Eseciel 8 - Am Bìoball Gàidhlig 1992

¹ Agus thàrladh anns an t‑siathamh bliadhna, anns an t‑siathamh mìos, anns a’ chòigeamh là den mhìos, nuair a shuidh mi ann am thaigh, agus seanairean Iùdah nan suidhe mum chomhair, gun do thuit orm an sin làmh an Tighearna Dia.

² An sin dh’amhairc mi, agus feuch, cosamhlachd mar shamhladh duine: o thaisbeanadh a leasraidh agus fodha mar theine: agus o a leasraidh agus os a chionn, mar thaisbeanadh dealanaich, mar dhath òmair.

³ Agus chuir e a‑mach cumachd làimhe, agus ghlac e mi air dual dem cheann, agus thog an spiorad suas mi eadar talamh agus nèamh, agus thug e mi ann an taisbeanaidhean Dhè gu Ierusalem, gu doras a’ gheata as fhaide a‑staigh, a tha ag amharc ris an àird a tuath, far an robh àite ìomhaigh an eud, a bhrosnaicheas gu eud.

⁴ Agus, feuch, bha glòir Dia Israeil an sin, a rèir an t‑seallaidh a chunnaic mi anns a’ chòmhnard.

⁵ An sin thubhairt e rium, A mhic an duine, tog suas do shùilean a‑nis ri slighe na h‑àird a tuath: agus thog mi suas mo shùilean ri slighe na h‑àird a tuath, agus, feuch mu thuath, aig geata na h‑altarach, ìomhaigh seo an eud anns an dol a‑steach.

⁶ Agus thubhairt e rium, A mhic an duine, am faic thu ciod a tha iad a’ dèanamh? Na gràinealachdan mòra a tha taigh Israeil a’ cur an gnìomh an seo, a‑chum gun rachainn-sa am fad om naomh-ionad? Ach till fhathast, chì thu gràinealachdan as mò.

⁷ Agus thug e mi gu doras na cùirte: agus nuair a dh’amhairc mi, feuch toll anns a’ bhalla.

⁸ An sin thubhairt e rium, A mhic an duine, cladhaich a‑nis anns a’ bhalla: agus nuair a chladhaich mi anns a’ bhalla, feuch doras.

⁹ Agus thubhairt e rium, Imich a‑steach, agus feuch gràinealachdan aingidh a tha iad a’ dèanamh an seo.

¹⁰ Mar sin chaidh mi a‑steach agus chunnaic mi, agus, feuch, uile chosamhlachdan gach nì a shnàigeas, agus gach beathaich ghràineil, agus uile iodhalan taigh Israeil air an tarraing air a’ bhalla, gach taobh mun cuairt.

¹¹ Agus sheas nan làthair deich agus trì-fichead fear de sheanairean taigh Israeil, agus nam meadhon sheas Iaasaniah mac Shapain, gach fear le a thùiseir na làimh, agus neul tiugh tùise a’ dol suas.

¹² An sin thubhairt e rium, A mhic an duine, am faca tu ciod a tha seanairean taigh Israeil a’ dèanamh anns an dorcha, gach fear ann an seòmraichean a ìomhaigheachd fhèin? Oir tha iad ag ràdh, Chan eil an Tighearna gar faicinn; thrèig an Tighearna an talamh.

¹³ Thubhairt e rium mar an ceudna, Till fòs a‑rìs, chì thu gràinealachdan as mò a tha iad a’ dèanamh.

¹⁴ An sin thug e mi gu doras geata taigh an Tighearna, a bha ris an àird a tuath, agus, feuch, an sin shuidh mnathan a’ gul airson Thamais.

¹⁵ An sin thubhairt e rium, Am faca tu seo, a mhic an duine? Till fòs a‑rìs, chì thu gràinealachdan nas mò na iad seo.

¹⁶ Agus thug e mi don chùirt as fhaide a‑staigh de thaigh an Tighearna, agus, feuch, aig doras teampall an Tighearna, eadar an sgàth-thaigh agus an altair, tuaiream còig fir ar fhichead, len cùlaibh ri teampall an Tighearna, agus an aghaidh ris an àird an ear, agus iad ag adhradh don ghrèin ris an àird an ear.

¹⁷ An sin thubhairt e rium, Am faca tu, O mhic an duine? An nì faoin do thaigh Iùdah a bhith a’ dèanamh nan gràinealachdan a tha iad a’ dèanamh an seo? Oir lìon iad an tìr le ainneart, agus thill iad dom bhrosnachadh-sa a‑chum feirge; agus, feuch, chuir iad am meanglan rin sròin.

¹⁸ Uime sin buinidh mise riùsan fòs ann am feirg: cha chaomhain mo shùil, cha mhò a bhios truas agam: agus ged èigh iad ann am chluasan le guth àrd, gidheadh chan èisd mi riu.