Genesis 7 - Am Bìoball Gàidhlig 1992

¹ Agus thubhairt an Tighearna ri Nòah, Rach thusa agus do thaigh uile a‑steach don àirc; oir thusa chunnaic mi cothromach am fhianais anns a’ ghinealach seo.

² De gach uile ainmhidh glan gabhaidh tu dhut nan seachdan, am fireann agus a bhoireann; agus de ainmhidhean nach eil glan, nan càraidean, am fireann agus a bhoireann:

³ Mar an ceudna de eunlaith nan speur nan seachdan, fireann agus boireann, a ghleidheadh sìl beò air aghaidh na talmhainn uile:

⁴ Oir fhathast seachd làithean, agus bheir mise air uisge teachd air an talamh dà‑fhichead là agus dà‑fhichead oidhche; agus sgriosaidh mi gach dùil bheò a rinn mi bhàrr aghaidh na talmhainn.

⁵ Agus rinn Nòah a rèir gach nì a dh’àithn an Tighearna dha.

⁶ Agus bha Nòah sia ceud bliadhna a dh’aois, nuair a bha an dìle uisgeachan air an talamh.

⁷ Agus chaidh Nòah a‑steach, agus a mhic agus a bhean agus mnathan a mhac maille ris, don àirc, airson uisgeachan na dìle.

⁸ De ainmhidhean glan, agus de ainmhidhean nach eil glan, agus de eunlaith, agus de gach nì a shnàigeas air an talamh,

⁹ Chaidh dithis agus dithis a‑steach a dh’ionnsaigh Nòah don àirc, fireann agus boireann, a rèir mar a dh’àithn Dia do Nòah.

¹⁰ Agus an dèidh seachd làithean bha uisgeachan na dìle air an talamh.

¹¹ Anns an t‑siathamh ceud bliadhna a dh’aois Nòah, anns an dara mìos, anns an t‑seachdamh-là‑deug den mhìos, anns an là sin fhèin bhriseadh suas uile thobraichean na doimhne mòire, agus bha tuil-dhorsan nan nèamh air am fosgladh.

¹² Agus bha an t‑uisge air an talamh dà‑fhichead là agus dà‑fhichead oidhche.

¹³ Anns a’ cheart là sin fhèin chaidh Nòah, agus Sem agus Ham agus Iàphet, mic Nòah, agus bean Nòah, agus triùir bhan a mhac maille riu, a‑steach don àirc;

¹⁴ Iad fhèin, agus gach uile bheathach a rèir a ghnè, agus an sprèidh uile a rèir an gnè, agus gach creutair a shnàigeas a tha a’ snàigeadh air an talamh a rèir a ghnè, agus an eunlaith uile a rèir an gnè, gach eun de gach seòrsa.

¹⁵ Agus chaidh iad a‑steach a‑chum Nòah don àirc, a lìon dithis agus dithis, de gach uile fheòil anns a bheil anail na beatha.

¹⁶ Agus iadsan a chaidh a‑steach, fireann agus boireann, chaidh iad a‑steach de gach uile fheòil, mar a dh’àithn Dia dha: agus dhruid an Tighearna a‑staigh e.

¹⁷ Agus bha an dìle dà‑fhichead là air an talamh; agus mheudaicheadh na h‑uisgeachan, agus ghiùlain iad an àirc, agus thogadh suas i os cionn na talmhainn.

¹⁸ Agus bhuadhaich na h‑uisgeachan, agus mheudaicheadh iad gu h‑anabarrach air an talamh; agus shiubhail an àirc air aghaidh nan uisgeachan.

¹⁹ Agus bhuadhaich na h‑uisgeachan gu ro‑anabarrach air an talamh; agus chòmhdaicheadh na beanntan àrda uile a bha fo na nèamhan gu lèir.

²⁰ Còig làmhan-coille deug air àirde bhuadhaich na h‑uisgeachan; agus chòmhdaicheadh na beanntan.

²¹ Agus dh’eug gach uile fheòil a bha a’ gluasad air an talamh, araon de eunlaith, agus de sprèidh, agus de bheathaichean, agus de gach nì a shnàigeas a tha a’ snàigeadh air an talamh, agus gach uile dhuine:

²² Gach nì aig an robh anail na beatha ann an cuinneinean a shròine, de na h‑uile a bha air an talamh thioram, dh’eug iad.

²³ Agus sgriosadh gach uile dhùil a bha air aghaidh na talmhainn, araon duine, agus ainmhidh, agus an creutair a shnàigeas, agus eunlaith nan speur; agus sgriosadh iad bhàrr na talmhainn: agus dh’fhàgadh a‑mhàin Nòah, agus na bha maille ris anns an àirc.

²⁴ Agus bhuadhaich na h‑uisgeachan os cionn na talmhainn ceud agus lethcheud là.