Ieremiah 28 - Am Bìoball Gàidhlig 1992

¹ Agus thàrladh anns a’ bhliadhna sin fhèin, an toiseach linn Shedeciah rìgh Iùdah, anns a’ cheathramh bliadhna anns a’ chòigeamh mìos, gun do labhair Hananiah mac Asuir, am fàidh a bha o Ghibeon, riumsa ann an taigh an Tighearna, an làthair nan sagart agus an t‑sluaigh uile, ag ràdh,

² Mar seo labhair Tighearna nan sluagh, Dia Israeil, ag ràdh, Bhris mise cuing rìgh Bhàbiloin.

³ An ceann dà bhliadhna iomlan bheir mise air an ais a‑chum an àite seo uile shoithichean taigh an Tighearna, a thug Nebuchadnesar rìgh Bhàbiloin air falbh on àite seo, agus a ghiùlain e gu Bàbilon.

⁴ Agus bheir mi a‑chum an àite seo a‑rìs Ieconiah mac Iehoiacim rìgh Iùdah, maille ri uile bhraighdean Iùdah, a dh’imich gu Bàbilon, deir an Tighearna; oir brisidh mise cuing rìgh Bhàbiloin.

⁵ Agus thubhairt am fàidh Ieremiah ris an fhàidh Hananiah, an làthair nan sagart, agus an làthair an uile shluaigh a bha nan seasamh ann an taigh an Tighearna,

⁶ Thubhairt eadhon am fàidh Ieremiah, Amen: gun dèanadh an Tighearna mar sin; gun coileanadh an Tighearna do bhriathran a rinn thu fhàistneachd, le soithichean taigh an Tighearna, agus gach nì eile a thugadh air falbh ann am bruid, a thoirt air an ais o Bhàbilon a‑chum an àite seo.

⁷ Gidheadh cluinn thusa a‑nis am facal seo a tha mise a’ labhairt ann ad èisdeachd, agus ann an èisdeachd an t‑sluaigh uile;

⁸ Na fàidhean a bha romhamsa agus romhadsa o shean, rinn iad fàistneachd araon a‑thaobh mòran dhùthchannan, agus a‑thaobh rìoghachdan mòra, air cogadh agus air gort, agus air plàigh.

⁹ Am fàidh a nì fàistneachd mu shìth, nuair a thig facal an fhàidh gu crìch, aithnichear gur e an Tighearna gu deimhinn a chuir am fàidh sin a‑mach.

¹⁰ An sin thug am fàidh Hananiah a’ chuing bhàrr muineal an fhàidh Ieremiah, agus bhris e i.

¹¹ Agus labhair Hananiah an làthair an t‑sluaigh uile, ag ràdh, Mar seo deir an Tighearna, Amhail seo brisidh mise cuing Nebuchadnesair rìgh Bhàbiloin o mhuineal nan uile chinneach an taobh a‑staigh de dhà bhliadhna iomlan. Agus dh’fhalbh am fàidh Ieremiah roimhe.

¹² Agus thàinig facal an Tighearna gu Ieremiah (an dèidh don fhàidh Hananiah a’ chuing a bhriseadh bhàrr muineal an fhàidh Ieremiah), ag ràdh,

¹³ Imich agus labhair ri Hananiah, ag ràdh, Mar seo deir an Tighearna, na cuibhrichean fiodha bhris thu, ach nì thu nan àite cuibhrichean iarainn.

¹⁴ Oir mar seo deir Tighearna nan sluagh, Dia Israeil, Cuing iarainn chuir mise air muineal nan cinneach seo uile, a‑chum gun tugadh iad gèill do Nebuchadnesar rìgh Bhàbiloin; agus bheir iad gèill dha; agus beathaichean na machrach thug mi dha mar an ceudna.

¹⁵ An sin thubhairt am fàidh Ieremiah ris an fhàidh Hananiah, Eisd a‑nis, a Hananiah; cha do chuir an Tighearna fios leatsa, ach tha thu a’ toirt air an t‑sluagh seo earbsa a dhèanamh à brèig.

¹⁶ Uime sin mar seo deir an Tighearna, Feuch, tilgidh mise thu bhàrr aghaidh na talmhainn; air a’ bhliadhna seo gheibh thu bàs, a chionn gun do labhair thu ceannairc an aghaidh an Tighearna.

¹⁷ Mar sin fhuair am fàidh Hananiah bàs air a’ bhliadhna sin fhèin, anns an t‑seachdamh mìos.