Hosèa 8 - Am Bìoball Gàidhlig 1992

¹ An trompaid rid bheul! Mar iolair an aghaidh taigh an Tighearna thig e: a chionn gun do bhris iad mo choicheangal-sa, agus gun do chiontaich iad an aghaidh mo reachd.

² Riumsa glaodhaidh iad, O Dhè Israeil, is aithne dhuinne thu.

³ Chuir Israel uaithe am fad an nì a tha math: nì nàmhaid a ruagadh.

⁴ Chuir iad suas rìghrean, ach chan ann uamsa: rinn iad uachdarain, agus cha robh agamsa fios air: den airgead agus den òr rinn iad dhaibh fhèin iodhalan, a‑chum gun gearrar as iad.

⁵ Cuir am fada uat do laogh, O Shamaria; tha mo chorraich-sa air lasadh nan aghaidh: cia fhad a bhios iad gun ruigheachd air neochiontas?

⁶ Oir bha seo fòs o Israel: dhealbh am fear-obrach e; agus cha Dia a tha ann: oir brisear na bhloighdean laogh Shamaria.

⁷ Oir chuir iad a’ ghaoth, agus buainidh iad a’ chuairt-ghaoth: chan eil toradh air an dèis; cha toir i uaipe min; no, ma bheir, sluigidh coigrich suas i.

⁸ Tha Israel air a shlugadh suas: a‑nis tha iad am measg nan cinneach mar shoitheach anns nach eil tlachd air bith.

⁹ Oir chaidh iad suas gu Asiria: is asal fhiadhaich anns an aonach Ephraim; thuarasdalaich iad leannain.

¹⁰ Seadh, ged a thuarasdalaich iad am measg nan cinneach, a‑nis tionailidh mise iad ri chèile; agus bidh iad gu goirid air an cràdh le uallach an rìgh agus a uachdaran.

¹¹ A chionn gun do rinn Ephraim mòran altairean gu peacachadh, altairean gu peacachadh tha aige.

¹² Sgrìobh mise da ionnsaigh nithean mòra mo reachd; ach mheasadh iad mar nì nach buineadh dhaibh.

¹³ Tha iad ag ìobradh feòla mar thabhartas dhòmhsa, agus ga h‑ithe; ach cha ghabh an Tighearna riu: a‑nis cuimhnichidh e an aingidheachd, agus smachdaichidh e an lochdan: tillidh iad air an ais don Eiphit.

¹⁴ Oir dhìochuimhnich Israel a Chruithear, agus thog e teampaill: agus chuir Iùdah an lìonmhorachd cathraichean daingeann: ach cuiridh mise teine air a chathraichean, agus loisgidh e a lùchairtean.