Hosèa 3 - Am Bìoball Gàidhlig 1992

¹ Os bàrr thubhairt an Tighearna rium, Imich a‑rìs, gràdhaich bean (ionmhainn le a caraid, ged tha i na ban-adhaltranaich) a rèir gràdh an Tighearna do chloinn Israeil, ged tha iadsan ag amharc ri diathan eile, agus a’ gràdhachadh cupanan fìona.

² Mar sin cheannaich mi dhomh fhèin i air còig-buinn-deug airgid, agus homer eòrna, agus leth-homeir eòrna.

³ Agus thubhairt mi rithe, Fanaidh tu leamsa mòran làithean; cha dèan thu strìopachas, cha mhò a bhios tu aig fear eile; mar sin bidh mise mar an ceudna agadsa.

⁴ Oir fanaidh clann Israeil mòran làithean gun rìgh, agus gun phrionnsa, agus gun ìobairt, agus gun ìomhaigh, agus gun èphod, agus gun teraphim.

⁵ Na dhèidh sin tillidh clann Israeil, agus iarraidh iad an Tighearna an Dia, agus Daibhidh an rìgh; agus bidh eagal an Tighearna agus a mhaitheis orra anns na làithean deireannach.