Hosèa 13 - Am Bìoball Gàidhlig 1992

¹ Nuair a labhair Ephraim le crith, dh’àrdaich e e fhèin ann an Israel; ach nuair a chiontaich e ann am Bàal, bhàsaich e.

² Agus a‑nis tha iad a’ ciontachadh nas mò agus nas mò, agus rinn iad dhaibh fhèin dealbh leaghte den airgead: iodhalan a rèir an seòltachd fhèin, an t‑iomlan dheth obair nam fear-ceàirde: tha iad ag ràdh dan taobh, Dèanadh a’ mhuinntir a tha ag ìobradh an laoigh a phògadh.

³ Air an adhbhar sin bidh iad mar neul na maidne; agus mar an drùchd moch a shiùbhlas air falbh: mar am moll air fhuadachadh le cuairt-ghaoith on ùrlar-bhualaidh; agus mar thoit a‑mach as an luidhear.

⁴ Gidheadh is mise an Tighearna do Dhia, a thug a‑nìos thu o thìr na h‑Eiphit, agus cha bhi aithne agad air dia air bith ach mise; oir chan eil slànaighear ann ach mi.

⁵ B’aithne dhòmhsa thu anns an fhàsach, ann am fearann an tarta mhòir:

⁶ Nan ionaltradh bha iad air an lìonadh: bha iad air an lìonadh, agus dh’àrdaicheadh an cridhe: air an adhbhar sin dhìochuimhnich iad mise.

⁷ Uime sin bidh mise dhaibh mar leòmhann: mar liopard anns an t‑slighe bheir mi fa‑near iad.

⁸ Coinnichidh mi iad mar mhath-ghamhainn on do bhuineadh a cuileanan, agus reubaidh mi sgairt an cridhe; agus an sin sluigidh mi iad mar leòmhann boireann: nì fiadh-bheathach na machrach an reubadh.

⁹ O Israeil, sgrios thu thu fhèin, ach annamsa tha do chobhair.

¹⁰ Bidh mise ann am rìgh dhut: càit a bheil aon neach eile a thèarnas thu ann ad chathraichean uile? Agus do bhritheamhan uile ris an dubhairt thu, Thoir dhomh rìgh agus prionnsachan?

¹¹ Thug mise rìgh dhut ann am fheirg, agus thug mi air falbh e ann am chorraich.

¹² Tha aingidheachd Ephraim air a càrnadh suas: tha a chionta air a thasgadh.

¹³ Thig ioghannan mnà ri saothair air: is mac nach eil glic e seo; no chan fhanadh e fada ann an àite briseadh a‑mach na cloinne.

¹⁴ Fuasglaidh mise iad o chumhachd na h‑uaighe: saoraidh mi iad on bhàs: O bhàis, bidh mise am phlàigh dhut; O uaigh, bidh mise am sgrios dhut; bidh aithreachas air fhalach om shùilean.

¹⁵ Ged a bha e torrach am measg a bhràithrean, thig gaoth an ear, thig gaoth an Tighearna a‑nìos on fhàsach, agus fàsaidh a fhuaran tioram, agus tiormaichear suas a thobar: bidh ionmhas nan uile shoithichean taitneach air a chreachadh.

¹⁶ Bidh Samaria na fàsach, oir rinn i ceannairc an aghaidh a Dè: tuitidh iad leis a’ chlaidheamh, brisear an naoidheanan nam bloighdean; agus reubar suas am mnathan torrach.