Galàtianach 5 - Am Bìoball Gàidhlig 1992

¹ Uime sin seasaibh gu daingeann anns an t‑saorsa leis an do rinn Crìosd saor sinn, agus na bithibh a‑rìs air ur cuibhreachadh le cuing na daorsa.

² Feuch, tha mise Pòl ag ràdh ribh, ma thimcheall-ghearrar sibh, nach bi tairbhe air bith dhuibh ann an Crìosd.

³ Oir tha mi a‑rìs a’ dèanamh fianais do gach uile dhuine a thimcheall-ghearrar, gu bheil e mar fhiachan air an lagh gu h‑iomlan a choileanadh.

⁴ Chan eil tairbhe sam bith ann an Crìosd dhuibhse a tha air ur fìreanachadh tre an lagh; thuit sibh o ghràs.

⁵ Oir tha sinne tre an Spiorad a’ feitheamh ri dòchas fìreantachd o chreideamh.

⁶ Oir ann an Iosa Crìosd, chan eil èifeachd sam bith ann an timcheall-ghearradh, no ann an neo-thimcheall-ghearradh, ach ann an creideamh a dh’obraicheas tre ghràdh.

⁷ Is math a ruith sibh; cò a bhac sibh o bhith umhail don fhìrinn?

⁸ Cha tàinig an impidh seo on tì a ghairm sibh.

⁹ Gortaichidh beagan de thaois ghoirt am meall uile.

¹⁰ Tha muinghinn agam asaibh anns an Tighearna, nach bi sibh a dh’aon dòigh air atharrachadh inntinn: ach an tì a tha a’ cur dragha oirbh, giùlainidh e a bhreitheanas, cò air bith e.

¹¹ Agus mise, a bhràithrean, ma shearmonaicheas mi fhathast an timcheall-ghearradh, carson a nìthear fhathast geur-leanmhainn orm? An sin bhiodh oilbheum a’ chroinn-cheusaidh air a chur air cùl.

¹² B’fheàrr leam gum biodh iadsan a tha a’ cur mì‑shuaimhneis oirbh eadhon air an gearradh as uaibh.

¹³ Oir, a bhràithrean, ghairmeadh a‑chum saorsa sibh; a‑mhàin na dèanaibh an t‑saorsa na cion-fàth don fheòil, ach le gràdh dèanaibh seirbhis da chèile.

¹⁴ Oir tha an lagh uile air a choileanadh ann an aon fhacal, eadhon ann an seo, Gràdhaichidh tu do choimhearsnach mar thu fhèin.

¹⁵ Ach ma bhios sibh a’ teumadh agus ag ithe a chèile, thugaibh aire nach claoidhear le a chèile sibh.

¹⁶ Tha mi ag ràdh mas eadh, Gluaisibh anns an Spiorad, agus cha choilean sibh ana-miann na feòla.

¹⁷ Oir tha an fheòil a’ miannachadh an aghaidh an Spioraid, agus an Spiorad an aghaidh na feòla: agus tha iad sin an aghaidh a chèile; ionnas nach faigh sibh na nithean a bu mhiann leibh a dhèanamh.

¹⁸ Ach ma threòraichear leis an Spiorad sibh, chan eil sibh fon lagh.

¹⁹ A‑nis tha obraichean na feòla follaiseach, as iad seo, adhaltranas, strìopachas, neòghlaine, macnas.

²⁰ Iodhal-adhradh, draoidheachd, naimhdeas, connsachadh, co‑fharpais, fearg, còmhstri, aimhreit, saobh-chreideamh.

²¹ Farmad, mortan, misg, raoidhteireachd, agus an leithidean sin: mum bheil mi ag innse dhuibh ro‑làimh, mar a dh’innis mi dhuibh cheana mar an ceudna, nach sealbhaich iadsan a nì an leithidean sin rìoghachd Dhè.

²² Ach is e toradh an Spioraid gràdh, aoibhneas, sìth, fad-fhulangas, caomhalachd, maitheas, creideamh,

²³ Macantas, stuaim: an aghaidh an samhail sin chan eil lagh.

²⁴ Agus iadsan as le Crìosd, cheus iad an fheòil, maille ri a h‑an‑tograidhean agus a h‑ana-miannan.

²⁵ Mas beò dhuinn anns an Spiorad, gluaiseamaid anns an Spiorad mar an ceudna.

²⁶ Na bitheamaid dèidheil air glòir dhìomhain, a’ brosnachadh a chèile, a’ gabhail farmaid ri chèile.