Genesis 34 - Am Bìoball Gàidhlig 1992

¹ Agus chaidh Dinah nighean Lèah, a rug i do Iàcob, a‑mach a dh’fhaicinn nigheanan na tìre.

² Agus nuair a chunnaic Sechem mac Hamoir, an t‑Hibheach, uachdaran na tìre, i, ghabh e i, agus laigh e leatha, agus thruaill e i.

³ Agus dhlùth-lean a anam ri Dinah nighean Iàcoib, agus ghràdhaich e a’ ghruagach, agus labhair e gu caomh ris a’ ghruagaich.

⁴ Agus labhair Sechem ri Hamor a athair, ag ràdh, Faigh dhòmhsa a’ ghruagach seo mar mhnaoi.

⁵ Agus chuala Iàcob gun do thruaill e Dinah a nighean. A‑nis bha a mhic maille ra sprèidh anns a’ mhachair; agus bha Iàcob na thosd gus an tàinig iad.

⁶ Agus chaidh Hamor, athair Shecheim, a‑mach a dh’ionnsaigh Iàcoib, a labhairt ris.

⁷ Agus thàinig mic Iàcoib on mhachair nuair a chuala iad e, agus bha na daoine duilich, agus bha fearg mhòr orra; a chionn gun do rinn e amaideachd ann an Israel, ann an laighe le nighinn Iàcoib, nì nach bu chòir a dhèanamh.

⁸ Agus labhair Hamor riu, ag ràdh, Tha anam mo mhic Sechem an ro‑gheall air ur nighinn: thugaibh dha i, guidheam oirbh, mar mhnaoi.

⁹ Agus dèanaibh ceanglaichean-pòsaidh rinne; ur nigheanan-sa thugaibh dhuinne, agus ar nigheanan-ne gabhaidh sibh dhuibhse.

¹⁰ Agus maille rinne gabhaidh sibh còmhnaidh; agus bidh an tìr romhaibh; gabhaibh còmhnaidh, agus dèanaibh reic agus ceannachd innte, agus faighibh sealbh innte.

¹¹ Agus thubhairt Sechem ra h‑athair agus ra bràithrean, Faigheam deagh-ghean nur sùilean; agus ge bè nì a their sibh rium, bheir mi dhuibh.

¹² Air a mheud is gun dèan sibh an dubhairidh orm, agus an tìodhlac, bheir mi dhuibh eadhon mar a their sibh rium: a‑mhàin thugaibh dhomh a’ ghruagach mar mhnaoi.

¹³ Agus fhreagair mic Iàcoib Sechem agus Hamor a athair le ceilg, agus labhair iad, a chionn gun do thruaill e Dinah am piuthar,

¹⁴ Agus thubhairt iad riu, Chan fhaod sinne an nì seo a dhèanamh, ar piuthar a thoirt do dhuine neo-thimcheall-gheàrrte; oir bhiodh sin na mhasladh dhuinne.

¹⁵ Ach an seo aontaichidh sinn leibh; ma bhios sibhse mar a tha sinne, gun timcheall-ghearrar gach fireannach nur measg:

¹⁶ An sin bheir sinne ar nigheanan dhuibhse, agus ur nigheanan-se gabhaidh sinn dhuinne, agus gabhaidh sinn còmhnaidh maille ribh, agus bidh sinn nar n‑aon sluagh.

¹⁷ Ach mura èisd sibh rinne, sibh a bhith air ur timcheall-ghearradh, an sin gabhaidh sinne ar nighean, agus falbhaidh sinn.

¹⁸ Agus thaitinn am briathran ri Hamor, agus ri Sechem mac Hamoir.

¹⁹ Agus cha do chuir an t‑òganach dàil anns an nì a dhèanamh, a chionn gu robh tlachd aige ann an nighinn Iàcoib: agus bha e na b’urramaiche na taigh a athar uile.

²⁰ Agus thàinig Hamor agus Sechem a mhac gu geata am baile, agus labhair iad ri daoine am baile, ag ràdh,

²¹ Tha na daoine seo sìochail maille rinn; air an adhbhar sin gabhadh iad còmhnaidh anns an tìr, agus dèanadh iad reic agus ceannachd innte; a‑thaobh an fhearainn, feuch, tha e farsaing nas leòr dhaibh: an nigheanan-san gabhaidh sinne dhuinne mar mhnathan, agus ar nigheanan-ne bheir sinne dhaibhsan.

²² A‑mhàin anns an nì seo aontaichidh na daoine leinn, gu còmhnaidh a ghabhail maille rinn, gu bhith nar n‑aon sluagh, ma thimcheall-ghearrar gach fireannach againne, mar a tha iadsan air an timcheall-ghearradh.

²³ Nach leinne an sprèidh, agus am maoin, agus an ainmhidhean uile? A‑mhàin aontaicheamaid leo, agus gabhaidh iad còmhnaidh maille rinn.

²⁴ Agus dh’èisd gach neach a chaidh a‑mach air geata a’ bhaile ri Hamor agus ri Sechem a mhac: agus thimcheall-ghearradh gach fireannach, iadsan uile a chaidh a‑mach air geata a’ bhaile.

²⁵ Agus air an treas là, nuair bha iad air an cràdh, an sin ghabh dithis de mhic Iàcoib, Simeon agus Lèbhi, bràithrean Dhinah, gach fear aca a chlaidheamh, agus thàinig iad air a’ bhaile gu dàna; agus mharbh iad gach fireannach.

²⁶ Agus mharbh iad Hamor agus Sechem a mhac le faobhar a’ chlaidheimh, agus thug iad Dinah à taigh Shecheim, agus chaidh iad a‑mach.

²⁷ Thàinig mic Iàcoib air na mairbh, agus chreach iad am baile, a chionn gun do thruaill iad am piuthar.

²⁸ An caoraich, agus am buar, agus an asail, agus na bha anns a’ bhaile, agus na bha anns an fhearann, thog iad:

²⁹ Agus am maoin uile, agus an clann bheag uile, agus am mnathan thug iad leo ann an daorsa, agus thog iad anns a’ chreich eadhon gach nì a bha a‑staigh.

³⁰ Agus thubhairt Iàcob ri Simeon agus ri Lèbhi, Chuir sibh trioblaid orm lem dhèanamh gràineil am measg luchd-àiteachaidh na tìre, am measg nan Canàanach, agus nam Peridseach: agus air dhòmhsa a bhith gann an àireamh, cruinnichidh iad iad fhèin cuideachd am aghaidh, agus marbhaidh iad mi; agus cuirear as dhomh, agus dom thaigh.

³¹ Agus thubhairt iad, Am bu chòir dha buntainn ri ar piuthair-ne mar ri strìopaich?