Genesis 39 - Am Bìoball Gàidhlig 1992

¹ Agus thugadh Iòseph sìos don Eiphit; agus cheannaich Potiphar, oifigeach le Phàraoh, ceannard an fhreiceadain, Eiphiteach, e o làimh nan Ismaeleach, a thug sìos an sin e.

² Agus bha an Tighearna maille ri Iòseph, agus bha e na dhuine leis an do shoirbhich gach nì; agus bha e ann an taigh a mhaighistir, an t‑Eiphiteach.

³ Agus chunnaic a mhaighistir gu robh an Tighearna maille ris, agus gun tug an Tighearna air gach nì a rinn e soirbheachadh na làimh.

⁴ Agus fhuair Iòseph deagh-ghean na shealladh, agus rinn e seirbhis dha; agus rinn e e na fhear-riaghlaidh air a thaigh, agus gach nì a bha aige chuir e fo a làimh.

⁵ Agus on àm sin fhèin anns an do rinn e e na fhear-riaghlaidh air a thaigh, agus air gach nì a bha aige, bheannaich an Tighearna taigh an Eiphitich air sgàth Iòseiph: agus bha beannachadh an Tighearna air gach nì a bha aige, anns an taigh agus anns a’ mhachair.

⁶ Agus dh’fhàg e gach nì a bha aige an làimh Iòseiph, agus cha b’fhios dha aon nì a bha aige, saor on aran a bha e ag ithe. Agus bha Iòseph na dhuine maiseach, agus sgiamhach anns an aghaidh.

⁷ Agus an dèidh nan nithean sin leag bean a mhaighistir a sùilean air Iòseph agus thubhairt i, Laigh leamsa.

⁸ Agus dhiùlt esan agus thubhairt e ri mnaoi a mhaighistir, Feuch, chan eil fhios aig mo mhaighistir ciod a tha maille rium anns an taigh, agus gach nì a tha aige chuir e fom làimh-sa;

⁹ Chan eil neach anns an taigh seo as mò na mise; agus cha do chùm e uam nì sam bith ach thusa, a chionn gur tu a bhean: cionnas uime sin a nì mise an t‑olc mòr seo, agus a pheacaicheas mi an aghaidh Dhè?

¹⁰ Agus thachair e, nuair a labhair i ri Iòseph o là gu là, nach èisdeadh esan rithe, gu laighe leatha, no a bhith maille rithe.

¹¹ Agus thachair e, air là àraidh, gun deachaidh esan a‑steach don taigh a dhèanamh a obrach fhèin, agus cha robh aon de dhaoine an taighe an sin a‑staigh.

¹² Agus rug i air air a aodach-uachdair, ag ràdh, Laigh leamsa: agus dh’fhàg e a aodach-uachdair na làimh, agus theich e, agus thàr e a‑mach.

¹³ Agus nuair a chunnaic ise gun d’fhàg e a aodach-uachdair na làimh, agus gun do theich e a‑mach,

¹⁴ An sin ghairm i air daoine a taighe, agus labhair i riu, ag ràdh, Faicibh, thug e a‑steach dar n‑ionnsaigh Eabhraidheach gar maslachadh: thàinig e a‑steach am ionnsaigh-sa a laighe leam, agus ghlaodh mise le guth àrd:

¹⁵ Agus nuair a chuala e gun do thog mi suas mo ghuth, agus gun do ghlaodh mi, an sin dh’fhàg e a aodach-uachdair maille rium, agus theich e, agus chaidh e a‑mach.

¹⁶ Agus thaisg i a aodach-uachdair làimh rithe, gus an tàinig a thighearna dhachaigh.

¹⁷ Agus labhair i ris a rèir nam briathran seo, ag ràdh, Thàinig an seirbhiseach Eabhraidheach, a thug thu dar n‑ionnsaigh, a‑steach am ionnsaigh-sa gum mhaslachadh:

¹⁸ Agus nuair a thog mise suas mo ghuth agus a ghlaodh mi, an sin dh’fhàg e a aodach-uachdair maille rium, agus theich e a‑mach.

¹⁹ Agus nuair a chuala a mhaighistir briathran a mhnà a labhair i ris, ag ràdh, Air an dòigh seo rinn do sheirbhiseach orm; an sin las a fhearg suas.

²⁰ Agus ghabh maighistir Iòseiph e, agus chuir e anns a’ phrìosan e, far an robh prìosanaich an rìgh ceangailte: agus bha e an sin anns a’ phrìosan.

²¹ Ach bha an Tighearna maille ri Iòseph, agus nochd e tròcair dha, agus thug e dha deagh-ghean ann an sùilean fear-gleidhidh a’ phrìosain.

²² Agus chuir fear-gleidhidh a’ phrìosain fo làimh Iòseiph na prìosanaich uile a bha anns a’ phrìosan; agus gach nì a rinn iad an sin, b’esan a rinn e.

²³ Cha d’amhairc fear-gleidhidh a’ phrìosain air nì sam bith a bha fo a làimh, a chionn gu robh an Tighearna maille ris; agus an nì sin a rinn e thug an Tighearna air soirbheachadh leis.