Ieremiah 38 - Am Bìoball Gàidhlig 1992

¹ An sin chuala Sephatiah mac Mhatain, agus Gedaliah mac Phasuir, agus Iucal mac Shelemiah, agus Pasur mac Mhalchiah, na briathran a labhair Ieremiah ris an t‑sluagh uile, ag ràdh,

² Mar seo deir an Tighearna, Esan a dh’fhanas anns a’ chathair seo bàsaichidh e leis a’ chlaidheamh, leis a’ ghort, agus leis a’ phlàigh; ach esan a thèid a‑mach a‑chum nan Caldèanach, mairidh e beò; oir gheibh e a anam mar chobhartach, agus mairidh e beò.

³ Mar seo tha an Tighearna ag ràdh, Bheirear gu deimhinn a’ chathair seo suas do làimh feachd rìgh Bhàbiloin, a ghlacas i.

⁴ Air an adhbhar sin, thubhairt na h‑uachdarain ris an rìgh, Biodh an duine seo, guidheamaid ort, air a chur gu bàs: oir mar seo tha e a’ lagachadh làmhan an luchd-cogaidh a tha fhathast an làthair anns a’ bhaile seo, agus làmhan an t‑sluaigh uile, le bhith a’ labhairt an leithid seo de bhriathran riu: oir chan eil an duine seo ag iarraidh leas an t‑sluaigh seo, ach an aimhleas.

⁵ An sin thubhairt an rìgh Sedeciah, Feuch, tha e nur làimh: oir chan e an rìgh esan a dh’fhaodas aon nì a chur nur n‑aghaidh.

⁶ An sin ghlac iad Ieremiah, agus thilg iad e ann an sloc Mhalchiah mhic Hameleich, a bha ann an cùirt a’ phrìosain; agus leig iad sìos Ieremiah le cùird. Agus anns an t‑sloc cha robh uisge sam bith, ach clàbar: agus chaidh Ieremiah fodha anns a’ chlàbar.

⁷ A‑nis nuair a chuala Ebed-melech an t‑Etiopach, aon de na caillteanaich a bha an taigh an rìgh, gun do chuir iad Ieremiah anns an t‑sloc (agus an rìgh na shuidhe anns an àm sin ann an geata Bheniàmin),

⁸ Chaidh Ebed-melech a‑mach à taigh an rìgh, agus labhair e ris an rìgh, ag ràdh,

⁹ Mo thighearna, a rìgh, rinn na daoine seo gu h‑olc anns gach nì a rinn iad ri Ieremiah am fàidh, a thilg iad anns an t‑sloc; oir gheibh e bàs le acras anns an àite sin, a chionn nach eil nas mò aran anns a’ bhaile.

¹⁰ An sin dh’àithn an rìgh do Ebed-melech an t‑Etiopach, ag ràdh, Thoir leat à seo deich fir ar fhichead, agus thoir a‑nìos Ieremiah am fàidh as an t‑sloc, mum faigh e bàs.

¹¹ Agus thug Ebed-melech leis na daoine, agus chaidh e a‑steach do thaigh an rìgh fon taigh-thasgaidh, agus thug e as a sin seann bhroineagan, agus seann luideagan, agus leig e sìos iad gu Ieremiah don t‑sloc le cùird.

¹² Agus thubhairt Ebed-melech an t‑Etiopach ri Ieremiah, Cuir a‑nis na seann luideagan agus na broineagan seo fod asgailtean mu na cùird. Agus rinn Ieremiah mar sin.

¹³ Agus tharraing iad a‑nìos Ieremiah le cùird, agus thug iad a‑mach as an t‑sloc e; agus dh’fhan Ieremiah ann an cùirt a’ phrìosain.

¹⁴ An sin chuir an rìgh Sedeciah fios, agus thug e Ieremiah am fàidh da ionnsaigh gus an treas dol-a‑steach a tha ann an taigh an Tighearna. Agus thubhairt an rìgh ri Ieremiah, Feòraichidh mi nì àraidh dhìot; na ceil a’ bheag orm.

¹⁵ Agus thubhairt Ieremiah ri Sedeciah, Ma dh’innseas mi dhut, nach dèan thu gu cinnteach mo chur gu bàs? Agus ma bheir mi comhairle ort, an èisd thu rium?

¹⁶ An sin mhionnaich an rìgh Sedeciah do Ieremiah os ìosal, ag ràdh, Mar as beò an Tighearna a rinn dhuinn an t‑anam seo, cha chuir mi gu bàs thu, cha mhò a bheir mi thairis thu do làimh na muinntir sin a tha ag iarraidh d’anama.

¹⁷ Agus thubhairt Ieremiah ri Sedeciah, Mar seo tha Iehòbhah, Dia nan sluagh, Dia Israeil, ag ràdh, Ma thèid thu gu deimhinn thairis gu cinn-fheadhna rìgh Bhàbiloin, an sin mairidh d’anam beò, agus cha loisgear a’ chathair seo le teine; ach mairidh tu beò, thu fhèin agus do theaghlach.

¹⁸ Ach mura tèid thu a‑mach gu cinn-fheadhna rìgh Bhàbiloin, an sin bheirear a’ chathair seo do làimh nan Caldèanach, agus loisgidh iad i le teine, agus cha tèid thusa fhèin as on làmhan.

¹⁹ Agus thubhairt an rìgh Sedeciah ri Ieremiah, Tha eagal nan Iùdhach orm, a theich a‑chum nan Caldèanach, gun toir iad thairis mi don làmhan, agus gun dèan iad fanaid orm.

²⁰ Ach thubhairt Ieremiah, Cha toir iad thairis thu; thoir gèill, guidheam ort, do ghuth an Tighearna anns an nì a tha mise a’ labhairt riut: mar sin èiridh gu math dhut, agus mairidh d’anam beò.

²¹ Ach ma dhiùltas tu dol a‑mach, seo an nì a thaisbein an Tighearna dhòmhsa;

²² Eadhon, feuch, na h‑uile mhnathan a tha air am fàgail ann an taigh rìgh Iùdah, bheirear a‑mach gu cinn-fheadhna rìgh Bhàbiloin, agus their iad, Bhrosnaich do chàirdean thu, agus thug iad buaidh ort: chuir iad do chasan an sàs anns an làthaich, agus thill iad air an ais.

²³ Agus bheir iad a‑mach d’uile mhnathan, agus do chlann, a‑chum nan Caldèanach; agus cha tèid thu fhèin as on làmhan, ach glacar thu le làimh rìgh Bhàbiloin, agus bidh tu coireach airson am baile seo a bhith air a losgadh le teine.

²⁴ An sin thubhairt Sedeciah ri Ieremiah, Na biodh fios aig duine sam bith air na briathran seo, agus chan fhaigh thu bàs.

²⁵ Ach ma chluinneas na h‑uachdarain gun do labhair mise riut, agus gun tig iad ad ionnsaigh, agus gun abair iad riut, Innis dhuinn a‑nis ciod a thubhairt thu ris an rìgh, na ceil e oirnne, agus cha chuir sinn gu bàs thu; mar an ceudna ciod a thubhairt an rìgh riutsa:

²⁶ An sin their thu riu, Thaisbein mi m’athchuinge an làthair an rìgh, nach tugadh e orm tilleadh gu taigh Ionatain, a dh’fhaotainn bàis an sin.

²⁷ Agus thàinig na h‑uachdarain uile gu Ieremiah, agus dh’fhiosraich iad dheth; agus dh’innis e dhaibh a rèir nan uile bhriathran seo a dh’àithn an rìgh dha: mar sin sguir iad de labhairt ris, oir cha do mhothaicheadh a’ chùis.

²⁸ Mar sin dh’fhan Ieremiah ann an cùirt a’ phrìosain, gus an là anns an do ghlacadh Ierusalem; agus bha e an sin nuair a ghlacadh Ierusalem.