Genesis 25 - Am Bìoball Gàidhlig 1992

¹ An sin ghabh Abrahàm bean a‑rìs, dom b’ainm Cetùrah.

² Agus rug i dha Simran, agus Iocsan, agus Medan, agus Midian, agus Isbac, agus Suah.

³ Agus ghin Iocsan Sèba, agus Dedan. Agus b’iad mic Dhedain Asurim, agus Letusim, agus Leumim.

⁴ Agus mic Mhidiain; Ephah, agus Epher, agus Hanoch, agus Abidah, agus Eldaah. B’iad sin uile mic Chetùrah.

⁵ Agus thug Abrahàm gach nì a bha aige do Isaac.

⁶ Ach do mhic nan coileabach a bha aig Abrahàm, thug Abrahàm tìodhlacan; agus chuir e air falbh iad o a mhac Isaac, nuair a bha e fhèin fhathast beò, don taobh an ear, do thìr na h‑àird an ear.

⁷ Agus is iad seo làithean bliadhnachan beatha Abrahàim a bha e beò; ceud agus trì-fichead, agus còig-bliadhna-deug.

⁸ An sin thug Abrahàm suas an deò, agus fhuair e bàs ann an deagh sheann aois, na sheann duine, agus làn de bhliadhnachan; agus chruinnicheadh e a‑chum a mhuinntir.

⁹ Agus dh’adhlaic a mhic Isaac agus Ismael e ann an uaimh Mhachpelah, ann an achadh Ephroin mhic Shòair an t‑Hiteach, a tha fa chomhair Mhamre;

¹⁰ An t‑achadh a cheannaich Abrahàm o mhic Het: ann an sin dh’adhlaiceadh Abrahàm, agus Sàrah a bhean.

¹¹ Agus an dèidh bàs Abrahàim, bheannaich Dia Isaac a mhac; agus ghabh Isaac còmhnaidh làimh ri tobar Lahai-roi.

¹² A‑nis is iad sin ginealaichean Ismaeil mhic Abrahàim a rug Hàgar a’ bhan-Eiphiteach, banoglach Shàrah, do Abrahàm:

¹³ Agus is iad sin ainmean mic Ismaeil, nan ainmean a rèir an ginealaichean: ciad-ghin Ismaeil, Nebaiot; agus Cedar, agus Adbeel, agus Mibsam,

¹⁴ Agus Misma, agus Dumah, agus Masa,

¹⁵ Hadar, agus Tema, Ietur, Naphis, agus Cedemah.

¹⁶ Is iad sin mic Ismaeil, agus is iad sin an ainmean nam bailtean, agus nan daingnichean; dà‑cheannard-dheug a rèir am fineachan.

¹⁷ Agus is iad sin bliadhnachan beatha Ismaeil, ceud agus seachd-bliadhna-deug ar fhichead: agus thug e suas an deò, agus dh’eug e, agus chruinnicheadh e a‑chum a mhuinntir.

¹⁸ Agus ghabh iad còmhnaidh o Habhilah gu ruig Sur, a tha fa chomhair na h‑Eiphit, mar a thèid thu gu Asiria. An làthair a bhràithrean uile fhuair e bàs.

¹⁹ Agus is iad seo ginealaichean Isaaic mhic Abrahàim: Ghin Abrahàm Isaac.

²⁰ Agus bha Isaac dà‑fhichead bliadhna a dh’aois nuair a ghabh e Rebecah, nighean Bhetueil, an Sirianach o Phadan-àram, piuthar Làbain an Sirianach, dha fhèin na mnaoi.

²¹ Agus ghuidh Isaac an Tighearna airson a mhnà, a chionn gu robh i neo-thorrach: agus dh’èisd an Tighearna ris, agus dh’fhàs Rebecah a bhean torrach.

²² Agus bha a’ chlann a’ strì ri chèile an taobh a‑staigh dhith: agus thubhairt ise, Ma tha a’ chùis mar sin, carson a tha mi mar seo? Agus chaidh i a dh’fhiosrachadh den Tighearna.

²³ Agus thubhairt an Tighearna rithe, Tha dà chinneach ad bholg, agus bidh dà shluagh air an sgaradh od innibh: agus bidh aon sluagh dhiubh seo nas treasa na an sluagh eile; agus nì esan as sine seirbhis dhàsan as òige.

²⁴ Agus nuair a choileanadh a làithean gu bhith air a h‑asaid, feuch, bha leth-aona na bolg.

²⁵ Agus thàinig an ciad-ghin a‑mach dearg, agus e uile mar fhallaing mholaich: agus thug iad Esau mar ainm air.

²⁶ Agus na dhèidh sin thàinig a bhràthair a‑mach, agus greim aig a làimh air sàil Esau; agus thugadh Iàcob mar ainm air: agus bha Isaac trì-fichead bliadhna a dh’aois nuair a rugadh iad.

²⁷ Agus dh’fhàs na gillean; agus bha Esau na shealgair seòlta, na fhear machrach; agus bha Iàcob na dhuine coileanta, a’ gabhail còmhnaidh ann am bùthan.

²⁸ Agus ghràdhaich Isaac Esau, a chionn gun d’ith e de a shidhinn; ach ghràdhaich Rebecah Iàcob.

²⁹ Agus bhruith Iàcob brochan; agus thàinig Esau on mhachair, agus e fann.

³⁰ Agus thubhairt Esau ri Iàcob, Leig dhomh ithe, guidheam ort, den bhrochan dhearg sin fhèin; oir tha mi fann: uime sin thugadh Edom mar ainm air.

³¹ Agus thubhairt Iàcob, Reic rium an‑diugh do chòir-bhreithe.

³² Agus thubhairt Esau, Feuch, tha mi dlùth don bhàs; agus ciod an tairbhe a tha anns a’ chòir-bhreithe seo dhòmhsa?

³³ Agus thubhairt Iàcob, Mionnaich dhòmhsa an‑diugh; agus mhionnaich e dha: agus reic e a chòir-bhreithe ri Iàcob.

³⁴ An sin thug Iàcob do Esau aran, agus brochan de ghall-pheasair; agus dh’ith e, agus dh’òl e, agus dh’èirich e, agus dh’fhalbh e roimhe: mar seo rinn Esau dìmeas air a chòir-bhreithe.