Ieremiah 43 - Am Bìoball Gàidhlig 1992

¹ Agus thàrladh, tràth sguir Ieremiah de labhairt ris an iomlan den t‑sluagh uile bhriathran an Tighearna an Dia, airson an do chuir an Tighearna an Dia esan dan ionnsaigh, eadhon nan uile bhriathran seo;

² Gun do labhair Asariah mac Hosaiah, agus Iohanan mac Chareah, agus na daoine uaibhreach uile, ag ràdh ri Ieremiah, Is breug a tha thu a’ labhairt: cha do chuir an Tighearna ar Dia thu gu ràdh, Na rachaibh don Eiphit a dh’fhantainn air chuairt an sin:

³ Ach tha Baruch mac Neriah gad bhrosnachadh nar n‑aghaidh, a‑chum ar toirt suas do làimh nan Caldèanach, a‑chum ar marbhadh, no ar toirt air falbh nar braighdean gu Bàbilon.

⁴ Mar seo cha tug Iohanan mac Chareah, agus uile cheannardan an fheachd, agus an sluagh uile, gèill do ghuth an Tighearna, gu còmhnaidh a ghabhail ann an tìr Iùdah:

⁵ Ach ghabh Iohanan mac Chareah, agus uile cheannardan an fheachd, a mheud is a bha an làthair de Iùdah, a thill o na h‑uile chinnich gus an robh iad air am fògradh gu còmhnaidh a ghabhail ann an tìr Iùdah;

⁶ Na fir, agus na mnathan, agus a’ chlann agus nigheanan an rìgh, agus gach neach a dh’fhàg Nebusaradan, ceannard an fhreiceadain, le Gedaliah mac Ahicaim, mhic Shaphain, agus Ieremiah am fàidh, agus Baruch mac Neriah;

⁷ Agus dh’imich iad gu tìr na h‑Eiphit; oir cha tug iad gèill do ghuth an Tighearna; agus thàinig iad eadhon gu Tahpanes.

⁸ An sin thàinig facal an Tighearna gu Ieremiah ann an Tahpanes, ag ràdh,

⁹ Gabh ann ad làimh clachan mòra, agus falaich iad anns a’ chriadh ann an àth nan clachan-creadha, a tha aig dol a‑steach taigh Phàraoh, ann an Tahpanes, ann an sealladh fir Iùdah.

¹⁰ Agus abair riu, Mar seo tha Tighearna nan sluagh, Dia Israeil, ag ràdh; Feuch, cuiridh mise fios, agus gabhaidh mi Nebuchadnesar rìgh Bhàbiloin, mo sheirbhiseach, agus suidhichidh mi a rìgh-chathair air na clachan seo a dh’fhalaich mi, agus sgaoilidh e a phàillean rìoghail os an cionn.

¹¹ Agus thig e, agus buailidh e tìr na h‑Eiphit, iadsan a tha a‑chum bàis, le bàs; agus iadsan a tha a‑chum daorsa, le daorsa; agus iadsan a tha a‑chum a’ chlaidheimh, leis a’ chlaidheamh.

¹² Agus fadaidh mise teine ann an taighean diathan na h‑Eiphit; agus loisgidh esan iad, agus bheir e air falbh nam braighdean iad, agus èididh e e fhèin le tìr na h‑Eiphit, mar a dh’èideas buachaille e fhèin le a thrusgan; agus thèid e a‑mach as a sin ann an sìth.

¹³ Brisidh e fòs dealbhan taigh na grèine a tha an tìr na h‑Eiphit; agus taighean diathan na h‑Eiphit loisgidh e le teine.