Ieremiah 18 - Am Bìoball Gàidhlig 1992

¹ Am facal a thàinig a dh’ionnsaigh Ieremiah on Tighearna, ag ràdh,

² Eirich, agus imich sìos gu taigh a’ chreadhadair, agus an sin bheir mise ort mo bhriathran a chluinntinn.

³ An sin chaidh mi sìos gu taigh a’ chreadhadair, agus, feuch, bha e a’ dèanamh obrach air na leacan.

⁴ Agus bha an soitheach a bha e a’ dèanamh de chriadh air a mhilleadh ann an làimh a’ chreadhadair; an sin rinn e dheth a‑rìs soitheach eile, mar a chunnacas ceart don chreadhadair a dhèanamh.

⁵ An sin thàinig facal an Tighearna am ionnsaigh, ag ràdh,

⁶ O thaigh Israeil, nach faod mise a dhèanamh ribhse mar an creadhadair seo? deir an Tighearna. Feuch, mar a’ chriadh an làimh a’ chreadhadair, is amhail sin sibhse ann am làimh-sa, O thaigh Israeil.

⁷ Cuin air bith a labhras mise mu thimcheall cinnich, agus mu thimcheall rìoghachd, gu spìonadh a‑nìos, gu leagail sìos, agus gu sgrios;

⁸ Ma thilleas an cinneach sin, an aghaidh an do labhair mi, on olc, gabhaidh mise aithreachas den olc a bha ann am aire a thoirt orra.

⁹ Agus cuin air bith a labhras mi mu thimcheall cinnich, agus mu thimcheall rìoghachd, gu a thogail, agus gu a shuidheachadh;

¹⁰ Agus gun dèan e an nì sin a tha olc ann am shealladh, agus nach bi e umhail dom ghuth; an sin gabhaidh mi aithreachas den mhath a bha romham a dhèanamh dhaibh.

¹¹ A‑nis, uime sin, imich agus labhair ri fir Iùdah, agus ri luchd-àiteachaidh Ierusaleim, ag ràdh, Mar seo deir an Tighearna, Feuch, tha mise a’ cumadh uilc nur n‑aghaidh, agus a’ dealbh innleachd nur n‑aghaidh: tillibh a‑nis gach aon o a dhroch shlighe, agus leasaichibh ur slighean agus ur gnìomharan.

¹² Ach thubhairt iadsan, Chan eil dòchas ann; oir gluaisidh sinn a rèir ar smuainte fhèin, agus nì sinn, gach aon a rèir togradh a dhroch chridhe fhèin.

¹³ Uime sin mar seo deir an Tighearna, Feòraichibh a‑nis am measg nan cinneach, cò a chuala an samhail seo de nithean? Rinn òigh Israeil nì ro‑ghràineil.

¹⁴ An trèig duine mo mhagh-sa airson carraig, airson sneachd Lebanoin? An trèigear am fuar uisge-ruith airson uisgeachan eile?

¹⁵ Ach dhìochuimhnich mo shluagh mise, loisg iad tùis do dhìomhanas, agus thug iad orra tuisleachadh nan slighean a bha nan seann ròidean, gu gluasad air ceuman eile, air slighe nach eil dèante;

¹⁶ A‑chum am fearann a dhèanamh fàs, na bhall-àbhachdais bithbhuan: gabhaidh gach neach a thèid seachad air mòr-iongantas, agus crathaidh e a cheann.

¹⁷ Sgapaidh mise iad mar gum b’ann le gaoith an ear ron nàmhaid; tionndaidhidh mi riu mo chùl, agus chan i m’aghaidh, ann an là an lèirsgrios.

¹⁸ An sin thubhairt iad, Thigibh, agus dealbhamaid innleachdan an aghaidh Ieremiah: oir cha bhàsaich an reachd on t‑sagart, no comhairle on eagnaidh, no am facal on fhàidh. Thigibh, agus buaileamaid e leis an teangaidh, agus na tugamaid aire do aon de a bhriathran.

¹⁹ Thoir thusa, O Iehòbhah, aire dhomh, agus cluinn guth na muinntir a tha ri strì rium.

²⁰ An dìolar olc airson maith? Gu cinnteach chladhaich iad sloc airson m’anama. Cuimhnich cionnas a sheas mi ann ad fhianais, a dhèanamh eadar-ghuidhe a‑chum an leas, a thionndadh do chorraich air falbh uapa.

²¹ Uime sin thoir thusa thairis an clann don ghorta, agus thoir orra leaghadh as le neart a’ chlaidheimh; biodh am mnathan air am fàgail gun chlann, agus iad nam bantraichean, agus faigheadh am fir bàs leis a’ phlàigh, agus marbhar an òganaich anns an àraich leis a’ chlaidheamh.

²² Cluinnear gaoir as an taighean, an tràth bheir thusa feachd orra gu h‑obann; oir chladhaich iad sloc gu mise a ghlacadh, agus shuidhich iad lìontan airson mo chas.

²³ Ach agadsa, O Thighearna, tha fhios air an innleachdan uile an aghaidh m’anama; na maith an cionta, agus na glan an lochd a‑mach à d’fhianais: ach tilgear iad thairis ann ad làthair; tionnsgain nan aghaidh ann an àm do chorraich.