Ieremiah 51 - Am Bìoball Gàidhlig 1992

¹ Mar seo tha an Tighearna ag ràdh, Feuch, dùisgidh mise suas an aghaidh Bhàbiloin, agus an aghaidh na muinntir a tha a chòmhnaidh ann am meadhon an dream sin a tha ag èirigh am aghaidh, gaoth sgriosach:

² Agus cuiridh mi gu Bàbilon luchd-fasgnaidh, agus fasgnaidh iad i, agus falmhaichidh iad a fearann; oir cuartaichidh iad air gach taobh i ann an là na h‑airce.

³ Lùbadh an saighdear gun tàmh a bhogha, agus na cuireadh e dheth a lùireach; agus na caomhnaibh a h‑òganaich, sgriosaibh gu buileach an t‑iomlan de a feachd.

⁴ Agus tuitidh iadsan a mharbhar ann an tìr nan Caldèanach, agus iadsan a bhuailear troimhe, na sràidean.

⁵ Oir cha do dhìobradh Israel no Iùdah le a Dhia, le Tighearna nan sluagh, ged bha am fearann air a lìonadh le peacadh an aghaidh Tì naomh Israeil.

⁶ Teichibh a‑mach à meadhon Bhàbiloin, agus sàbhaladh gach neach a anam, mun gearrar as sibh na h‑aingidheachd; oir is i seo aimsir dìoghaltas an Tighearna; ìocaidh e luigheachd dhi.

⁷ Bu chupan òir Bàbilon ann an làimh an Tighearna, a chuir air mhisg an talamh uile: de a fhìon dh’òl na cinnich, uime sin tha na cinnich air bhoile.

⁸ Thuit Bàbilon gu h‑obann, agus mhilleadh i; guilibh os a cionn; gabhaibh ìoc airson a leòin, ma dh’fhaodar mar sin a leigheas.

⁹ B’àill leinne Bàbilon a leigheas, ach chan eil i air a leigheas; trèigibh i, agus rachamaid gach aon da dhùthaich fhèin: oir ràinig a breitheanas na nèamhan, agus thogadh suas e gus na speuran.

¹⁰ Thug an Tighearna saorsa dhuinne: thigibh agus cuireamaid an cèill ann an Sion obair an Tighearna ar Dia.

¹¹ Geuraichibh na saighdean; cruinnichibh na sgiathan; dhùisg an Tighearna suas spiorad rìghrean Mhedia; oir tha a rùn an aghaidh Bhàbiloin, a‑chum a sgrios: gu deimhinn is e dìoghaltas an Tighearna a tha ann, dìoghaltas a theampaill.

¹² Fa chomhair ballachan Bhàbiloin cuiribh suas a’ bhratach, dèanaibh am freiceadan làidir; suidhichibh luchd-faire, deasaichibh luchd feall-fhalach; oir mar a dhealbh an Tighearna, mar an ceudna rinn e, na nithean sin a labhair e an aghaidh luchd-àiteachaidh Bhàbiloin.

¹³ O thusa a tha a chòmhnaidh air mòran uisgeachan, saoibhir ann an ionmhasan, thàinig do chrìoch, tomhas do shannt.

¹⁴ Thug Tighearna nan sluagh mionnan air fhèin, ag ràdh, Gu deimhinn lìonaidh mi thu le daoine mar gum b’ann le lòcaist, agus togaidh iad suas iolach ann ad aghaidh.

¹⁵ Rinn esan an talamh le a chumhachd, shocraich e an saoghal le a ghliocas, agus le a thuigse sgaoil e a‑mach na nèamhan.

¹⁶ Nuair a chuireas e a‑mach a ghuth, tha toirm uisgeachan anns na nèamhan, agus bheir e air a’ cheò dol suas o iomallan na talmhainn; nì e dealanach le frasan agus bheir e a‑mach a’ ghaoth as a ionadan-tasgaidh.

¹⁷ Dh’fhàs gach duine mar bhrùid na eòlas; nàraicheadh gach òr‑cheàrd le ìomhaigh leaghte: oir is nì breugach an dealbhan leaghte, agus chan eil anail annta.

¹⁸ Is nì faoin iad, obair mhearachd: ann an àm an smachdachaidh thèid iad am mugha.

¹⁹ Cha chosmhail riu seo Cuibhreann Iàcoib, oir is esan Fear-cumaidh an domhain uile; agus is e Israel slat a oighreachd; Tighearna nan sluagh is e a ainm.

²⁰ Is tu mo thuagh-chatha, agus m’acfhainn-chogaidh; agus leatsa brisidh mi nam bloighdean cinnich; agus leatsa millidh mi rìoghachdan;

²¹ Agus leatsa brisidh mi nam bloighdean an t‑each agus a mharcach; agus leatsa brisidh mi na bhloighdean an carbad, agus esan a shuidheas air:

²² Agus leatsa brisidh mi nam bloighdean am fear agus a’ bhean; agus leatsa brisidh mi nam bloighdean an seann duine agus an leanabh; agus leatsa brisidh mi nam bloighdean an t‑òganach agus a’ ghruagach;

²³ Agus leatsa brisidh mi nam bloighdean am buachaille agus a threud; agus leatsa brisidh mi nam bloighdean an treabhaiche agus a chuing; agus leatsa brisidh mi nam bloighdean cinn-fheadhna agus luchd-riaghlaidh.

²⁴ Agus dìolaidh mi air Bàbilon, agus air uile luchd-àiteachaidh Chaldèa, an uile olc a rinn iad ann an Sion nur sealladh-se, deir an Tighearna.

²⁵ Feuch, tha mise ann ad aghaidh. O shlèibh sgriosaich, deir an Tighearna, a tha a’ sgrios na talmhainn uile; agus sìnidh mi mo làmh a‑mach ort, agus iomainidh mi thu sìos o na creagan, agus nì mi beinn loisgte dhìot.

²⁶ Agus cha ghabh iad dhìot clach airson oisne, no clach airson bhunaitean; ach ann ad chùirn lèirsgrios bidh tu gu sìorraidh, deir an Tighearna.

²⁷ Cuiribh suas bratach anns an fhearann, sèidibh an trompaid am measg nan cinneach, deasaichibh na h‑aghaidh cinnich, gairmibh an ceann a chèile na h‑aghaidh rìoghachdan, Ararat, Mini, agus Aschenas; sònraichibh ceann-feadhna na h‑aghaidh; thugaibh air na h‑eich teachd a‑nìos mar na lòcaist fhriodhanach.

²⁸ Deasaichibh na h‑aghaidh cinnich, rìghrean Mhedia, a cinn-fheadhna, agus a h‑uile luchd-riaghlaidh, agus uile fhearann a tighearnais.

²⁹ Agus bidh crith air an fhearann, agus doilgheas; oir seasaidh comhairle an Tighearna an aghaidh Bhàbiloin gu daingeann, a dhèanamh tìr Bhàbiloin na fàsach, gun neach ga h‑àiteachadh.

³⁰ Leig laoich Bhàbiloin dhiubh cogadh, dh’fhan iad ann an daingnichean; dh’fhàilnich an treise, dh’fhàs iad mar mhnathan; loisgeadh a h‑ionadan-còmhnaidh; bhriseadh a croinn-dhruididh.

³¹ Greasaidh fear-ruith gu luath an còdhail fir-ruithe, agus teachdaire an còdhail teachdaire, a dh’innse do rìgh Bhàbiloin gun do ghlacadh a chathair aig a ceann;

³² Agus tha na slighean air an glacadh, agus a’ chuilceach loisg iad le teine, agus tha na fir-chogaidh air am bualadh le uamhann.

³³ Oir mar seo tha Tighearna nan sluagh, Dia Israeil, ag ràdh, Tha nighean Bhàbiloin mar ùrlar-bualaidh; fhathast tiota beag, agus thig àm a bualaidh, agus àm a buain.

³⁴ Dh’ith Nebuchadnesar rìgh Bhàbiloin suas sinn, chaith e sinn, rinn e sinn nar soitheach falamh; shluig e suas sinn mar dhràgon; lìon e a bhrù le ar nithean blasda, thilg e a‑mach sinn.

³⁵ Gu robh an t‑ainneart a rinneadh ormsa agus air m’fheòil air Bàbilon, their fear-àiteachaidh Shioin; agus, Gu robh m’fhuil-sa air luchd-àiteachaidh Chaldèa, their Ierusalem.

³⁶ Air an adhbhar sin, mar seo tha an Tighearna ag ràdh, Feuch, tagraidh mise do chùis, agus nì mi dìoghaltas air do shon; agus tiormaichidh mi suas a fairge, agus nì mi a màthair-uisge tioram.

³⁷ Agus bidh Bàbilon na cùirn, na h‑ionad-còmhnaidh dhràgon, na h‑uamhas, agus na ball-sgeig, gun aon ga h‑àiteachadh.

³⁸ Beucaidh iad le chèile mar leòmhainn; sgreadaidh iad mar chuileanan leòmhann.

³⁹ Nan teas cuiridh mise cuirm romhpa, agus cuiridh mi air mhisg iad a‑chum gun dèan iad aighear, agus gun caidil iad cadal sìorraidh, agus nach dùisg iad, arsa an Tighearna.

⁴⁰ Bheir mi a‑nuas iad mar uain a‑chum am marbhadh, mar reitheachan leis na gobhraichean fireann.

⁴¹ Cionnas a ghlacadh Sesac! Agus cionnas a rinneadh greim air cliù an domhain uile! Cionnas a dh’fhàs Bàbilon na h‑uamhas am measg nan cinneach!

⁴² Thàinig an fhairge a‑nìos air Bàbilon: tha i air a còmhdach le lìonmhorachd a tonnan.

⁴³ Tha a bailtean nam fàsach, nam fearann tioram, agus nan làraich sgaoilte; talamh anns nach eil duine a chòmhnaidh, cha mhò a thèid mac duine troimhpe.

⁴⁴ Agus bheir mise breitheanas air Bel ann am Bàbilon, agus bheir mi a‑mach as a bheul an nì sin a shluig e; agus cha chruinnich na cinnich an ceann a chèile thuige nas mò; thuit fòs balla Bhàbiloin.

⁴⁵ Rachaibh-se a‑mach as a meadhon, O mo shluagh-sa, agus tèarnaibh gach aon a anam o chorraich ghairg an Tighearna.

⁴⁶ Agus a‑chum nach bi ur cridhe meata, cha mhò a bhios eagal oirbh ron iomradh a chluinnear anns an fhearann: oir thig an t‑iomradh air bliadhna, agus air an ath-bhliadhna na dhèidh sin thig iomradh, agus ainneart anns an fhearann, uachdaran an aghaidh uachdarain:

⁴⁷ Air an adhbhar sin, feuch, tha na làithean a’ teachd anns an dèan mise breitheanas air dealbhan snaidhte Bhàbiloin; agus cuirear gu amhluadh a fearann uile, agus tuitidh a mairbh gu lèir na meadhon.

⁴⁸ Agus togaidh na nèamhan agus an talamh iolach os cionn Bhàbiloin, agus na h‑uile a tha annta: nuair a thig a luchd-creachaidh na h‑aghaidh on àird a tuath, deir an Tighearna.

⁴⁹ Oir mar a thug Bàbilon air muinntir chlaoidhte Israeil tuiteam, mar sin aig Bàbilon thuit muinntir chlaoidhte an domhain uile.

⁵⁰ Sibhse a chaidh as on chlaidheamh, imichibh romhaibh, na fanaibh nur seasamh: cuimhnichibh an Tighearna o chèin, agus thigeadh Ierusalem nur n‑aire.

⁵¹ Bha sinn fo amhluadh, a chionn gun cuala sinn mì‑chliù, chòmhdaich nàire ar n‑aghaidh; oir thàinig coimhich a‑steach do ionadan naomha taigh an Tighearna.

⁵² Uime sin feuch, tha na làithean a’ teachd, deir an Tighearna, anns an dèan mise breitheanas air a dealbhan snaidhte; agus feadh a fearainn uile bidh acain nan daoine leònte.

⁵³ Ged èireadh Bàbilon suas gu ruig na nèamhan, agus ged dhaingnicheadh i gu h‑àrd a neart, uamsa thig luchd-creachaidh da h‑ionnsaigh, deir an Tighearna.

⁵⁴ Fuaim èighich o Bhàbilon, agus lèirsgrios mòr o thìr nan Caldèanach;

⁵⁵ Oir mhill an Tighearna Bàbilon, agus bhàsaich a mòr-fharam na meadhon; ged bha a fuaim mar thoirm uisgeachan mòra, ge b’àrd a dh’èirich a faram;

⁵⁶ A chionn gun tàinig fear-millidh na h‑aghaidh, an aghaidh Bhàbiloin; agus ghlacadh a laoich, agus bhriseadh gach aon dem boghachan; oir bheir an Tighearna, Dia na luigheachd, gu cinnteach luigheachd dhise.

⁵⁷ Agus cuiridh mise air mhisg a prionnsachan, agus a daoine glice, a cinn-fheadhna, agus a h‑uachdarain, agus a daoine cumhachdach; agus caidlidh iad cadal bithbhuan, agus cha dùisg iad tuilleadh, deir an Rìgh don ainm Iehòbhah, Dia nan sluagh.

⁵⁸ Mar seo tha Tighearna nan sluagh ag ràdh, Brisear gu tur ballachan leathann Bhàbiloin, agus loisgear a geatachan àrda le teine; agus saothraichidh na slòigh gu dìomhain, agus na cinnich anns an teine, gus an toir iad thairis le sgìos.

⁵⁹ Am facal a dh’àithn Ieremiah am fàidh do Sheraiah mac Neriah, mhic Mhaaseiah, nuair a chaidh e le Sedeciah rìgh Iùdah gu Bàbilon, anns a’ cheathramh bliadhna de a linn: agus b’e Seraiah an t‑àrd chaillteanach.

⁶⁰ Agus sgrìobh Ieremiah a h‑uile olc a bha ri teachd air Bàbilon ann an aon leabhar, na briathran seo uile a tha air an sgrìobhadh mu thimcheall Bhàbiloin.

⁶¹ Agus thubhairt Ieremiah ri Seraiah. Nuair a thig thu gu Bàbilon, agus a chì, agus a leughas tu na briathran seo uile,

⁶² An sin their thu, O Thighearna, labhair thu an aghaidh an àite seo gu a ghearradh as, air chor is nach bi neach a chòmhnaidh ann, aon chuid duine no ainmhidh, ach gum bi e fàs gu sìorraidh.

⁶³ Agus tàrlaidh, nuair a sguireas tu de leughadh an leabhair seo, gun ceangail thu clach ris, agus tilgidh tu e ann am meadhon Euphràteis.

⁶⁴ Agus their thu, Mar seo thèid Bàbilon fodha, agus chan èirich i nas mò, do bhrìgh an uilc a bheir mise oirre; agus claoidhear iad. An fhad seo briathran Ieremiah.