Genesis 24 - Am Bìoball Gàidhlig 1992

¹ Agus bha Abrahàm sean, agus air teachd gu aois mhòir, agus bheannaich an Tighearna Abrahàm anns na h‑uile nithean.

² Agus thubhairt Abrahàm ra sheirbhiseach a bu shine na thaigh, aig an robh riaghladh gach nì a bha aige, Cuir, guidheam ort, do làmh fom shliasaid.

³ Agus bheir mi ort mionnachadh air an Tighearna, Dia nèimh agus Dia na talmhainn, nach gabh thu bean dom mhac de nigheanan nan Canàanach, am measg a bheil mise am chòmhnaidh:

⁴ Ach thèid thu dom dhùthaich fhèin, agus a‑chum mo luchd-dàimh, agus gabhaidh tu bean dom mhac Isaac.

⁵ Agus thubhairt an seirbhiseach ris, Mas e is nach bi a’ bhean toileach air mise a leantainn don tìr seo, an èiginn dhomh do mhac a thoirt air ais a‑rìs don tìr as an tàinig thu?

⁶ Agus thubhairt Abrahàm ris, Thoir an ro‑aire nach toir thu mo mhac an sin a‑rìs.

⁷ An Tighearna, Dia nèimh a thug mise o thaigh m’athar, agus o thìr mo dhìlsean, agus a labhair rium, agus a mhionnaich dhomh, ag ràdh, Dod shliochd bheir mi am fearann seo; cuiridh esan a aingeal fhèin romhad, agus gabhaidh tu bean dom mhac as a sin.

⁸ Agus mura bi a’ bhean toileach air thusa a leantainn, an sin bidh tu saor om mhionnan-sa: a‑mhàin na toir mo mhac an sin a‑rìs.

⁹ Agus chuir an seirbhiseach a làmh fo shliasaid Abrahàim a mhaighistir, agus mhionnaich e dha a‑thaobh an nì sin.

¹⁰ Agus ghabh an seirbhiseach deich càmhail de chàmhail a mhaighistir, agus dh’fhalbh e; oir bha maoin a mhaighistir uile aige fo a làimh: agus dh’èirich e, agus chaidh e gu Mesopotamia, gu baile Nahoir.

¹¹ Agus thug e air na càmhail an glùn a lùbadh an taobh a‑muigh den bhaile, làimh ri tobar uisge, mu thràth feasgair, eadhon mun àm anns an tèid mnathan a‑mach a tharraing uisge.

¹² Agus thubhairt e, O Thighearna, Dhè mo mhaighistir Abrahàm, deònaich gun soirbhich leamsa an‑diugh, agus nochd coibhneas dom mhaighistir Abrahàm.

¹³ Feuch, tha mi am sheasamh an seo làimh ris an tobar uisge, agus thig nigheanan muinntir a’ bhaile a‑mach a tharraing uisge;

¹⁴ Agus tachradh e, a’ mhaighdeann ris an abair mise, Leig sìos, guidheam ort, do shoitheach, a‑chum is gun òl mi; agus their ise, Ol, agus bheir mise deoch dod chàmhail mar an ceudna: guma h‑i sin fhèin a dh’òrdaich thu dod sheirbhiseach Isaac; agus le sin bidh fhios agam gun do nochd thu coibhneas dom mhaighistir.

¹⁵ Agus mun do sguir e de labhairt, feuch, thàinig Rebecah a‑mach, a rugadh do Bhetuel, mac Mhilcah, bean Nahoir, bràthair Abrahàim; agus a soitheach air a gualainn.

¹⁶ Agus bha a’ chailinn ro‑mhaiseach ri amharc oirre, òigh, agus cha b’aithne do fhear riamh i: agus chaidh i sìos don tobar, agus lìon i a soitheach, agus thàinig i a‑nìos.

¹⁷ Agus ruith an seirbhiseach na coinneamh, agus thubhairt e, Leig dhomh, guidheam ort, beagan uisge òl as do shoitheach.

¹⁸ Agus thubhairt i, Ol, mo thighearna: agus ghreas i oirre, agus leig i sìos a soitheach air a làimh, agus thug i dha deoch.

¹⁹ Agus an dèidh dhi deoch a thoirt dha, thubhairt i, Tàirngidh mi uisge airson do chàmhal mar an ceudna, gus an sguir iad a dh’òl.

²⁰ Agus ghreas i oirre, agus dh’fhalmhaich i a soitheach anns an amar, agus ruith i a‑rìs don tobar a tharraing uisge; agus tharraing i airson a chàmhal uile.

²¹ Agus bha an duine ag amharc le iongantas oirre, agus a’ fantainn na thosd, a dh’fheuchainn an tug, no nach tug, an Tighearna air a thuras soirbheachadh leis.

²² Agus nuair a sguir na càmhail a dh’òl, an sin ghabh an duine cluas-fhàinne òir, anns an robh leth seceil de chudthrom, agus dà làmh-fhail airson a làmh, anns an robh deich seceil òir de chudthrom.

²³ Agus thubhairt e, Cò don nighean thu? Innis dhomh, guidheam ort; a bheil ann an taigh d’athar àite dhuinn gu tàmh a ghabhail ann?

²⁴ Agus thubhairt i ris, Is mise nighean Bhetueil, mac Mhilcah, a rug i do Nàhor.

²⁵ Thubhairt i ris mar an ceudna, Tha againn araon connlach agus innlinn gu leòr, agus àite gu tàmh a ghabhail ann.

²⁶ Agus chrom an duine e fhèin sìos, agus rinn e adhradh don Tighearna.

²⁷ Agus thubhairt e, Beannaichte gu robh an Tighearna, Dia mo mhaighistir Abrahàm, nach do bhuin a thròcair agus a fhìrinn om mhaighistir; air dhòmhsa a bhith anns an t‑slighe stiùir an Tighearna mi gu taigh bràithrean mo mhaighistir.

²⁸ Agus ruith a’ mhaighdeann, agus dh’innis i na nithean seo do mhuinntir taigh a màthar.

²⁹ Agus bha bràthair aig Rebecah dom b’ainm Làban: agus ruith Làban a dh’ionnsaigh an duine a‑mach a‑chum an tobair.

³⁰ Agus nuair a chunnaic e a’ chluas-fhàinne, agus na làmh-fhailean air làmhan a pheathar, agus nuair a chuala e briathran Rebecah a phiuthar, ag ràdh, Mar seo labhair an duine rium; an sin thàinig e a dh’ionnsaigh an duine, agus, feuch, sheas e làimh ris na càmhail aig an tobar.

³¹ Agus thubhairt e, Thig a‑steach, thusa a tha beannaichte on Tighearna; cuime a sheasas tu a‑muigh? Oir dh’ullaich mise an taigh, agus àite do na càmhail.

³² Agus thàinig an duine don taigh, agus dh’fhuasgail e na càmhail, agus thug e seachad connlach agus innlinn airson nan càmhal, agus uisge a dh’ionnlad a chas, agus casan nan daoine a bha maille ris.

³³ Agus chuireadh biadh air a bheulaibh gu ithe: ach thubhairt e, Chan ith mi, gus an innis mi mo ghnothach. Agus thubhairt esan, Labhair romhad.

³⁴ Agus thubhairt e, Is mise seirbhiseach Abrahàim;

³⁵ Agus bheannaich an Tighearna mo mhaighistir gu mòr, agus tha e air fàs cumhachdach: agus thug e dha caoraich, agus crodh, agus airgead, agus òr, agus òglaich, agus banoglaich, agus càmhail agus asail;

³⁶ Agus rug Sàrah, bean mo mhaighistir, mac dom mhaighistir na seann aois: agus thug e dhàsan gach nì a bha aige;

³⁷ Agus thug mo mhaighistir ormsa mo mhionnan a thoirt, ag ràdh, Cha ghabh thu bean dom mhac de nigheanan nan Canàanach, muinntir a tha mise a chòmhnaidh nam fearann:

³⁸ Ach thèid thu a dh’ionnsaigh taigh m’athar, agus a dh’ionnsaigh mo dhìlsean, agus gabhaidh tu bean dom mhac.

³⁹ Agus thubhairt mi rim mhaighistir, Theagamh nach lean a’ bhean mi:

⁴⁰ Agus thubhairt esan rium, Cuiridh an Tighearna, an làthair an do ghluais mise, a aingeal fhèin leat, agus soirbhichidh e do thuras; agus gabhaidh tu bean dom mhac om dhìlsean, agus o thaigh m’athar.

⁴¹ An sin bidh tu saor om mhionnan-sa, nuair a thig thu a‑chum mo dhìlsean; agus mura toir iad dhut bean, an sin bidh tu saor om mhionnan.

⁴² Agus thàinig mi an‑diugh a‑chum an tobair, agus thubhairt mi, O Thighearna, Dhè mo mhaighistir Abrahàm, ma shoirbhicheas tu a‑nis mo thuras air a bheil mi ag imeachd;

⁴³ Feuch, tha mi am sheasamh làimh ris an tobar uisge; agus nuair a thig a’ mhaighdeann a‑mach a tharraing uisge, agus a their mi rithe, Thoir dhomh, guidheam ort, beagan uisge ri òl as do shoitheach;

⁴⁴ Agus a their ise rium, Ol thu fhèin, agus tàirngidh mise mar an ceudna dod chàmhail: guma h‑i sin fhèin a’ bhean a dh’òrdaich an Tighearna do mhac mo mhaighistir.

⁴⁵ Agus mun do sguir mi de labhairt am chridhe, feuch thàinig Rebecah a‑mach, agus a soitheach air a gualainn; agus chaidh i sìos don tobar, agus tharraing i uisge; agus thubhairt mi rithe, Thoir dhomh deoch, guidheam ort:

⁴⁶ Agus ghreas i oirre, agus leig i sìos a soitheach o a gualainn, agus thubhairt i, Ol, agus bheir mi deoch dod chàmhail mar an ceudna: agus dh’òl mi, agus thug i air na càmhail òl mar an ceudna.

⁴⁷ Agus dh’fhiosraich mi dhith, agus thubhairt mi, Cò don nighean thusa? Agus thubhairt ise, Is mi nighean Bhetueil, mac Nahoir, a rug Milcah dha. Agus chuir mi a’ chluas-fhàinne air a h‑aghaidh, agus na làmh-fhailean air a làmhan.

⁴⁸ Agus chrom mi sìos mo cheann, agus rinn mi adhradh don Tighearna, agus bheannaich mi an Tighearna, Dia mo mhaighistir Abrahàm, a threòraich mi anns an t‑slighe cheirt, a ghabhail nighean bràthair mo mhaighistir da mhac.

⁴⁹ Agus a‑nis, ma bhuineas sibh gu coibhneil agus gu fìrinneach rim mhaighistir, innsibh dhomh; agus mura buin, innsibh dhomh; a‑chum is gun tionndaidh mi a dh’ionnsaigh na làimhe deise, no na làimhe clìthe.

⁵⁰ An sin fhreagair Làban agus Betuel, agus thubhairt iad, Is ann on Tighearna a thàinig an nì seo; chan urrainn sinne olc no math a ràdh riut.

⁵¹ Feuch, tha Rebecah ad làthair; gabh i, agus imich; agus biodh i na mnaoi aig mac do mhaighistir, mar a labhair an Tighearna.

⁵² Agus nuair a chuala seirbhiseach Abrahàim am briathran, chrom e e fhèin gu làr don Tighearna.

⁵³ Agus thug an seirbhiseach an làthair seudan airgid agus seudan òir, agus aodach, agus thug e iad do Rebecah: thug e mar an ceudna nithean luachmhor da bràthair agus da màthair.

⁵⁴ Agus dh’ith iad, agus dh’òl iad, e fhèin agus na daoine a bha maille ris, agus dh’fhan iad rè na h‑oidhche: agus dh’èirich iad anns a’ mhadainn; agus thubhairt esan, Cuiribh air falbh mi a dh’ionnsaigh mo mhaighistir.

⁵⁵ Agus thubhairt a bràthair agus a màthair, Fanadh a’ mhaighdeann maille rinn air a’ chuid as lugha deich làithean; na dhèidh sin falbhaidh i.

⁵⁶ Agus thubhairt e riu, Na cuiribh moille orm, oir shoirbhich an Tighearna mo thuras: cuiribh air falbh mi, a‑chum gun tèid mi a dh’ionnsaigh mo mhaighistir.

⁵⁷ Agus thubhairt iad, Gairmidh sinn air a’ mhaighdinn, agus fiosraichidh sinn de a beul fhèin.

⁵⁸ Agus ghairm iad air Rebecah, agus thubhairt iad rithe, An tèid thu leis an duine seo? Agus thubhairt i, Thèid.

⁵⁹ Agus chuir iad air falbh Rebecah, am piuthar, agus a banaltram, agus seirbhiseach Abrahàim, agus a dhaoine.

⁶⁰ Agus bheannaich iad Rebecah, agus thubhairt iad rithe, Is tu ar piuthar, bi‑sa ad mhàthair mhìltean de mhuilleanan; agus sealbhaicheadh do shliochd geata na muinntir sin leis am fuathach iad.

⁶¹ Agus dh’èirich Rebecah, agus a maighdeannan, agus mharcaich iad air na càmhail, agus lean iad an duine: agus ghabh an seirbhiseach Rebecah, agus dh’fhalbh e roimhe.

⁶² Agus bha Isaac a’ teachd o shlighe an tobair Lahai-roi; oir bha e a chòmhnaidh anns an tìr mu dheas.

⁶³ Agus chaidh Isaac a‑mach a bheachd-smaoineachadh anns an fhaiche air feasgar: agus thog e suas a shùilean, agus chunnaic e, agus, feuch, bha na càmhail a’ tighinn.

⁶⁴ Agus thog Rebecah suas a sùilean, agus nuair a chunnaic i Isaac, theirinn i bhàrr a’ chàmhail.

⁶⁵ Agus thubhairt i ris an t‑seirbhiseach, Cò e an duine seo a tha a’ sràid-imeachd anns an fhaiche gar coinneachadh? Agus thubhairt an seirbhiseach, Is e mo mhaighistir a tha ann: an sin ghabh i gnùis-bhrat, agus chòmhdaich i i fhèin.

⁶⁶ Agus dh’innis an seirbhiseach do Isaac na h‑uile nithean a rinn e.

⁶⁷ Agus thug Isaac i do bhùth Shàrah a mhàthair, agus ghabh e Rebecah, agus bha i aige na mnaoi: agus ghràdhaich e i: agus fhuair Isaac sòlas an dèidh bàs a mhàthar.