bhàbiloin), thàinig Nebusaradan, ceannard an fhreiceadain, a fhritheil do rìgh Bhàbiloin, gu Ierusalem.

¹³ Agus loisg e taigh an Tighearna, agus taigh an rìgh; agus uile thaighean Ierusaleim, eadhon a h‑uile taigh mòr loisg e le teine.

¹⁴ Agus bhris uile fheachd nan Caldèanach, a bha le ceannard an fhreiceadain, ballachan Ierusaleim sìos air gach taobh.

¹⁵ Agus cuid de bhochdan an t‑sluaigh, agus fuidheall an t‑sluaigh a dh’fhan anns a’ chathair, agus iadsan a chaidh thairis gu rìgh Bhàbiloin, agus a’ chuid eile den t‑sluagh, thug Nebusaradan ceannard an fhreiceadain air falbh nam braighdean.

¹⁶ Ach cuid de bhochdan an fhearainn dh’fhàg Nebusaradan, ceannard an fhreiceadain, gu bhith nan luchd-deasachaidh fhìonainean, agus nan treabhaichean.

¹⁷ Agus na puist umha a bha ann an taigh an Tighearna, agus na buinn, agus an fhairge umha a bha ann an taigh an Tighearna, bhris na Caldèanaich, agus thug iad an umha uile gu Bàbilon.

¹⁸ Na coireachan fòs, agus na sluasaidean, agus na smàladairean, agus na cuachan, agus na liadhan, agus na h‑uile shoithichean umha, leis an do fhritheil iad, thug iad air falbh.

¹⁹ Agus na soithichean-ionnlaid, agus na h‑aighnean-teine, agus na cuachan, agus na coireachan, agus na coinnleirean, agus na liadhan, agus na cupain, a’ chuid a bha de òr na òr; agus a’ chuid a bha de airgead na airgead, thug ceannard an fhreiceadain air falbh.

²⁰ An dà phost, an aon fhairge, agus an dà‑tharbh-dheug umha, a bha fo na buinn a rinn rìgh Solamh airson taigh an Tighearna, cha robh tomhas air umha nan soithichean seo uile.

²¹ A‑thaobh nam post, b’e àirde gach aon phuist ochd-deug làmh-choille; agus dhèanadh sreang dà làmh-choille dheug a thomhas mun cuairt; agus b’e a thighead ceithir òirlich, fàs a‑staigh.

²² Agus bha coron umha air; agus b’e còig làmhan-coille àirde gach aon choroin, le lìon-obair agus pomgranatan air na coroin mun cuairt, an t‑iomlan de umha; air a’ phost eile mar an ceudna bha pomgranatan cosmhail riu seo.

²³ Agus bha sia-deug agus ceithir-fichead pomgranat air aon taobh, ceud pomgranat air an lìon-obair uile mun cuairt.

²⁴ Agus thug ceannard an fhreiceadain leis Seraiah an t‑àrd-shagart, agus Sephaniah an dara sagart, agus na trì dorsairean;

²⁵ Thug e fòs as a’ chathair caillteanach air an robh cùram nam fear-cogaidh, agus seachd fir dhiubhsan a bha dlùth do phearsa an rìgh, a fhuaireadh anns a’ chathair, agus àrd-sgrìobhaiche an t‑sluaigh, a ghabh àireamh muinntir an fhearainn, agus trì-fichead fear de mhuinntir an fhearainn, a fhuaireadh ann am meadhon a’ bhaile;

²⁶ Ghabh eadhon Nebusaradan ceannard an fhreiceadain iad, agus thug e iad a‑chum rìgh Bhàbiloin gu Riblah.

²⁷ Agus bhuail rìgh Bhàbiloin iad, agus chuir e gu bàs iad ann an Riblah, ann am fearann Hamait: mar sin thugadh Iùdah air falbh ann am bruid as a fhearann fhèin.

²⁸ Seo an sluagh a thug Nebuchadnesar air falbh ann am bruid: anns an t‑seachdamh bliadhna, trì mìle Iùdhach agus trì-ar‑fhichead.

²⁹ Ann an ochdamh-bliadhna-deug Nebuchadnesair, thug e air falbh ann am bruid o Ierusalem ochd ceud anam agus a dhà-dheug ar fhichead.

³⁰ Ann an treas-bliadhna-fichead Nebuchadnesair, thug Nebusaradan, ceannard an fhreiceadain, air falbh ann am bruid de na h‑Iùdhaich, seachd ceud, dà‑fhichead agus còig anam: b’iad na h‑anaman uile ceithir mìle agus sia ceud.

³¹ Agus thàrladh anns an t‑seachdamh-bliadhna-deug ar fhichead de bhraighdeanas Iehoiacim rìgh Iùdah, anns an dara-mìos-deug, air a’ chòigeamh-là‑fichead den mhìos, gun do thog Ebhil-merodach rìgh Bhàbiloin, anns a’ chiad bhliadhna de a linn, suas ceann Iehoiacim rìgh Iùdah, agus thug e a‑mach à prìosan e.

³² Agus labhair e gu caomhail ris, agus chuir e a chathair os cionn cathraichean nan rìghrean a bha leis ann am Bàbilon.

³³ Agus dh’atharraich e a chulaidh-phrìosain: agus dh’ith e aran na fhianais a ghnàth, fad uile làithean a bheatha.

³⁴ Agus airson a lòin làitheil, thugadh dha o rìgh Bhàbiloin gach aon là cuibhreann gu là a bhàis, fad uile làithean a bheatha.